Ezek 31 - ÎVUKU RÎA ÛVORO MWARO

Vûrûri wa Misiri ûringithanîtue na mûtî wa mûtarakwe

¹ Mûthenya wa mbere mweri wa kathatû, mwakarî wa îkûmi na ûmwe kuuma twavirwa îthamîriorî, Ngai-Mûnene nîwambîrire atîrî,

² “Mûndû, ûria mûthamaki wa Misiri wa vamwe na andû ake onthe: Nî ûrîkû angîringithanua nake nîûndû wa ûnene wake?

³ Nîngûringithania na mûtî wa mûtarakwe wa Lebanoni, ûrîa ûrî mvûa mbaro na ûrî kîruru Kîamro. Nî mûtî mûraca mûno ûkinyîte maturî.

⁴ Manjî nîmaaûrerire na ûgîkûra, manjî ma kûu nthî kûriku nîmaatûmire ûracave na îgûrû. Nyûnjî nîcietîrîrie manjî varîa wavandîtwe, na nîcianyûrûrûkirie manjî kûrî mîtî yonthe ya mûtitû.

⁵ Kwoguo mûtî ûcio nîwaracavire na îgûrû, gûkîra mîtî yonthe ya mûtitû. Mvûa ciaguo nîciengîvire na ikîneneva, nîûndû wa manjî marîa magîcaga mîrirî yaguo.

⁶ Iconi cionthe cia rîerarî, nîciatumire ciomba mvûarî cia mûtî ûcio. Nyamû cionthe cia kîthaka, nîciaciarîre twana rungu rwa mvûa ciaguo. Ndûrîrî cionthe irîa nene ciekaraga rungu rwa kîruru Kîamguo.

⁷ Mûtî ûcio warî mûthaka na mûnene. Warî na mvûa nene na warî mûraca na îgûrû, nîûndû mîri yaguo nîyathiîte na nthî, nginya kûrîa kûrî na manjî meengî.

⁸ Gûtirî mûtî wa mûtarakwe mûgûndarî wa Ngai, ûngîaringithanirue naguo, kana mîtî ya mîcindanûgû îringithanue na mvûa cia guo. Gûtirî mûtî mûgûndarî wa Ngai, ûngîaringithanirue naguo.

⁹ Nînaûtwire mûtî mûthaka, nîûndû warî na mvûa nyîngî. Nayo mîtî yonthe îrîa yarî mûgûndarî ûcio, nîyawîgucagîra wîru.”

¹⁰ Ngai-Mûnene arauga atîrî, “Mûtî ûcio nîwanenevire na ûkîracava na îgûrû mûno, naguo nîwaîtîire nîûndû wa ûraca waguo.

¹¹ Kwoguo nînîûregete, na nîngûûnenganîra kûrî mûnene wa vûrûri mûgeni, nake nîakaawîka kûringana na waganu waguo.

¹² Andû aganu mûno kuuma mavûrûri mageni nîmagaaûtema ûgwe nthî na maûtiganîrie. Mvûa ciaguo ikaagwa irîmarî na igwe ciandarî cionthe. Namo mathangû maguo nîmakaanyagania nyûnjîrî cionthe vûrûrirî ûcio. Andû onthe a nthî nîmakaauma kîrururî Kîamguo na maûtiganîrie.

¹³ Iconi cionthe cia rîerarî nîikaagûcaga mûtîrî ûcio mûgûu nthî, nacio nyamû cionthe cia kîthakarî nîigaakinyangaga mvûa ciaguo.

¹⁴ Ûguo wekîkire nîguo gûtikagîe mûtî wana ûrîkû ûrîa ûmerete vakuvî na manjî ûkaaracava na îgûrû ûkinyîra matu. Nîûndû mûthiia wa indo cionthe nî gûkua, wana andû nîmagaakua na mathiî kwa arîa akuû.”

¹⁵ Ngai-Mûnene arauga atîrî, “Mûthenya ûrîa mûtî ûcio wa mûtarakwe ûkaathiî kwa arîa akuû, nîngaatûma ûcakaîrwe. Nîngaacoka ngirie nyûnjî na maria iwîtîrîria manjî. Mûtî ûcio nîûkaaûma nakîo kîrîma Kîam Lebanoni nîgîkaagîa nduma nayo mîtî yonthe îrîa îrî mûgûndarî nîkaûma nîûndû waguo.

¹⁶ Rîrîa ngaaikia mûtî ûcio kwa arîa akuû, mûrurumo waguo ûkîgwa vamwe na arîa makaathiî îrimarî rîrîa rîtarî mûthiia, nîûgaatûma mavûrûri mainaine. Mîtî yonthe ya Edeni, na mîtî îrîa mîaro mûno na îtagîrîrua manjî ya mûtitû wa Lebanoni nîgaakena nîûndû wa kûgwa kwa mûtî ûcio wa mûtarakwe.

¹⁷ Mîtî îo nîkaanyûrûrûkua vamwe naguo îkîthiî kwa arîa akuû îkanyitanîre na arîa maaûragîtwe vîndî ya mbaara wa vamwe na andû arîa meekaraga rungu rwa kîruru Kîamguo.

¹⁸ “Kûrî mûtî wîngî mûgûndarî wa Edeni ûngîringithanua na mûtî ûcio nîûndû wa riiri na ûnene waguo? Mûtî ûcio ûgaaikua vamwe na mîtî ya mûgûnda wa Edeni kwa arîa akuû. Ûgeekarania kûu na andû arîa mataicî Ngai, na arîa maaûragirwe vîndî ya mbaara. Mûtî ûcio nîwe mûthamaki wa Misiri vamwe na andû ake. Ûguo nîguo Ngai-Mûnene Ngai augîte.”