Ezek 22 - ÎVUKU RÎA ÛVORO MWARO

Mavîtia ma îtûûra rîa Jerusalemu

¹ Ngai-Mûnene nîwambîrire atîrî,

² “We mûndû, nîûgaatuîra ciira îtûûra rîîrî rîcûrîte aûragani? Rîmenyithie maûndû monthe marîa marî mûgiro rîaneka.

³ Îra îtûûra rîu Ngai-Mûnene arauga atî, we nîûragaga andû aku na nîwîgwatagia gîko na njîra ya kûvoya mîvuanano, kwoguo îvinda rîaku nîrîkinyu.

⁴ We ûrî na mavîtia nîûndû wa nthakame îo wîtûrûrithîtie, na ûkegwatia gîko na njîra ya mîvuanano îo wîrûthîrîte. Nîûtûmîte mîthenya yaku înyivanyive, nayo mîaka yaku îgeere kûthira. Kwoguo nîndûmîte ûmenwe nî ndûrîrî na ngatûma ûnyararwe nî mavûrûri monthe.

⁵ Mavûrûri marîa marî gûkuvî nawe na marîa marî kûraca nawe, nîmagaakûthekerera nîûndû ûrî îgweta îcûku, na ûrî wa înegene.

⁶ Anene a Isiraeli arîa marî kûrî we, wa mûnene kûringana na vinya wake mendaga wa kûûragana.

⁷ Îthe na ng'ina wa mûndû arîa marî kûrî we mativecagwa gîtîîo. Mûgeni ûrîa ûtûûraga gwaku, nîacunagwa indo ciake. Nacio ciana cia ngoriai na aka a ndigwa nîmoonagîrwa.

⁸ Nîmûnyararîte indo ciakwa irîa ntheru na mûkarega gûtîîa thavatû ciakwa.

⁹ Kûrî na andû marî ndarî yaku maragia maûndû ma maveeni megiî andû arîa engî nîguo maûragwe, na andû engî marîcaga irio irîa irutîrîtwe mîvuanano irîmarî; mekaga maûndû ma ungumania wa ûkîonaga.

¹⁰ Gwaku kûrî arûme amwe mamamaga na aka a methe mao, na kûrî nao manyitaga aka rîrîa marî îvindarî rîao rîa mweri.

¹¹ Amwe nîmekaga maûndû ma waga nthoni na aka a andû arîa mariganîtie nao, na engî mageka maûndû ma ûtharia na aka a avîcî ao. Andû engî gatagatîrî kenyu nîmekaga maûndû ma ûtharia na aa mwarwang'ina.

¹² Andû amwe enyu nîmetagia mavaki nîguo maûrage andû engî. Na engî nîmetagia umithio wa indo irîa makombithîtie andû ao, magacuuna andû indo na magetongia na njîra îrîa îtagîrîrîte na makariganîrwa Nînie.” Ûguo nîguo Ngai-Mûnene augîte.

¹³ “Nîmbûrithanîtie njara ciakwa nîrî na marakara nîûndû wa indo irîa ûgîte nacio na njîra îtarî na kîvooto, wana nîûndû wa ûragani ûrîa wîkîtwe mbere yaku.

¹⁴ Vîndî îrîa ngaambîrîria gûkûverithia nîûkaagîa na ûmîrîru, kana njara ciaku igîe na vinya? Nie Ngai-Mûnene nînie mbarîtie na nwanginya mbîke ûrîa mbugîte.

¹⁵ Nîngaakûnyagania mavûrûrirî ma andû a ndûrîrî, na maûndû marîa macûku ûrî namo nîmathirie viû.

¹⁶ Namo maûndû marîa ûgeeka nîmagaatûma wîgwatie gîko ndûrîrî icio ikîonaga, nwatî nîûkaamenya atî Nie nînie Ngai-Mûnene.”

Mwaki wa Ngai wa Kûtheria

¹⁷ Ngai-Mûnene nîwambîrire atîrî,

¹⁸ “We mûndû, andû a Isiraeli matuîkîte kîndû gîtarî kîene. Onthe matuîkîte ta cuuma cia gîcango, mavati, cuuma cia ûturi na cuuma irî mwakirî wa kûtheria. Mekariî ta gîko kîrîa kiumaga kûrî sîlûva.

¹⁹ Kwoguo nie Ngai-Mûnene mbugîte atî muonthe mûtuîkîte ta gîko gîa cuuma, kwoguo rîu nîngûmûcokanîrîria vamwe kûu Jerusalemu.

²⁰ Andû maûnganagia cuuma ya sîlûva, gîcango, na cuuma ya mavati na îgekîrwa mwakirî nîguo îrarûrwe na îtherue. Kwoguo nîngaamûngania vamwe nîrî na marakara na mang'ûrîka na mûvîvue na mwaki mûrarûrwe ta ûrîa cuuma îrarûragwa.

²¹ Nîngaamûcokanîrîria vamwe na nîmwakîrie mwaki wa marakara makwa, na nîmûkaararûrwa mûrî kûu îtûûrarî.

²² Wata ûrîa sîlûva îrarûragwa na mwaki, nwaguo mûkaararûrwa mûrî gatagatî ka îtûûra na nîmûkaamenya atî nînie Ngai-Mûnene mbîtûrûrîte marakara makwa kûrî mue.”

Mevia ma Atongoria a Isiraeli

²³ Ngai-Mûnene nîwambîrire rîngî atîrî,

²⁴ “We Mûndû, îra andû a Isiraeli atî vûrûri wao tî mûtheru na kwoguo nînîûverithia nîrî na marakara.

²⁵ Atongoria enyu mekariî ta mûnyambû ûkûrarama ûgîtambururanga nyamû îrîa ûragîte. Maûragaga andû na makamacuna indo ciao cia goro, na nîmatûmîte aka eengî matuîka a ndigwa.

²⁶ Athînjîri-Ngai ao nîmaunîte watho wakwa, na nîmagwatîtie indo ciakwa irîa ntheru mûgiro. Matiîkagîra ngûrani gatagatî ka indo irîa ntheru na irîa itarî ntheru, wana kana mathomithanie ûvoro wîgiî maûndû marîa marî gîko na marîa matarî gîko. Matiathîkagîra thavatû ciakwa, na nîmatûmîte ndega kûvewa gîtîîo gatagatîrî kao.

²⁷ Atongoria ao arîa marî îtûûrarî mekariî ta ciathi irîa itambururangaga nyamû irîa ciûragîte. Maûragaga andû nîguo megîre na ûtonga na njîra îrîa îtarî mbagîrîru.

²⁸ Arathi ao nîmatenderetie ngoro ciao ta ûrîa mûndû avakaga rûthingo cokaa. Monaga cioneki cia maveeni, na makaratha maûndû ma maveeni makiugaga atî nî Ngai-Mûnene warîtie wa rîrîa atarîtie.

²⁹ Andû onthe a vûrûri nîmacunanaga na makaîa na vinya. Nîmanyariraga athîni na ngîa, na makavinyîrîria ageni vatarî kîvooto.

³⁰ Naacaririe mûndû gatagatîrî kao ûrîa ûngîtuma rûthingo na arûngame mbere yakwa vandûrî va andû a vûrûri nîguo ndikamacûkangie, nwatî ndianona wanarî ûmwe.

³¹ Kwoguo nînîmetîrîrîtie marakara makwa. Nîmaavîvîtie na mwaki wa mang'ûrîka makwa kûringana na mavîtia mao ngamathiria.” Ûguo nîguo nie Ngai-Mûnene mbugîte.