Ezek 24 - ÎVUKU RÎA ÛVORO MWARO

Thuvuria îrî na Nganga

¹ Mûthenya wa îkûmi mweri wa îkûmi, mwaka wa kenda kuuma twavirwa îthamîriorî, Ngai-Mûnene nîwambîrire atîrî,

² “Mûndû, andîka rîîtwa rîa mûthenya wa ûmûnthî. Nîûndû ûmûnthî nîguo mûthenya ûrîa mûthamaki wa Babuloni ambîrîria kûrigicîria îtûûra rîa Jerusalemu arîtharîkîre.

³ Arîria andû acio akwa aremi na ngerekano ûmeere nie Ngai-Mûnene nîrauga atî; Igîrîra thuvuria îgûrû rîa riiko rîrî na mwaki na ûmîcûrie manjî.

⁴ Îkîra inuku cia nyama irîa mbaro kûu thuvuriarî, inuku cionthe irîa mbaro cia ciaû na ituro. Îkîra mavîndî marîa maro wanamo.

⁵ Oca nyama cia ng'ondu îrîa mbaro, îkîra ngû rungu rwa thuvuria; itherûkie waro, therûkia nginya mavîndî. ”

⁶ Kwoguo Ngai-Mûnene arauga atîrî, “We îtûûra rîîrî rîa aûragani, kaî ûrî na thîna-î! Îtûûra rîîrî rîkariî ta thuvuria îrî na kutu îtangîthira. Inuku cia nyama irutagwa thuvuriarî kîmwe gwa kîmwe itakûthuurûkanua.

⁷ Nîûndû kûu îtûûrarî kûrî na ûragani. Nthakame ndîetûrûrwa nthî naarî îkunîkîrwe nî mûthetu, yetûrûrirwe îthigarî.

⁸ Nthakame îo meetûrûrire nîmîtigîte wa kûu îthigarî îtarî ngunîkîre nîguo mbakanwe nî marakara nîrîvîrîrie.”

⁹ Kwoguo nie Ngai-Mûnene Ngai nîrauga atîrî, “Îtûûra rîîrî rîcûrîtwe nî ûragani kaî rîrî na thîna-î! Wananie nîngaaiga kuo kîrûndo kînene Kîam ngû.

¹⁰ Ngaaûmbanîrîra mîgogo, mbakie mwaki, ntherûkie nyama waro, thuvu ûvwe, namo mavîndî mavîe mathire.

¹¹ Nîngaacoka mbigîrîre thuvuria îtarî na kîndû riiko rîrî na mwaki îvîe mûno, cuuma yayo ya gîcango îvîe nî mwaki nîguo gîko kîrarûke nacio nganga ivîe ithire.

¹² Nwatî nîrenogia mana nîûndû nganga icio itingîthirua nî mwaki.

¹³ Ciîko ciaku cia ûmaramari we Jerusalemu nîcio ikûgwatîtie mûgiro. Nageririe gûkûtheria ûkîrema. Kwoguo nîwîkara ûtarî mûtheru nginya rîrîa ûkegua ûrito wa marakara makwa.

¹⁴ Nie Ngai-Mûnene nînie mbugîte ûguo. Îvinda nîkinyu rîa kûvingia ûrîa mbugîte. Ndikeericûkwa na ndigaakwîguîra ntha. Ngaagûtuîra ciira kûringana na mîthiîre yaku na ciîko ciaku.” Ûguo nîguo Ngai-Mûnene Ngai augîte.

Mûka wa Mûrathi nîwakwire

¹⁵ Ngai-Mûnene nîwambîrire atîrî,

¹⁶ “We mûndû, taroria, nîngûringa mûndû ûrîa wendete nîmûrute kuuma kûrî we. Kûnarî ûguo, ndûgacakaa kana ûrîre, kana wîtûrûre methori.

¹⁷ Caa ûtakugîrîria, na ndûgacakaîre ûrîa ûkuîte. Îyove kîremba na wîkîre iratû magûrû. Ndûgekunîke ûthiû na ndûkarîe irio irîa irîcagwa vîndî ya macakaya.”

¹⁸ Kwoguo, kîraûko nînaririe na andû, na kîvwaî mûka wakwa nîwakwire. Kîraûko Kîam mûthenya ûcio warûmîrîrîte nînekire wata ûrîa nathîtwe.

¹⁹ Nao andû nîmaambûririe atîrî, “Ûgîka ûndû ûyû ûrenda gûtwonia atîa?”

²⁰ Nînamacokerie atîrî, “Ngai-Mûnene nîwambîrire

²¹ mbîre andû a Isiraeli atî nîmwîtîîaga na ûnene wa hekarû yake, nîmûmîriragîria na nîmûkenaga nîyo mûno mûkîmîona. Ngai-Mûnene nîakagwatia nyomba îo mûgiro na ciana cienyu cia anake na cia erîtu irîa mwatigire vuva, ikaaûragwa na rûviû.

²² Mûgeeka wata ûguo nie nekire. Mûtigekunîke mothiû menyu kana mûrîe irio irîa irîcagwa vîndî ya macakaya.

²³ Mûgeekîra iremba ciongorî cienyu, na mwîkîre iratû magûrû menyu, mûtigaacakaa kana mûrîra. Nwatî nîûndû wa mevia menyu nîmûkaagîa na kîeva na wa mûndû nîagacakaagîra mûndû ûrîa wîngî.

²⁴ Ezekieli nîagaatuîka rûûri kûrî mue. Mûgeeka maûndû monthe kûringana na ûrîa ke eekire. Rîrîa maûndû mau makaavinga nîmûgaacoka kûmenya atî nînie Mwathani Ngai-Mûnene.”

²⁵ Ngai-Mûnene nîwambîrire atîrî, “Mûndû, kûrî mûthenya ngaamacuuna kîrîa moonaga arî kîo gîa kûmagitîra, gîkeno Kîamo na riiri wao, kîrîa meriragîria na metho mao na ngoro ciao na nîmacune ciana ciao cia anake na cia erîtu.

²⁶ Mûthenya ûcio mûndû ûrîa ûkaavonoka nî agaaûka akûretere ndûmîrîri îo.

²⁷ Mûthenya wa ûcio nîûkaavota kwarîria mûndû ûrîa ûkaavonoka na ndûkaaremwa nî kwaria rîngî. Nawe nîûgaatuîka rûûri kûrî o, na nîmakaamenya atî Nie nînie Ngai-Mûnene.”