Gûco 28 - ÎVUKU RÎA ÛVORO MWARO

Irathimo kuumana na wathîki

¹ “Ethîrwa nî mûkwathîkîra Ngai-Mûnene, Ngai wenyu, na mûrûmagîrîre na kinyi maathani make monthe marîa ngûkwatha ûmûnthî, Ke nîakaamûtua rûrîrî rûnene gûkîra ndûrîrî cionthe cia nthî.

² Nîakaamûva indo ino cionthe mbaro na amwîngîvîrie cio makîria.

³ “Ngai-Mûnene nîakaamûrathima mûrî matûûrarî menyu na mûrî mîgûndarî yenyu.

⁴ “Ngai-Mûnene nîakaarathima ciana cienyu, maciaro ma mîgûnda yenyu, na arathime ndîthia ya ng'ombe na ng'ondu cienyu.

⁵ “Ngai-Mûnene nîakaarathima mîrûrû yenyu na arathime indo irîa mûtûmagîra kûruga irio.

⁶ “Ngai-Mûnene akaamûrathimaga mûkiumagara na mûgîcoka na mûciî.

⁷ “Rîrîa mwatharîkîrwa nî nthû cienyu, Ngai-Mûnene nîakaamûvotithia kûivoota. Mamûtharîkîra kuuma mwena ûmwe, makaaûra nîmue na mîena yonthe.

⁸ “Ngai-Mûnene Ngai wenyu nîakaarathima mawîra menyu monthe, na atûme makûmbî menyu mecûre irio, acoke atûme mwîngîve mûrî vûrûrirî ûrîa akûmûva.

⁹ “Ethîrwa nî mûkwathîkîra Maathani ma Ngai-Mûnene Ngai wenyu na mwîke maûndû monthe marîa amwathîte, nîakaamûtua andû ake atheru wata ûrîa aamwîrîîre.

¹⁰ Nao andû onthe a nthî nîmakoona atî mûrî athuure nî Ngai-Mûnene mûgatuîka andû ake kîûmbe, na nîmakaamwîtigagîra.

¹¹ Ngai-Mûnene nîagaatûma mûthatûkwe; nîmûkaagîa na ciana nyîngî, ndîthia nene ya ng'ombe, na irio nyîngî cia mûgûnda mûrî vûrûrirî ûrîa Ngai-Mûnene eerîre methe menyu atî nîakaamûva.

¹² Ngai-Mûnene nîakaamûvingûrîra mûthithû wake kûu îgûrû amurithagîrie mbura vûrûrirî wenyu mavinda marîa magîrîru na arathimage wîra wenyu. Nîmûgaakovithia mavûrûri meengî, nwatî mûtigaakova kuuma kûrî o.

¹³ Ngai-Mûnene nîakaamûtua a mbere nwatî tî a mûthiia. Maûndû menyu makethagîrwa makîthiî na mbere na matigaacoka na vuva, ethîrwa nî mûkwathîkîra maathani ma Ngai-Mûnene Ngai wenyu marîa ngûmwatha ûmûnthî na mûmavingagie na kinyi.

¹⁴ Mûtikarega kwathîkîra maathani mama na njîra wa yonthe, na mûtikagooce kana mûtungatîre ngai ciîngî.

Irumi nîûndû wa kûrega kwathîka

¹⁵ “Nwatî ethîrwa mûtikaathîkîra na kinyi ûrîa Ngai-Mûnene Ngai wenyu akuuga, kana mûrege kûvingia maathani make na maûndû monthe marîa ngûmwatha ûmûnthî nîmûkaanyitwa nî irumi ino cionthe irûmîrîrîte na mûtûûre nacio nginya rîrîa ikaamûthiria.

¹⁶ Ngai-Mûnene nîagaatûma mûnyitwe nî kîrumi mûrî matûûrarî menyu na mûrî mîgûndarî yenyu.

¹⁷ Ngai-Mûnene nîagaatûma mîrûrû yenyu înyitwe nî kîrumi wana indo irîa mûtûmagîra kûruga irio.

