Ezira 4 - ÎVUKU RÎA ÛVORO MWARO

Kûregana na gûtumwa rîngî gwa hekarû

¹ Nthû cia andû a Juda na Benjamini nîcieguire atî andû arîa maacokire kuuma îthamîriorî nîmaratuma hekarû ya Ngai-Mûnene, Ngai wa Isiraeli rîngî.

² Kwoguo nthû icio nîciathiîre ikîaria na Zerubabeli na anene a nyomba cia andû a Juda na Benjamini na ikîmwîra atîrî, “Twîtîkîrie tûmûtethie, gûtuma hekarû. Tûgoocaga Ngai ûrîa mûgoocana na twîthîrîtwe tûkîmûrutîra magongoona kuuma vîndî îrîa ya Esarihadoni mûthamaki wa Asîria atûretire gûkû tûtûûre kuo.”

³ Zerubabeli, Jeshua, na anene a nyomba cia andû a Juda na Benjamini nîmaamacokerie atîrî, “Tûtikwenda ûtethio wenyu wa gûtuma hekarû ya Ngai-Mûnene, Ngai wetû. Nîtûkûmîtuma tue ene, wata ûrîa Cairasi mûthamaki wa Perisia aatwathire.”

⁴ Nao andû arîa matûûraga vûrûrirî ûcio nîmaageririe gûtûma andû a Juda mathirwa nî vinya na metigîre gûtuma.

⁵ Nîmaacokire makîrîva anene a thirikari ya Perisia mbeca nîguo macûkangie mîvango yao. Meekarire magîkaga ûguo îvinda rîonthe rîrîa Cairasi eethîrwe arî mûthamaki wa Perisia nginya îvinda rîa wathani wa Dario.

Kûregana na gûtumwa rîngî gwa îtûûra rîa Jerusalemu

⁶ Rîrîa Ahasuerusi aambîrîrie kwathana arî mûthamaki, nthû nîciandîkire maarûa ikîthitanga andû a Juda na a Jerusalemu.

⁷ Rîrîa Aritakiserikise aatuîkire Mûthamaki wa Perisia, Bishilamu Mithiredathi, Tabeeli, na arata ao nîmaandîkîre mûthamaki maarûa. Maarûa îo yandîkirwe na rûthiomi rwa Gîsuriata na ikîthomwa îgîtaûrwa nîyataûragwa na Kîhibirania.

⁸ Rehumu ûrîa warî mûnene wa athigari, na Shimushai ûrîa warî mwandîki, wa nao nîmaandîkire Aritakiserikise maarûa ya kûthitanga andû a Jerusalemu. Nayo maarûa îo yandîkîtwe atîrî,

⁹ “Maarûa îno yumîte kûrî mûnene Rehumu, na Shimushai ûrîa mwandîki, na andû arîa engî arata ao. Kuuma kûrî atirîrîri vûrûri na anene onthe a andû kuuma Perisia, Ereki na Babuloni, na Susa îrîa îrî vûrûrirî wa Elamu,

¹⁰ wa vamwe na mavûrûri marîa Osinapari mûthamaki ûrîa warî mûnene na mûtîîe aarutîte mavûrûrirî mao makîthiî gûtûûra îtûûrarî rîrîa rînene rîa Samaria, na vûrûri ûrîa wîngî ûrî mûringo wa Rûnjî rwa Farati mwena wa îthûîro.”

¹¹ Maarûa îno yekariî ta û: “Kûrî mûthamaki Aritakiserikise, kuuma kûrî ndungata ciake irîa irî mûringo ûcio wîngî wa Rûnjî rwa Farati mwena wa îthûîro.

¹² “Nîtûkwenda we mwathi wetû ûmenye atî Ayahudi arîa maaumire mavûrûrirî marîa mengî maku na magîûka gûkû nîmaathiîre Jerusalemu na magîtûûra kuo. Andû acio nîmaambîrîrîtie gûtuma rîngî îtûûra rîu rîaganu na rîareganire nawe. Nîmaratuma nthingo ciarîo rîngî wa vamwe na mîcingi na marî vakuvî kûirîkia.

¹³ Mwathi wetû, ethîrwa îtûûra rîîrî nîrîgûtumwa rîngî na nthingo ciarîo itumwe irîke, andû acio nîmagûtiga kûrîva gooti irîa irîvagwa. Nacio mbeca irîa itonyaga mûthithûrî wa vûrûri nîikûnyiva.

¹⁴ Nîûndû nî wîra wetû kwathîkîra thirikari, tûtingîenda kwona mûthamaki atagûtîîwa. Kwoguo nîtwandîka maarûa îno nîguo tûkûmenyithie we mûthamaki wetû,

¹⁵ nîguo wathane gûtuîrue mandîkorî ma athamaki arîa maarî kuo mbere yaku. Mandîkorî mau nîûkwona atî îtûûra rîîrî rîthîrîtwe rîkîregana na athani na kuuma tene rîthîrîtwe rîkîthînia athamaki na anene arîa maathanaga mavûrûrirî marîa mathagwa nî ûthamaki wa Perasia. Andû a kuo tî athîki na kîu nîkîo gîatûmire rîcûkangua.

¹⁶ Kwoguo nîtûgûkûmenyithia atî, ethîrwa îtûûra rîîrî rîa Jerusalemu nîrîgûtumwa rîngî na nthingo ciarîo irîke, mwathi wetû mûthamaki ndûkaavota kwatha vûrûri ûrîa ûrî mûringo wa rûnjî rwa Farati mwena wa îthûîro.”

¹⁷ Mûthamaki Aritakiserikise nîwandîkire macokio atîrî, “Kûrî mûnene Rehumu, na Shimushai ûrîa mwandîki wa vûrûri, na arata ao arîa matûûraga Samaria na mwena ûcio wîngî wa îthûîro wa Rûnjî rwa Farati, nînamûkethia.

¹⁸ “Maarûa îrîa mwatûmire kûrî tue nîyataûrirwe na nînathomerwe yo.

¹⁹ Nînavecanire watho atî gûtuîrue waro. Na gwatuîrua nîkwamenyekanire atî kuuma tene Jerusalemu îthîrîtwe îkîregana na athamaki na nîkuo kwîthagîrwa na maûndû marîa macûku ma gûcûkia thirikari.

²⁰ Jerusalemu kwîthîrîtwe kûrî na athamaki marî vinya na makîatha vûrûri wonthe ûrîa ûrî mûringo wa Rûnjî rwa Farati na mwena wa îthûîro. Nî maaûnganagia gooti cia mîthemba yonthe.

²¹ Kwoguo athana uge andû acio matige kûruta wîra wa gûtuma rîngî îtûûra rîu nginya rîrîa ngaavecana watho.

²² Menyerera wîke ûguo wa rîmwe nîûndû wa wagîrîru wa thirikari.”

²³ Rîrîa maarûa îno kuuma kûrî mûthamaki yathomerwe Rehumu, Shimushai ûrîa mwandîki, na arata ao, nîmaathiîre Jerusalemu na îvenya na magîtûmagîra vinya nîmeerire Ayahudi matige gûtuma îtûûra rîa Jerusalemu rîngî.

Wîra wa gûtuma hekarû nîwambîrîrie rîngî

²⁴ Wîra wa gûtuma hekarû nîwarûngamire. Naguo warûngamire nginya mwaka wa kaîrî wa Dario kuuma atuîka mûthamaki wa Perasia.