Ezek 21 - ÎVUKU RÎA ÛVORO MWARO

Rûviû rwa Ngai-Mûnene

¹ Ngai-Mûnene nîwambîrire atîrî,

² “Mûndû, taroria Jerusalemu. Rathîra kûndû kûrîa andû mathiîcaga nîguo makagooce ûregane nakuo, na ûrathe ûkîregana na vûrûri wa Isiraeli.

³ Îra vûrûri wa Isiraeli atî nie Ngai-Mûnene mbugîte nîngûcomora rûviû rwakwa kuuma njûrarî na mbûrage andû aro wana arîa aganu nîmarute kûrî we.

⁴ Nîûndû ngaamaûraga nîmarute kûrî we arîa aro wana arîa aganu, kwoguo ngaaûraga andû onthe kuuma mwena wa îveti kûthiî mwena wa rûgûrû.

⁵ Nao andû onthe nîmakaamenya atî nie Ngai-Mûnene nacomora rûviû kuuma njûrarî rûtingîcokua kuo rîngî.

⁶ “Na we mûndû, caya; caya ûrî na kîeva na ûrîtwe nî mwîvoko magîkwonaga.

⁷ Na rîrîa magaakûria ûracaya nîkî, ûkaamera ûracaya nîûndû wa ndûmîrîri îrîa yûkîte. Rîrîa ndûmîrîri îo îgaakinya, ngoro cionthe nîigeecûrwa nî guoya na njara ithire vinya. Maroho monthe nîmakaaringîka na maru maregere ta manjî. Nama mûthenya ûcio nîûgûka na nwanginya ûkaavingua.” Ûguo nîguo Ngai-Mûnene augîte.

⁸ Ngai-Mûnene nîwambîrire atîrî,

⁹ “Mûndû, rathîra andû ûvoro ûmere Nie Mwathani mbugîte atî: Rûviû rwa njûra, rûviû rwa njûra nî rûnoore na rûkathûwa.

¹⁰ Rûnooretwe rwa kûragana; rûthûîtwe nîguo rûvenagie ta rûveni! Kûrî na ûndû wa gûkenerera? Andû akwa nîmanyararîte rûthanju Rwa kûverithia mûvîcîwa.

¹¹ Kwoguo rûviû rûnenganîrîtwe nîguo rûthûwe, nîguo rûnyitîke na njara; Rûnooretwe na rûkatherua nîguo rûnengerwe ûrîa ûraganaga.

¹² Mûndû, rîra ûkiugagîrîria, nîûndû rûviû rûu rûnooretwe nîûndû wa andû akwa na atongoria a Isiraeli. Manenganîrîtwe nîguo maûragwe vamwe na andû akwa, Kwoguo îringe kîero!

¹³ Îo ndîkethîrwa îrî njîra ya kûmûgeria, narîo mangîkaanyarara rûthanju rwakwa gûgaatuîka atîa?” Ûguo nîguo Ngai-Mûnene augîte.

¹⁴ “Kwoguo we mûndû, vecana ûrathi! Vûra mvî na ûreke rûviû rûrute wîra maita maîrî, wana rita rîa kathatû. Nî rûviû rwa kûraga andû rûmarigicîrîtie,

¹⁵ nîguo mathirwe nî ûmîrîru na andû eengî mavîngîcîke. Mîîrîgarî yao yonthe nîmvecanîte rûviû rûkûvenia. Rûthûîtwe na rûravenavenia ta rûveni rwîvarîrîtie kûragana.

¹⁶ We rûviû rûrû rûûgî, tema na mwena waku wa ûrîo na ûteme na mwena wa ûmotho! Tema mwena ûrîa ûkwerekerua.

¹⁷ Nie wananie nîngaavûra mvî, na marakara makwa nîmakaathira.” Nie Ngai-Mûnene nînie mbarîtie.

