Ezek 33 - ÎVUKU RÎA ÛVORO MWARO

Ngai nîwathuurire Ezekieli atuîke mûrangîri

¹ Ngai-Mûnene nîwambîrire atîrî,

² “Mûndû, arîria andû enyu na ûmere atî, vûrûrirî mûna kûngîgîa mbaara, nwa ndûme andû a vûrûri ûcio mathuure mûndû ûmwe gatagatî kao atuîke mûrangîri wao.

³ Mûndû ûcio angîona nthû ciûkîte vûrûrirî ûcio nwa avuve karumbeta nîguo amenyithie andû.

⁴ Mûndû angîgua karumbeta ka mbaara na arege kwîmenyerera na mbaara yumîre na mûndû ûcio aûragwe, nîke ûgaacokererwa nî gîkuû gîake ke mwene.

⁵ Nîweguire mûgambo wa karumbeta na nîwaregire kwîmenyerera, kwoguo nîagaacokererwa nî gîkuû gîake. Nwatî kethîrwa nîwemenyerere, nîangîavonokirie mwoyo wake.

⁶ Nwatî mûrangîri angîona nthû ciûkîte na arege kûvuva karumbeta andû mamenyithue, nthû ciaûka nîikaûraga andû nîûndû wa mevia mao, nwatî gîkuû Kîam andû acio gîkaarîvua mûrangîri.

⁷ “Kwoguo, we mûndû, nîngûthuurîte ûtuîke mûrangîri wa andû a Isiraeli. Vîndî cionthe ûngîkegua kiugo kuuma kanyuarî gakwa, ûgakaania andû a Isiraeli ûrîa ngaakwîra ûmakaanie.

⁸ Nîngîkera mûndû mwaganu atî nî agaakua, ûkaamwîra guo. Ûngîkaarega kûmûkaania nîguo atige mîthiîre yake ya waganu, mûndû ûcio nîagaakua nîûndû wa mevia make nawe nîngaakûrîvia gîkuû gîake.

⁹ Nwatî ûngîkaania mûndû mwaganu nîguo atige mîthiîre yake ya waganu na arege, nîagaakua nîûndû wa mevia make nawe nîûkaavonokia mwoyo waku.”

Wa mûndû na wîra wake

¹⁰ “We mûndû îra andû a Isiraeli marauga atî, ‘Tûrî aritûvîre nî mavîtia na mevia metû na nîmo maratûthiria. Tûngîtûûra mwoyo atîa?’

¹¹ Meere atî wata ûrîa nie Ngai-Mûnene Ngai ndûûraga mwoyo, ndikenagua nî gîkuû Kîam mûndû mwîvia, nwatî mendaga mûndû mwaganu agarûrûke atige mîthiîre yake na atûûre mwoyo. Mue andû a Isiraeli mûrenda gûkua nîkî? Garûrûkani mûtige maûndû menyu ma waganu.

¹² “Nawe mûndû arîria andû enyu ûmere atî mûndû mûthingu angîvîtia, ûthingu wake ndûngîmûvonokia. Nake mûndû mwaganu angîtiga waganu, ndakaaverithua. Mûndû mûthingu angîtiga ûthingu wake acoke kwîvia ndagaatûûra mwoyo.

¹³ Nwa mbîre mûndû ûrîa mûthingu atî nama nîagaatûûra mwoyo. Nwatî angîîvoka ûthingu ûcio wake na acoke gwîka maûndû macûku, maûndû make ma mbere ma ûthingu matikaaririkanwa. Agaakua nîûndû wa mevia make.

¹⁴ Wana rîngî nwambîre mûndû mwaganu atî, ‘Nama we nîûgaakua.’ Kûnarî ûguo angîgarûrûka atige kwîvia na acoke gwîka maûndû ma kîvooto na marîa magîrîru,

¹⁵ kethîrwa mûndû ûcio mwaganu nwa acokie kîndû kîrîa eeranîre na acokie indo irîa acunanîte na vinya na acoke arûmîrîre watho, mûndû ûcio ndagaakua nwatî nîagaatûûra mwoyo.

¹⁶ Mevia marîa eekîte mbere matigacoka kûririkanwa, ke nîekîte maûndû ma kîvooto na magîrîru, nama mûndû ûcio nîagaatûûra mwoyo.

¹⁷ “Kûnarî ûguo andû enyu maugaga atî maûndû marîa Mwathani ekaga tî maro. Kinthî tî o mekaga maûndû matarî maro.

