Ciîko 26 - ÎVUKU RÎA ÛVORO MWARO

Paûlo nîwetetere arî mbere ya Angiripa

¹ Angiripa nîwerire Paûlo atîrî, “We rîu ûrî na rûtha rwa kwîyarîrîria.” Paûlo nîwacokire agîûkîrîria njara yake na akîîyarîrîria akiuga atîrî:

² “Mûthamaki Angiripa! Nie nîrona nîrî na mûnyaka nîûndû ûmûnthî nîrî ava mbere yaku. Nîngwîtetera kuumana na maûndû monthe marîa Ayahudi manthitangîte nîûndû wamo.

³ We nîwîcî waro ûvoro wîgiî mîtugo yonthe ya Ayahudi na maûndû marîa o makararagia. Kwoguo nîrakûthaitha ûnthikîrîrie ûrî na ûkirîrîria.

⁴ “Ayahudi onthe nîmaicî ûvoro wîgiî ûtûûro wonthe wakwa. Nîmaicî ûrîa naatûûraga kuuma wa Kîammbîrîria nîrî vûrûrirî wa gwetû na nîrî gûkû Jerusalemu.

⁵ Mangîenda nwa marute ûira atî kwa îvinda îraca mbîthîrîtwe nîrî Mûfarisai wa ma. Afarisai nî Kîamma kîrîa kîrûmagîrîra mawatho na ndini ya Kîyahudi gûkîra ikundi irîa ciîngî cionthe.

⁶ Na rîu nûngamîte ava ngîcirithua nîûndû wa mwîrîgîrîro ûrîa nîrî naguo ûvororî wîgiî kîîranîro kîrîa Ngai eerîre methe metû ma tene.

⁷ Kîîranîro kîu nwakîo andû etû a mîvîrîga îrîa îkûmi na îîrî merîgagîrîra kûgîa nakîo vîndî îrîa makûgooca Ngai marî na kîîo ûtukû na mûthenya. Mûthamaki mûgathe, Ayahudi maranthitanga nîûndû nîrî na mwîrîgîrîro ûvororî wîgiî kîîranîro kîu!

⁸ Mue muonthe mûrî ava mûrona arî vinya gwîtîkia nîkî atî Ngai nî ariûkagia arîa akuû?

⁹ “Nie mwene nîneciragia atî nîmbagîrîrwe nî gwîka maûndû monthe marîa nîngîvota ma kûregana na ûvoro wîgiî Jesû wa Nazarethi.

¹⁰ Na ûguo nîguo nekire nîrî Jerusalemu. Nînaverwe ûvoti nî anene a athînjîri-Ngai na nînaikirie andû eengî a Ngai njeera. Na rîrîa andû acio a Ngai maatuîrîrwe kûûragwa, nînetîkanirie na ûvoro ûcio.

¹¹ Na kwa mavinda meengî nînatûmire maverithue marî mavoerorî na nînaageririe gûtûma marega wîtîkio wao. Na nîûndû wao nînaarakarire mûno nginya ngîthiî kûmarûmîrîria matûûrarî mageni nîguo nîmanyarire.

Paûlo nîwavecanire ûvoro wîgiî kûgarûrûka gwake

¹² “Na nîrî na mworoto ûcio Nînathiîre Damesiki mbathîtwe na mvetwe ûvoti nî anene a athînjîri-Ngai.

¹³ Na thaa thita cia mûthenya nîrî njîrarî nthiîte kuo, mûthamaki mûgathe, nînoonire ûtheri kuuma îgûrû. Ûtheri ûcio warî mûnene gûkîra wa riûa na nîwamûrîkire na mîena yonthe wa vamwe na andû arîa nathiîcanîtie nao.

¹⁴ Tuonthe nîtwagwîre nthî, na nie ngîgua mûgambo ûkîmbîra na rûthiomi rwa Kîhibirania atîrî, ‘Saûlo, Saûlo! Ûnyariraga nîkî? Kûrûa nanie nî gwîtivangia we mwene.’

¹⁵ Nanie nînaûririe atîrî, ‘We wî û, Mwathani?’ Nake Mwathani nîwambîrire atîrî, ‘Nie nînie Jesû ûrîa ûnyariraga.

