Ezira 8 - ÎVUKU RÎA ÛVORO MWARO

Andû arîa maacokire kuuma îthamîriorî

¹ Ûyû nîguo mûtaratara wa anene a nyomba cia andû a Isiraeli na njiarwa cia andû arîa maathiîcanirie na Ezira kuuma Babuloni kûthiî Jerusalemu. Vîndî îo Aritakiserikise nîke warî mûthamaki wa vûrûri ûcio.

² Gerishomu aarî mûnene wa nyomba ya Finehasi, Danieli aarî mûnene wa nyomba ya Ithamaru, Hatushi

³ mûvîcî wa Shekania aarî mûnene wa nyomba ya Daudi, Zekaria aarî mûnene wa nyomba ya Paroshi na andû arîa meeyandîkithîtie îgana rîa mîrongo îtano.

⁴ Eliehoenai mûvîcî wa Zerahia aarî mûnene wa nyomba ya Pahathi Moabu. Onthe maarî arûme magana maîrî (200).

⁵ Shekania mûvîcî wa Jahazieli aarî mûnene wa nyomba ya Zatu, andû acio maarî arûme magana mathatû (300).

⁶ Ebedi mûvîcî wa Jonathani aarî mûnene wa nyomba ya Adini, na yarî na arûme mîrongo îtano (50).

⁷ Jeshaia mûvîcî wa Athalia aarî mûnene wa nyomba ya Elamu, Acio nao maarî arûme mîrongo mûgwanja (70).

⁸ Nake Zebadia mûvîcî wa Mikaeli aarî mûnene wa nyomba ya Shefatia. Acio nao maarî arûme mîrongo înana (80).

⁹ Obadia mûvîcî wa Jehieli aarî mûnene wa nyomba ya Joabu, îrî na arûme magana maîrî na îkûmi na anana (218).

¹⁰ Shelomithi mûvîcî wa Josifia aarî mûnene wa nyomba ya Bani îrî na arûme îgana na mîrongo îtandatû (130).

¹¹ Zakaria mûvîcî wa Bebai aarî mûnene wa nyomba ya Bebai îrî na arûme mîrongo îîrî na anana (28).

¹² Johanani mûvîcî wa Hakatani aarî mûnene wa nyomba ya Azigadi, îrî na arûme îgana na îkûmi (110).

¹³ Nayo nyomba ya Adonikamu îrî na arûme mîrongo îtandatû anene ao maarî Elifeleti, Jeueli, na Shemaia. Acio maacokire kuuma îthamîriorî vuvarî.

¹⁴ Uthai na Zakuri maarî anene a nyomba ya Bigivai. Nao acio maarî arûme mîrongo mûgwanja (70).

Ezira nîwacaririe Alawi a gûtungata hekarûrî

¹⁵ Nînaacokire ngîra andû onthe magomane vamwe mûtarorî wa manjî ûrîa ûthiîte îtûûrarî rîa Ahava. Nîtwekarire vau mîthenya îthatû. Gîkundirî Kîam andû acio nînoonire atî vaarî na athînjîri-Ngai, nwatî vatiarî na a mûvîrîga wa Alawi.

¹⁶ Nînaacokire ngîtûmana andû kenda amwe a arîa atongoria magetwe. Nao andû acio maarî, Eliezeri, Arieli, Shemaia, Elinathani, Jaribu, Elinathani, Nathani, Zekaria, na Meshulamu, na arimû aîrî, Joiaribu na Elinathani.

¹⁷ Nînaamatûmire kûrî Ido mûtongoria wa andû a Kasifia, na ngîmera makaûrie Ido na andû ao, na andû arîa marutaga wîra hekarûrî matûtûmîre andû a gûtungatîra Ngai hekarûrî.

¹⁸ Nîûndû wa wega wa Ngai nîmaatûtûmîre Sherebia, mûndû warî na ûvoti wa kuuma nyomba ya Mahili mûvîcî wa Mûlawi, na avîcî ake îkûmi na anana wa vamwe na aa mûrwang'ina.

¹⁹ Wana nîmaatûtûmîre Hashabia na Jeshaia a kuuma nyombarî ya Merari marî na andû ao mîrongo îîrî.

²⁰ Vamwe na acio, kwarî na ndungata cia hekarû magana maîrî na mîrongo îîrî (220). Methe ma tene ma ndungata icio maathuurirwe nî mûthamaki Daudi na anene ake nîguo matethagie Alawi. Marîîtwa mao onthe maarî mandîke.

Ezira nîwerire andû menyerekie na mavoe

²¹ Vakuvî na mûtaro wa manjî wa Ahava nînerire andû onthe twînyerekie na twînyivie mbere ya Ngai wetû na tûvoe. Nîtwavoire Ngai na tûkîmûria atûtongorie na atûgitîre rûgendorî rwetû tûrî vamwe na ciana na indo cietû cionthe.

