Habakuku 1 - ÎVUKU RÎA ÛVORO MWARO

¹ Îno nî ndûmîrîri îrîa Ngai-Mûnene aaguûrîrie mûrathi Habakuku.

Habakuku nîwatetire nîûndû wa kîvooto gûtura

² We Ngai-Mûnene, nîngûrîrîra nginya rî nîguo ûndethie, nawe ndûkegua? Nîngûrîrîra nginya rî ngiugaga: “Mbaara!” nawe ndûkamvonokia?

³ Ûratûma mone maûndû mama macûku na thîna nîkî? Gûcûkangua na mbaara irî mbere yakwa; ngucanio na mbaara nîciambîrîrîtie.

⁴ Kwoguo watho ndûrî na vata, na kîvooto gîtirûmagîrîrwa. Andû arîa acûku mathiûrûrûkîrîtie andû arîa aro, kwoguo kîvooto gîtirûmagîrîrwa.

Macokio ma Ngai-Mûnene

⁵ Ngai-Mûnene arauga atîrî, “Taroria ndûrîrî irîa ikûrigicîrîtie wone, na nîûkûmaka na ûvavûke. Nîûndû nîngwîka ûndû wa ûrî mwoyo, ûndû ûtagetîkia rîrîa ûkerwa guo.

⁶ Nîûndû nînîraringîrîra Akalidei, andû acio aganu ûguo na matarî ntha. Vûrûri ûcio ûvîtûkîrîrîte nthî yonthe, nîguo woce vûrûri ûtarî wao.

⁷ Acio nî andû a kwîguithia andû guoya na a kûmakania; kîvooto na ûndû ûrîa mwagîrîru umanaga na o.

⁸ “Mbarathi ciao irî îvenya gûkîra itang'a; nînyûmîrîru gûkîra ciathi irî mvûtu. Itwîte mbarathi ciumîte kûndû kûraca; andû ao arîa mathiîcaga maumaga kûndû kûraca, igûrûkaga na îvenya ta nderi îkînyita gîa kûrîa.

⁹ “Onthe maûkîte gwîka waganu; waganu ûrî mbere yao wa ûrîa marathiî na mbere, marocania andû engî ta mûthanga, makamatua mîgwate.

¹⁰ Nîmanyararaga athamaki, na makathekerera atongoria. Nîmathekagîrîra kûrîa kuonthe kûgitîre, na makamikîrîra nthingo icio na mûthetu na makainyita.

¹¹ Nîmacokaga makathiî na mbere ta rûkûngi, nîmekaga mavîtia na vinya wao nîguo ûtuîkîte ngai yao.”

Habakuku nîwatetirie Ngai-Mûnene rîngî

¹² We Ngai-Mûnene kuuma Kîammbîrîria we warî Ngai. Ûrî Ngai wakwa, mûtheru na wa tene na tene. We Ngai wakwa, mûtheru wakwa ûtakucaga, we Ngai-Mûnene nîûthuurîte Akalidei nîguo matûtuîre ciira; we Îthiga, ûmavete vinya nîguo matûverithie.

¹³ Metho maku nî matheru mûno, ndûngîûmîrîria kwona maûndû macûku, na ndûngîîtirîria kwona andû magîka naaî. Kwoguo ûrakira nîkî rîrîa andû arîa aganu, maracûkangia andû arîa athingu kûmakîra?

¹⁴ Ûtuîte andû ta nthamaki irî manjîrî, kana ciûmbe irîa itarî wa gûitongoria.

¹⁵ Akalidei maûragaga andû na ndûano, mamaûnganagia vamwe na makamekîra netirî ciao, kwoguo makenaga na magacanjamûka.

¹⁶ Nîmagoocaga neti ciao na makairutîra magongoona, nîûndû nîcio imavecaga indo cia gwîkenia, na kûrîa irio mbaro.

¹⁷ Nîkwa magûtûûra macomoranagîra mviû cia njûra, na kûûraga andû a ndûrîrî irîa ciîngî gûtarî ntha?