Rûviû rwa Mûthamaki wa Babuloni

¹⁸ Ngai-Mûnene nîwambarîrie rîngî na akîmbîra atîrî,

¹⁹ “We mûndû, thuura njîra igîrî irîa mûthamaki wa Babuloni akaathiîrîra na rûviû rwake. Njîra cioîrî ikaauma vûrûrirî ûmwe. Kîambîrîriarî Kîam njîra nîvo ûkaaiga kîvaû gîa kwonanîrîria mwena ûrîa îtûûra rînene rîrî.

²⁰ Ûgeekîra rûûri rwa kwonia mûthamaki njîra îrîa îthiîte Raba, îtûûra rînene rîa Aamoni. Nîûgekîra rûûri rwîngî rwa kwonania njîra îrîa îthiîte Jerusalemu îtûûrarî rîrîa rîgitîre rîa Juda.

²¹ Nîûndû mûthamaki wa Babuloni akaarûngama varîa njîra itigithanîrîte, Kîammbîrîriarî Kîam njîra icio cioîrî nîguo aragûrie. Nîakainainia mîguî yake, na aûrie kuuma kûrî mîvuanano, na arorie nyama ya îtema.

²² Njararî yake ya ûrîo, gûgaaûka woni wa Jerusalemu. Woni ûcio ûkaamwonia aigithia mîgogo mînene, augîrîrie na mûgambo wa mbaara, aigithie mîgogo mîtungu ya kwomomora ivingo cia Jerusalemu. Nîagetûrûrithia ivumbu nene cia mûthetu ithiûrûrûkîrîtie îtûûra na atume nthingo ndaca na îgûrû cia kûrîrigicîria.

²³ Nwatî andû a Jerusalemu nîmakoona woni ûcio ûrî wa maveeni nîûndû nîmaaîvîtire na kinyi. Kûnarî ûguo, nîûgaatûma maririkane mavîtia mao na ûtûme manyitwe.

²⁴ Kwoguo Ngai-Mûnene augîte atî nîmûtûmîte mevia menyu maririkanwe, mevia menyu nîmaguûrie. Maûndû monthe marîa mwîkaga nîmatûmaga mevia menyu monekane. Kwoguo nîmûgaatavwa nî nthû cienyu.

²⁵ “Nawe we mûtongoria wa Isiraeli, mûtongoria mwaganu na ûtarî mûtheru, mîthenya yaku ya îverithia rîa mûthiia nîmîkinyu.

²⁶ Nie Ngai-Mûnene mwene vinya wonthe mbugîte atî: Ruta kîremba kuuma kîongo gîaku na ûrute nthûmbî. Maûndû matigwîkara ûrîa meekariî mbere. Tûgîria arîa enyivia, na ûnyivie arîa metûgagîria.

²⁷ Nîngûcûkangia îtûûra rîu viû na rîtigacoka kwonwa rîngî. Nwatî ndigwîka ûguo nginya agaûka ûrîa mwagîrîru nîrînenganîre kûrî ke.

Andû a Aamoni na Rûviû rwa njûra

²⁸ “We mûndû, ratha ûvoro wîgiî andû a Aamoni nîûndû wa rûmena rûrîa mamûmenete uge Ngai-Mûnene augîte atî, rûviû rwa njûra, rûviû nîrûcomoretwe nîguo rûragane. Rûtheretue mûno nîguo rûvenie ta rûveni.

²⁹ Cioneki irîa mwonaga nî cia mana, na mamûrathagîra maveeni matheri. Rûviû nîrûvarîrîrie nîguo rûteme andû arîa aganu. Kavinda kao ka mûthiia ga kûverithua nîgakinyu.

³⁰ “Cokia rûviû njûrarî yaruo. Ngamûtuîrîra mûrî varîa mwaûmbîrwe, vûrûrirî ûrîa mwaciarîrwe.

³¹ Nîngamwîtûrûrîra marakara makwa, nîmûvuvîrîre mîruke ya marakara îkariî ta mwaki. Nîngaacoka nîmûnenganîre kûrî andû ndûrîka, arîa marî wara wa gûcûkangia.

³² Mûgatuîka ngû cia mwaki, nayo nthakame yenyu îgetîka kûu vûrûrirî ûcio, na mûtigacoka kûririkanwa rîngî.” Nînie Ngai-Mûnene nauga ûguo.