²² Nînegwire nthoni cia kwîra mûthamaki atûnengere athigari a mbarathi a gûtûgitîra kuuma kûrî nthû tûrî rûgendorî rwetû. Neguire nthoni nîûndû nînamwîrîte atî Ngai nîarathimaga mûndû wa wonthe ûrîa ûmwîtîkîtie, nwatî ndakenagua nî arîa mamûtiganagîria na nî amaverithagia.

²³ Kwoguo nîtwenyerekirie na tûkîvoya Ngai atûgitîre, na nîwegwire mavoya metû.

Iveo cia hekarû

²⁴ Nînaacokire ngîthuura Sherebia, Hashabia, na athînjîri-Ngai engî îkûmi kuuma kûrî arîa maatongoretie.

²⁵ Nînaacokire ngîthima indo irîa mûthamaki, andû arîa mamûtaaraga, anene, na andû a Isiraeli maavecanîte cia gûtûmîrwa hekarûrî. Indo icio ciarî sîlûva, thaavu, mbakûri na thaani. Nacio nînainenganîre kûrî athînjîri-Ngai.

²⁶ Indo icio cionthe ciarî: sîlûva tani mîrongo îîrî na igîrî (22), thaani na mbakûri îgana rîmwe (100) cia ûrito wa kilo mîrongo mûgwanja, (70) na thaavu kilo ngiri ithatû na magana mana (3,400).

²⁷ Mbakûri mîrongo îîrî (20) cia thaavu irî na ûrito wa kilo inyanya na nuthu. Mbakûri igîrî cia gîcango irîa mbaro mûno, na thogora wacio warî ûndû ûmwe na mbakûri cia thaavu.

²⁸ Nînacokire ngîra athînjîri-Ngai acio atîrî, “Mue mûrî atheru methorî ma Ngai-Mûnene, Ngai wa methe menyu ma tene. Wana sîlûva, thaavu na mbakûri ino cionthe andû marutîte na njîra ya kwîyendera nî ntheru.

²⁹ Imenyerereni na mûciige waro nginya rîrîa mûgaakinya Jerusalemu hekarûrî. Mwakinya Jerusalemu nîmûgaatonya kanyombarî ka athînjîri-Ngai kûu hekarûrî na mûkaaithima na mûinenganîre mûnene wa athînjîri-Ngai arî vo, Alawi, na atongoria a andû a Isiraeli arîa marî Jerusalemu.”

³⁰ Kwoguo athînjîri-Ngai na Alawi nîmoocire sîlûva, thaavu, mbakûri na thaani icio ciathimirwe nîguo maivire hekarûrî kûu Jerusalemu.

Andû a Isiraeli nîmaacokire Jerusalemu

³¹ Mûthenya wa îkûmi na îîrî wa mweri wa mbere nîrîo twaumire Ahava mûtarorî wa manjî nîguo tûthiî Jerusalemu. Ngai nîwatûgitîre rûgendorî rwetû kuuma kûrî nthû irîa ingîatûtharîkîre kana arîa mangîatwovere njîrarî.

³² Rîrîa twakinyire Jerusalemu nîtwanogokire îvinda rîa mîthenya îthatû.

³³ Mûthenya wa kana nîtwathiîre hekarûrî, na tûkîthima sîlûva, thaavu na mbakûri na thaani na tûkîinenganîra kûrî mûthînjîri-Ngai Meremothi, mûvîcî wa Uria. Meremothi maarî na Eleazaru mûvîcî wa Finehasi, na Alawi aîrî, Jozabadi mûvîcî wa Jeshua na Noadia mûvîcî wa Binui.

³⁴ Indo cionthe nîciatarirwe, ikîthimwa na mûtaratara wacio nîwandîkirwe vîndî îo.

³⁵ Andû onthe arîa maacokete kuuma îthamîriorî nîmaacokire makîrutîra Ngai wa Isiraeli matega ma kûvîvua. Nîmaarutire ndegwa îkûmi na igîrî nîûndû wa vûrûri wonthe wa Isiraeli, ng'ondu mîrongo kenda na ithathatû na tûtûrûme mîrongo mûgwanja na mûgwanja. Nîmaacokire makîruta mbûri îkûmi na igîrî nîûndû wa mevia mao. Nyamû icio cionthe nîciavîvirue irî matega ma Ngai-Mûnene.

³⁶ Nîmaacokire magîtwarîra mûnene wa vûrûri ûrîa ûrî na mwena wa îthûîro wa Rûnjî rwa Farati maarûa, marî na anene ake. Maarûa îo yandîkîtwe nî mûthamaki Aritakiserikise na yonanagia ûrîa aathanîte. Nao nîmaaveere andû a Isiraeli ûtethio vamwe na wa hekarû ya Ngai.