¹⁸ Mûndû mûthingu angîtiganîria ûthingu wake na acoke gwîka maûndû macûku, nîagaakua nîûndû wa mavîtia mau.

¹⁹ Vîndî îrîa mûndû mwaganu agarûrûka atiga waganu wake na acoka gwîka maûndû maro na magîrîru, nîagaatûûra mwoyo nîûndû wamo.

²⁰ Nwatî mue andû a Isiraeli mugaga atî, ‘Njîra cia Mwathani tî cia kîvooto.’ Ngaatuîra wa mûndû kûringana na mîthiîre yake.”

Ndûmîrîri îgiî kûgwa kwa Jerusalemu

²¹ Mûthenya wa gatano wa mweri wa îkûmi, mwaka wa îkûmi na îîrî kuuma twavirwa îthamîriorî, mûndû ûmwe nîwaûrire akiuma Jerusalemu agîûka akîmbîra atî, îtûûra rînene rîa Jerusalemu nîrîgwîu.

²² Kîvwaî mbere ya mûndû ûcio aûka nînagîte na vinya wa Ngai-Mûnene. Kwoguo rîrîa mûndû ûcio waûrîte aûkire kîraûko Kîam mûthenya ûcio warûmîrîrîte, Ngai-Mûnene nîwamûvere ûvoti wa kwaria.

Mevia ma andû

²³ Ngai-Mûnene nîwambîrire atîrî,

²⁴ “Mûndû, andû arîa matûûraga matûûrarî marîa momomoku vûrûrirî wa Isiraeli maugaga atî, ‘Iburahimu aarî mûndû ûmwe tu, na vûrûri ûyû wonthe warî wake. Tue tûrî eengî na kwoguo tûrîave vûrûri ûyû ûtuîke wetû.’

²⁵ “Kwoguo meere nie Ngai-Mûnene nîramera atî: Nîmûrîcaga nyama irî na nthakame, mûkavoya ngai cia mîvuano na mûkaûragana. Mûrona vûrûri ûyû wagîrîrwe nîgûtuîka wenyu?

²⁶ Mwîvokaga indo cienyu cia mbaara, na mûgeka maûndû marîa marî mûgiro. Arûme mekaga maûndû ma ûtharia na aka a andû arîa mariganîtie nao. Mûreciria nwa mûvewe vûrûri ûyû ûtuîke wenyu?

²⁷ “Marîrie na ûmere nie Ngai-Mûnene nîrauga atî: Wata ûrîa ndûûraga mwoyo, andû acio onthe matûûraga matûûrarî mau momomoku nîmakaaûragwa. Arîa marî mîgûndarî makaarîwa nî nyamû cia kîthaka; na arîa marî kûndû kûrîa kûgitîre na ngurungarî makaaûragwa nî mîrimû mîcûku.

²⁸ Ngaatûma vûrûri ûtuîke werû na ûtarî kîndû. Vinya wao ûrîa metîîaga naguo nîûkaathira. Irîma cia Isiraeli ikeethîrwa irî werû mûcûku mûno na gûtirî mûndû ûkaavîtûkîra kuo.

²⁹ Rîrîa ngaatûma vûrûri ûtuîke werû nîûndû wa maûndû marîa marî mûgiro meekire, nîmakaamenya atî nie nînie Ngai-Mûnene.”

Maciaro ma ndûmîrîri ya mûrathi

³⁰ Ngai-Mûnene nîwambîrire atîrî, “Mûndû, andû enyu maranagîria o ene ûvoro ûkwîgiî rîrîa mekarîte ngitorî na mîromorî ya nyomba ciao makiugaga: ‘Tûthiîni tûkegue ûvoro ûrîa ûkîte kuuma kûrî Ngai-Mûnene.’

³¹ Andû maûkaga kûrî we marî ikundi na magekara nthî mbere yaku ta andû akwa nîguo megue ûrîa ûkûmera, nwatî matiîkaga ûrîa wamera meke. Maugaga na tûnyua twao atî marî na wendani, nwatî kîrîa macaragia na ngoro ciao nî ûrîa makûgîa na indo.

³² Kûrî o wîkariî ta mûndû ûrî na mûgambo mwaro wa kwina nyîmbo cia gûkenia andû na akîvûraga kînanda waro mûno, nîûndû andû nîmegucaga ûrîa ûkuga, nwatî matiîkaga ûrîa wamera.

³³ Rîrîa maûndû mama mageekîka, na nwanginya mageekîka nîmakaamenya atî mûrathi aarî kwao.”