¹⁸ Ngai-Mûnene nîagaatûma ciana cienyu, maciaro ma mîgûnda yenyu na ndîthia ya ng'ombe na ng'ondu cienyu inyitwe nî kîrumi.

¹⁹ Ngai-Mûnene nîagaatûma mûnyitwe nî kîrumi mûkiumagara na mûgîcoka kwenyu mîciî.

²⁰ Mweka maûndû macûku na mûtiganîrie Ngai-Mûnene, ke nîagaatûma mûnyitwe nî mûthiro, ivîngîcî na mûgîe na mathîna maûndûrî monthe marîa mûgekaga, nginya mûgaacûkangua mûthire viû na îvenya.

²¹ Ngai-Mûnene nîagaatûma mûnyitwe nî mîrimû mîcûku nginya îmûthirie muonthe mûrî vûrûrirî ûrîa mûthiîte gûtonya mûwîgwatîre.

²² Ngai-Mûnene nîagaatûma mûnyitwe nî wonje, kûgîa na matoo mwîrî, kûviûva mwîrî, ûrugarî mwîngî, na gûtura mbura. Maûndû mau matikaathira kûrî mue nginya rîrîa mûgaakua.

²³ Îgûrû gûkethîrwa kûtherete ta gîcango nakuo nthî kûmagarîte ta cuuma nîûndû wa gûtura mbura.

²⁴ Ngai-Mûnene nîagaatûma rûkûngû na mûthanga ciure ta mbura kuuma îgîrû, nginya rîrîa mûkaathira.

²⁵ “Ngai-Mûnene nîagaatûma mûvootwe nî nthû cienyu. Mûkaamatharîkîra kuuma mwena ûmwe, nwatî mûkaaûra nîo na mîena yonthe. Andû onthe a nthî nîmakaanyitwa nî guoya nyîngî mona ûrîa gwîkîkîte kûrî mue.

²⁶ Ciimba cienyu ikethîrwa irî irio cia iconi na nyamû cia kîthaka na gûtirî mûndû ûgaaciîngata.

²⁷ Ngai-Mûnene nîagaatûma mûgîe na nyimba ta irîa ciarî na andû a Misiri, na atûme mîîrî yenyu îtûrîkange ironda. Nîmûkaagîa na ûvere na mwîthûa na mûtikaavora.

²⁸ Ngai-Mûnene nîagaatûma mume ngoma, mûre metho na mûvîngîcîke meciria.

²⁹ Mûkaathiîcaga mûthenya mûkînyitanyitaga ta ndumumu na gûtirî ûndû ûkaamûthatûka maûndûrî marîa mûgeekaga. Mûkaavinyagîrîrua vîndî cionthe na mûgacunagwa indo cienyu na vinya na gûtirî mûndû ûkaamûtethia.

³⁰ “Mûndû akaarîkanagîra na mwîrîtu atî nîakûmûvikia, nake mûndûmûrûme wîngî akamenyana nake kîîmwîrî. Mûndû agaatumaga nyomba na ndagaatûûra kuo. Mûndû akaavandaga mîthavibu, nwatî ndakaarîa thavibu ciayo.

³¹ Ng'ombe cienyu ikaaûragagwa mûkîonaga na mûtikaarûma nyama ciacio. Mûgaacunagwa mvunda cienyu na vinya na mûtigaacokerua cio. Ng'ondu cienyu ikaavecagwa nthû cienyu, na gûtirî mûndû ûkaamûtethia.

³² Anake enyu na erîtu enyu makaavecanagwa kûrî ageni wa mûroretie. Mûgeekaraga wa mûthenya mûkûûrîte metho mwone kana nîmagûcoka, nwatî mûtikethîrwa mûrî na ûvoti wa kûrigîrîria mathiî.

³³ Vûrûri mûgeni ûgoocaga irio cienyu cionthe irîa mûrutîrîte wîra na mûtikoona wanarî kîndû, tiga kûvinyîrîrua na kûthînua mûno vîndî cionthe.

³⁴ Mwona mathîna mau monthe nîkwa mûkaauma ngoma.

³⁵ Ngai-Mûnene nîagaatûma magûrû menyu mecûrwe nî nyimba irî na ûrûrû mûno na itangîvora, kuuma gîtende nginya kîongo.

