Ezek 9 - ÎVUKU RÎA ÛVORO MWARO

Jerusalemu nîyaverithirue

¹ Nînacokire ngîgua Ngai augîrîria na mûgambo mûnene akiuga atîrî, “Arîa makûthiî kûverithia îtûûra rînene nîmaûke vakuvî wa mûndû anyitîte indo ciake cia mbaara.”

² Wa rîmwe nîgwaûkire andû atandatû maumîte mwena wa kîvingo Kîam îgûrû kîrîa kîroretie mwena wa rûgûrû. Wa mûndû nîwanyitîte indo ciake cia mbaara. Maarî na mûndû wekîrîte nguo mbaro arî na kîndû gîa kwandîka. Nîmaatonyire hekarûrî na makîrûngama vakuvî na metha ya kîgongoona ya gîcango.

³ Riiri wa Ngai wa Isiraeli nîwaumîte îgûrû kûrî Akerubi kûrîa wekaraga na ûkathiî kîvingorî gîa hekarû. Ngai nîwacokire agîta mûndû ûrîa wekîrîte nguo mbaro na warî na kîndû gîa kwandîka

⁴ na akîmwîra atîrî, “Vîtûkanîria îtûûrarî rîonthe rîa Jerusalemu na wîkîre rûûri mothiûrî ma andû onthe arîa maracaya na mararîra nîûndû wa maûndû marîa macûku marekwa îtûûrarî.”

⁵ Wa nthikîrîrîtie nîwerire acio engî atîrî, “Mûrûmîrîre kûu îtûûrarî na mûrage andû. Mûtigatigarie mûndû wanarî ûmwe kana mwîguîre mûndû wana ûrîkû ntha.

⁶ Ûragani athuuri arîa akûrû na arîa anini, mûrage anake na erîtu, ciana na aka, nwatî mûtikavutie mûndû ûrî na rûûri ûthiû wake. Ambîrîriani hekarûrî yakwa.” Kwoguo nîmaambîrîrie kûraga athuuri arîa maarî mbere ya hekarû.

⁷ Nîwacokire akîmera atîrî, “Gwatiani hekarû mûgiro, na kûu kîvarorî Kîamyo mûgwîcûrie ciimba. Thiîni rîu!” Kwoguo nîmaathiîre na makîambîrîria kûraga andû îtûûrarî.

⁸ Na rîrîa maaûragaga andû, nînatigirwe nîrî nienga na nînegwîthirie ngîturumithia ûthiû wakwa nthî na ngîrîra ngiugaga atîrî, “Ûûi Ngai-Mûnene, nîkwa ûkûthiria andû onthe a Isiraeli arîa matigarîte ûgîtûrûrîra Jerusalemu marakara maku?”

⁹ Nake nîwanjokerie atîrî, “Mavîtia marîa mekîtwe nî nyomba ya Isiraeli na Juda nî meengî mûno. Vûrûri wîcûrîtwe nî ûragani, na îtûûrarî nakuo gûtirî maûndû marekwa na njîra ya kîvooto. Maugaga atî, nie Ngai-Mûnene nîndiganîrîtie vûrûri wao na atî ndimonaga.

¹⁰ Kwoguo nie, ndikaamarekera kana nîmeguîra ntha. Ngaamaverithia kûringana na ûrîa mekîte.”

¹¹ Mûndû ûrîa wekîrîte nguo mbaro, na warî na kîndû gîa kwandîka nîwacokire akîthiî akîra Ngai-Mûnene atîrî, “Nîneka wata ûrîa ûrambathîte mbîke.”