Ezek 42 - ÎVUKU RÎA ÛVORO MWARO

Nyomba igîrî ciarî vakuvî na hekarû

¹ Mûndû ûrîa nîwacokire akîmbira kîvarorî Kîam mwena wa nja nginya nyombarî yarî mwena wa rûgûrû wa hekarû. Nyomba îo yarî vakuvî na nyomba îrîa yarî mwena wa îthûîro wa hekarû.

² Nyomba îno yarî ya ûraca wa mita mîrongo îtano (50) na wariî wa mita mîrongo îîrî na ithano (25).

³ Mwena ûmwe yerekerete kîvaro Kîam wariî wa mita îkûmi Kîamrî kîraca wata ûraca wa hekarû, na mwena ûcio wîngî yerekerete gacîra ga kîvaro Kîam mwena wa nja. Nyomba îno yarî na ngorova ithatû, wa ngorova îgûrû rîa îrîa îngî.

⁴ Mwena wa rûgûrû wa nyomba îno vaarî na gacîra ka wariî wa mita ithano (5) na ûraca wa mita mîrongo îtano (50). Mîrango ya yo yaroretie mwena wa rûgûrû.

⁵ Tûnyomba twa ngorova ya îgûrû twarî tûceke gûkîra twa ngorova ya gatagatî na ya nthî nîûndû nîtwacokete na mwena wa nja makîria.

⁶ Nyomba cionthe ciatumîtwe irî na ngorova ithatû na itiatirîrîtwe na itugî ta nyomba irîa ciîngî ciarî kîvarorî kîu.

⁷ Kwarî na rûthingo rwarî gatagatî ka nyomba icio na kîvaro Kîam mwena wa nja rwa ûraca wa mita mîrongo îîrî na ithano (25).

⁸ Rûthingo rwa nyomba irîa ciarî mwena wa nja wa kîvaro rwarî rwa ûraca wa mita mîrongo îîrî na ithano (25), naruo rwa nyomba irîa cierekerete hekarû rwarî rwa mita mîrongo îtano (50).

⁹ Kwarî na gacîra ga gûtonya nyombarî ino kaarî mwena wa îrathîro kuuma kîvarorî Kîam mwena wa nja,

¹⁰ varîa rûthingo rwa mwena wa nja rwambîrîrîtie. Mwena wa îveti wa hekarû kwarî na nyomba îngî yaroretie na mwena wa kîvaro.

¹¹ Mbere ya nyomba icio kwarî na mûromo wa gûtonyerera warî na wariî, ûraca, na mûthondekere wata ûrîa warî mwena wa rûgûrû.

¹² Mûromo wa gûtonya nyombarî cia mwena wa îveti warî mûthiiarî wa gacîra mwena wa îrathîro varîa rûthingo rwambîrîrîtie.

¹³ Mûndû ûcio nîwambîrire atîrî, “Nyomba ino irî mwena wa rûgûrû na ino irî mwena wa îveti cionthe nî ntheru. Athînjîri-Ngai arîa matungataga Ngai-Mûnene nîkuo makarîcagîra matega marîa matheru, na kwigagwe matega marîa matheru mûno. Matega mau nî ma irio cia mîgûnda, matega ma kûtheria mevia na matega ma kûrîvîra mevia nîûndû nî vatheru.

¹⁴ Rîrîa athînjîri-Ngai mauma hekarûrî na nîmarenda kûthiî nja kîvarorî, nwanginya marute nguo irîa ntheru megûtungataga nacio maitige nyombarî ino. Nwanginya mekîre nguo ciîngî cia kûthiî nacio kûrî andû.”

Ithimo cia kîvaro gîa hekarû

¹⁵ Mûndû ûcio arîkia kûthima mwena wa ndarî wa hekarû, nîwandutire nja ambîtûkîrîrîtie mûromorî wa mwena wa îrathîro na akîthima mwena wa nja wa hekarû.

¹⁶ Nîwathimire mwena wa îrathîro na kîndû kîrîa aavûthagîra gîa kûthima, naguo warî wa mita magana maîrî ma mîrongo îtano (250).

¹⁷ Nîwacokire akîthima mwena wa rûgûrû mita magana maîrî ma mîrongo îtano (250).

¹⁸ Naguo mwena wa îveti warî wa mita magana maîrî ma mîrongo îtano (250).

¹⁹ Nîwacokire akîthima mwena wa îthûîro mita magana maîrî ma mîrongo îtano (250).

²⁰ Kwoguo rûthingo rûu rwagaanîtie vandû varîa vatheru na varîa vatarî vatheru. Mîena yonthe yarî na ithimo cieganene: mita magana maîrî na mîrongo îtano (250).