³⁶ “Ngai-Mûnene nîakaamûvira vamwe na mûthamaki wenyu vûrûri mûgeni kûrîa mue wana methe menyu mataicî. Mûrî kûu mûgaatungatagîra ngai ng'eni irûthîtwe na mîtî na mathiga.

³⁷ Andû a mavûrûrirî marîa Ngai-Mûnene akaamûvira nîmakaanyitwa nî guoya mona maûndû marîa mekîkîte kûrî mue. Nîmakaamûnyarara na mamûthekerere.

³⁸ “Nîmûkaavanda mbeû nyîngî, nwatî mûgaaketha maketha manini, nîûndû maketha menyu nîmakaarîwa nî ngige.

³⁹ Nîmûkaavanda mîthavibu mîgûndarî yenyu na mûmîmenyerere, nwatî mûtikaanyua ndivei kana mûkethe thavibu icio, nîûndû thavibu nîikaarîwa nî igunyû.

⁴⁰ Mîtamaiyû îrîa îciaraga matunda nîgaakûra vûrûrirî wenyu wonthe, nwatî mûtikevaka maguta ma yo nîûndû ndamaiyû nîigeetîka nthî cionthe kuuma mîtîrî.

⁴¹ Nîmûkaagîa na anake na erîtu, nwatî matikethîrwa marî enyu nîûndû onthe nîmagaatavwa.

⁴² Mîtî yenyu yonthe na irio cia mîgûnda nîkaarîwa nî ngige.

⁴³ “Ageni arîa matûûraga vûrûrirî wenyu nîmakaathiî na mbere kûgîa na vinya kûmûkîra, namue nîmûkaathiî na mbere kûthirwa nî vinya.

⁴⁴ Makaamûkovithagia indo, nwatî mue mûtikoona gîa kûmakovithia. Makethîrwa marî a mbere namue mûrî a mûthiia.

⁴⁵ “Irumi icio cionthe nîikaamûrûmîrîra, imûnyite na imûthirie, nîûndû nîmwaregire kwathîkîra Ngai-Mûnene Ngai wenyu, na mûkîrega kûvingia mawatho na maathani marîa aamûveere.

⁴⁶ Irumi icio ikethîrwa irî ûira wa îverithia rîa Ngai kûrî mue na kûrî njiarwa cienyu tene na tene.

⁴⁷ Ngai-Mûnene Ngai wenyu nîwamûrathimire na indo nyîngî, nwatî mûtiamûtungatîra mûkenete na mûrî na ngoro ntheru.

⁴⁸ Kwoguo, mûgaatungatagîra nthû cienyu irîa Ngai-Mûnene akaamûrekereria kûrî cio. Mûgaaitungatagîra mûrî avûtu, mûrî anyondu na mûrî njaga na mûtarî wanarî kîndû. Nthû cienyu ikaamûvinyîrîria nginya rîrîa mûgaakua mûthire.

⁴⁹ Ngai-Mûnene nîakaarete vûrûri kuuma kûndû kûraca ûrîa mûtaicî rûthiomi rwao, ûûke ûmûtharîkîre wa rîmwe ta nderi.

⁵⁰ Vûrûri ûcio ûrî andû aganu mûno na matatîîaga andû akûrû kana meguîra andû ethî ntha.

⁵¹ Andû acio nîmakaarîa ndîthia cienyu na irio cienyu, nginya rîrîa mûkaarîwa nî yûra. Matikaamûtigarîria wanarî ngano, ndivei, maguta ma ndamaiyû, ng'ombe kana ng'ondu, nginya rîrîa mûgaakua.

⁵² Andû acio nîmakaarigicîria matûûra menyu monthe marîa marî vûrûrirî ûrîa Ngai-Mûnene Ngai wenyu amûveete, na momomore nthingo irîa imagitîrîte irîa mwîvokete atî ikaamûgitagîra.

⁵³ “Rîrîa mûkaarigicîrua nî nthû cienyu, nîmûkaagîa na thîna nyîngî mûno ya irio, nginya mûrîe ciana cienyu irîa Ngai-Mûnene Ngai wenyu amûrathimîte nacio.