¹⁶ Nwatî ûkîra ûrûngame na magûrû maku. Nie nakumîrîra nîrî na mworoto wa gûkûthuura nîguo ûtuîke ndungata yakwa na mûira wakwa. We ûkeeraga andû arîa engî ûrîa wona ûmbîgiî ûmûnthî na maûndû marîa ngaakwonia vuvarî.

¹⁷ Nie nîngûkûgitîra kuuma kûrî andû a Isiraeli na andû a ndûrîrî arîa ngûgûtûma ûthiî kûrî o.

¹⁸ Nîngûtûma ûthiî ûkamavingûre metho nîguo maume ndumarî maûke kûrî ûtheri, na maume vinyarî wa Caitani maûke kûrî Ngai. Na nîûndû wa kûmbîtîkia makovagîrwa mevia mao na makaavewa îgai vamwe na andû arîa Ngai athuurîte.’

Paûlo nîwavecanire ûvoro wîgiî wîra wake

¹⁹ “Kwoguo mûthamaki Angiripa, ndingîaregire kwathîkîra kîoneki kîu nagîte nakîo kiumîte îgûrû.

²⁰ Nînaambîrîrie kûvunjîria andû ngîmeeraga atî nwanginya merire mevia mao, macokerere Ngai na meke ciîko cia kwonania atî na ma nîmerirîte. Nie naambire kûvunjia ûvoro ûyû Damesiki, ngîcoka ngîûvunjia Jerusalemu na vûrûrirî wonthe wa Judea na nginya kûrî andû a ndûrîrî.

²¹ Nîûndû wa gîtûmi gîkî Ayahudi nîmaanyitire rîrîa naarî hekarûrî na makîgeria kûmbûraga.

²² Nwatî Ngai nîandethetie. Kwoguo nûngamîte ava ûmûnthî ngîrutaga ûira wakwa kûrî andû onthe, anini na anene. Maûndû marîa nîrauga nîmagwîkîka, nwamo arathi na Musa maaugire atî nîmagekîka namo nî:

²³ atî Mesaya nwanginya akaathînua na atuîke wa mbere kûriûka; ke nîke ûkaanîrîra kûrî Ayahudi na andû a ndûrîrî ûtheri ûrîa ûvonokanagia.”

²⁴ Rîrîa Paûlo eetetagîra na njîra îo, Fesito nîwamûgûkirie akîmwîra atîrî, “We Paûlo wî na ngoma. Kîthomo kîu gîaku kînene nîkîo kîratûma ume ngoma!”

²⁵ Nwatî Paûlo nîwamwîrire atîrî, “Mûgathe Fesito, ndirî na ngoma. Nie nîraria ûma ûrîa guo.

²⁶ Mûthamaki Angiripa! Nîrakwarîria nîrî na ûmîrîru, nîûndû we nîwîcî ûvoro wîgiî maûndû mama. Nîrî na ma atî we nîwîguîte ûvoro wîgiî maûndû mama monthe, nîûndû maûndû mama matiekagîrwa nthithorî.

²⁷ Mûthamaki Angiripa, we nîwîtîkîtie ûvoro ûrîa ûrî mandîkorî ma arathi? Nîmbicî atî we nîwîtîkîtie!”

²⁸ Nake Angiripa nîwerire Paûlo atîrî, “We ûreciria nîûkûndua Mûkristiano na kavinda gakuvî ûguo?”

²⁹ Nake Paûlo nîwamwîrire atîrî, “Wana ethîrwa nî kavinda gakuvî kana karaca, îvoya rîakwa kûrî Ngai nî atî we na arîa engî onthe manthikîrîrîtie ûmûnthî matuîke tanie, wa tiga tu matikovwe na mînyororo ta îno!”

³⁰ Nake mûthamaki, mûnene wa thirikari, Banîci na andû arîe engî onthe meekarîte vamwe nao nîmaarûngamire.

³¹ Rîrîa maarîkirie kuuma kûu nyombarî ya gûcemanîrua nîmeeranire atîrî, “Mûndû ûyû tî mwîku ûndû wana ûmwe ûngîtûma ovwe kana atuîrwe kûûragwa.”

³² Nake Angiripa nîwerire Fesito atîrî, “Mûndû ûyû atangîrarî mûcokiu ciira riiko kûrî mûthamaki wa Roma, nîangîarekererua.”