Ezira 5 - ÎVUKU RÎA ÛVORO MWARO

¹ Kavindarî kau arathi aîrî, nao nî Hagai na Zakaria mûvîcî wa Ido nîmaambîrîrie kwarîria Ayahudi makîgwetaga rîîtwa rîa Ngai wa Isiraeli. Ayahudi aya nî arîa maatûûraga Juda na Jerusalemu.

² Rîrîa Zerubabeli mûvîcî wa Shealitieli na Joshua mûvîcî wa Jehozadaki meeguire ndûmîrîri yao, nîmaambîrîrie rîngî gûtuma hekarû kûu Jerusalemu. Nao arathi acio aîrî nîmaamatethagia.

³ Wa rîmwe Tatenai mûnene wa vûrûri ûrîa ûrî mûringo wa Rûnjî rwa Farati mwena wa îthûîro, na Shetharu Bozenai, na anene acio engî nîmaaûkire Jerusalemu. Nao nîmaaûririe atîrî, “Nî ûrîkû wamûveere watho wa gûtuma hekarû îno na mûrîkie wîra wayo?”

⁴ Nîmaacokire makîûria marîîtwa ma andû arîa maatumaga hekarû.

⁵ Nwatî Ngai nîwamenyagîrîra atongoria a Ayahudi, na anene a thirikari ya Perisia nîmaatuire matigeke ûndû wana ûrîkû matambîte kûmenyithia mûthamaki Dario, na macoke manyite macokio make.

⁶ Maandîkire mûthamaki wa Perisia atîrî,

⁷ “Kûrî mûthamaki Dario, ûrogîa na thayû wathanirî waku.

⁸ “Mûthamaki wetû nîtûgûkûmenyithia atî nîtwathiîre vûrûrirî wa Juda na tûkîthiî hekarûrî ya Ngai ûrîa mûnene. Nîtwethîrîrie îgîtumagwa na mathiga manene mûno na mbaû nene cigîrîrîtwe nthingorî. Wîra ûyû nîûrarutwa ûmenyereretwe na kinyi na nîûrathiî na mbere waro.

⁹ “Nîtwaûririe atongoria ao matwîre ûrîa wamaveere watho wa gûtuma hekarû na mamîrîkie.

¹⁰ Wana nîtwamaûririe marîîtwa mao nîguo tûgaakûmenyithia arîa atongoria a wîra ûyû.

¹¹ “Nao nîmaatûcokerie atîrî, ‘Tue tûrî ndungata cia Ngai wa îgûrû na nthî. Tûratuma rîngî hekarû îrîa yatumîtwe mbere na îkarîkua, mîaka mîngî mîthiru nî mûthamaki warî na vinya mûno wa Isiraeli.

¹² Nwatî methe metû ma tene nîmaarakaririe Ngai wa îgûrû. Nake nîwamanenganîre kûrî Nebukadinezarû mûthamaki wa Babuloni na Akalidei. Methe metû ma tene nîmaavootirwe na makîvirwa îthamîriorî Babuloni macûkangia hekarû ya Ngai.

¹³ Mwaka wa mbere wa wathani wa Cairasi mûthamaki wa Babuloni, Cairasi nîwathanire na akiuga hekarû îtumwe rîngî.

¹⁴ Nîmaacokirie indo cia hekarû irîa ciathondeketwe na thaavu na sîlûva. Indo icio ciarî cia gûtûmîrwa hekarûrî, irîa mûthamaki Nebukadinezarû aarutîre hekarûrî ya Jerusalemu na akîthiî agîcigithia hekarûrî ya Babuloni. Mûthamaki Cairasi nîwainenganîre kûrî mûndû wetagwa Sheshibazaru, ûrîa ke aathuurire atuîke mûnene wa vûrûri wa Juda.

¹⁵ Mûthamaki aamwîrire athiî nacio na agaicokie hekarûrî îrîa îrî Jerusalemu, na nîwamwîrire agatume hekarû ya Ngai varîa yarî mbere.

¹⁶ Kwoguo Sheshibazaru nîwaûkire na agîtuma mûcingi wayo kûu Jerusalemu. Gûtumwa kwayo kwîthîrîtwe gûkîthiî na mbere kuuma vîndî îo nginya ûmûnthî. Nwatî hekarû tî ndîkiu gûtumwa.’

¹⁷ “Kwoguo, ethîrwa mûthamaki nîûkwona arî waro, tiga gûtuîrue kûrîa mandîko ma vûrûri wa Babuloni maigîtwe nîguo kûmenyeke kana mûthamaki Cairasi nîwavecanire watho nîguo hekarû ya Ngai îtumwe rîngî gûkû Jerusalemu. Na wamenya, mûthamaki ûtwandîkîre ûrîa ûkwona nîguo waro.”