⁵⁴ Wana mûndûmûrûme ûrîa mûvoreri na ûrî ntha mûno gatagatîrî kenyu, ndakaarûmia mûrwang'ina irio kana mûka ûrîa endete mûno, wana kana twana twake tûrîa tûtigarîte.

⁵⁵ Ndakaarûmia wanarî ûmwe wao nyama cia ciana ciake irîa aûragîte nîguo arîe, nîûndû ndakethîrwa atigarîtie kîndû vuva wa thîna ûrîa ûkethîrwa kuo nîûndû wa kûrigicîrua nî nthû kûu matûûrarî.

⁵⁶ Nake mûndûmûka ûrîa mûvoreri na ûrî ntha mûno gatagatîrî kenyu, na mûtongu mûno na ndaanakinyithia kûgûrû gwake nthî, ndakeeguîra mûthuuriwe ûrîa endete ntha, mûvîcî kana mwarî.

⁵⁷ Nîakaathitha thigiri wana ciana ciake irîa agaaciara nîûndû nîakenda kûirîa na nthitho, nîûndû wa thîna ûrîa ûkethîrwa ûrî kuo rîrîa nthû ikaarigicîria îtûûra rîao.

⁵⁸ “Ethîrwa mûtikaavingagia na kinyi mawatho monthe marîa mandîkîtwe îvukuurî rîîrî, na mwîtigagîre rîîtwa rîa Ngai-Mûnene Ngai wenyu, na nîrîo rîrî riiri na rîagîrîrwe nî kûgoocwa,

⁵⁹ Ngai-Mûnene nîakaamûretere vamwe na njiarwa cienyu mûthiro mûnene na mîrimû mîcûku mûno îtavoraga.

⁶⁰ Nîakaamûretere mîrimû yonthe mîcûku ta îrîa mwarî nayo Misiri, na mûtikaavora.

⁶¹ Ngai-Mûnene nîakaamûretera mîrimû ya mîthemba yonthe na mîthiro îtandîkîtwe îvukuurî rîîrî rîa watho na îmûthirie viû.

⁶² Wana ethîrwa mwîngîvîte ta njata cia îgûrû mûgaatigara andû anini, nîûndû nîmwaregire kwathîkîra Ngai-Mûnene Ngai wenyu.

⁶³ Wata ûrîa Ngai-Mûnene akenirue na akîmwîka maûndû maro na agîtûma mwîngîve mûno, nwa ta guo agaakena akîmûretithîria mathîna na akîmûthiria. Nîmûkaarutwa vûrûrirî ûrîa mûthiîte kwîgwatîra.

⁶⁴ “Ngai-Mûnene nîakaamûnyagania mavûrûrirî monthe ma nthî. Nîmûgaatungatîra ngai ng'eni irûthîtwe na mîtî na mathiga, irîa mue wana methe menyu mataanagooca.

⁶⁵ Mûtikeganîra kana mûgîe na thayû mûrî mavûrûrirî mau, na gûtigaatuîka kwenyu. Ngai-Mûnene nîagaatûma mwîthîrwe mûrî na guoya, mûtarî na kîîrîgîrîro na mûthirîtwe nî mwîvoko.

⁶⁶ Nîmûtûûra mûrî ûgwatirî; na mûkethagîrwa mwîcûrîtwe nî guoya nyîngî mûthenya na ûtukû na mûtarî na kîîrîgîrîro gîa ûtûûro.

⁶⁷ Kîraûko gwakîa mûkaaûragia gûgaatuka rî, na kîvwaî gûgîtuka mûkaûragia gûgaakîa rî, nîûndû wa guoya nyîngî wa maûndû marîa mûkeethagîrwa mûkîona.

⁶⁸ Ngai-Mûnene nîakaamûcokia Misiri na meri, wana ethîrwa nîmwaugîte atî mûtigaacoka kuo rîngî. Na mûrî kûu, nîmûkevecana kûrî o nîguo mamûgûre mûtuîke ngombo cia nthû cienyu, nwatî gûtirî mûndû ûkaamûgûra.”