Ciîko 24 - ÎVUKU RÎA ÛVORO MWARO

Paûlo nîwathitangirwe

¹ Vuva wa mîthenya îtano, Anania ûrîa warî Mûthînjîri-Ngai ûrîa mûnene nîwanyûrûrûkire Kaisarea arî vamwe na athuuri amwe na wakiri ûmwe wetagwa Teritulo. Nao nîmaaumîre vau mbere ya mwarîrîria Feliki na makîmûva mateta mao megiî Paûlo.

² Na rîrîa Paûlo eetirwe, Teritulo nîwambîrîrie kûmûthitanga akiugaga atîrî: “Mûgathe Feliki! Tue nîtwîthîrîtwe tûrî na thayû gwa kavinda karaca na moogarûrûku marî na ûvatari nîmekîkîte gûkû gwetû vûrûrirî nîûndû we wî mûtongoria mûûgî.

³ Tue nîtwamûkîrîte maûndû mama vîndî cionthe na kûndû kuonthe na tûrî na ngatho nyîngî mûno kûrî we.

⁴ Nwatî ndirenda gûgûteera mavinda maku makîria. Kwoguo nîrakûthaitha wenda tu ûthikîrîrie tûkûve ûvoro na njîra nguvî.

⁵ Tue nîtûrîkîtie kwona atî mûndû ûyû nî mûcûku. Ke nîwambagîrîria gacagaca gatagatîrî ka Ayahudi onthe arîa marî nthî yonthe, na nîke mûtongoria wa Kîamma Kîam Anazari.

⁶ Wana nîarageragia gûcûkangia hekarû îgîe mûgiro, nwatî nîtûramûnyitire. [Tue nîtûngîramûtuîrîre kûringana na watho wetû,

⁷ nwatî mûnene wa mbûtû ya athigari a Roma ûrîa wîtagwa Lîsia nîaraûkire na agîtûmîra vinya nyîngî mûno akîmûruta njararî cietû.

⁸ Lîsia nîaratwathire agîtwîra nwanginya tûthitange Paûlo we ûkîgucaga.] We ûngîmûria ciûria, nîûkûvota kûmenya kuuma kûrî ke ûvoro wîgiî maûndû monthe marîa tûramûthitanga nîûndû wamo.”

⁹ Ayahudi acio engî wa nao nîmaathitangire Paûlo na makiuga atî maûndû mau monthe maarî ma ma.

Paûlo nîwetetere arî mbere ya Feliki

¹⁰ Nake mûnene ûcio nîwavenerie Paûlo arie, na Paûlo akiuga atîrî, “Nie nîmbîcî atî we wîthîrîtwe ûrî mûcirithania wa vûrûri ûyû gwa kavinda ka mîaka mîîngî. Kwoguo nîrî na gîkeno ngîîtetera nîrî mbere yaku.

¹¹ Ûngîtuîria we mwene nwa ûmenye atî wana tî mîvîtûku mîthenya îkûmi na îîrî kuuma nie nathiî Jerusalemu kûgooca Ngai.

¹² Ayahudi matiambîthîra tûgîkararanagia na mûndû wana ûrîkû nîrî hekarûrî, wana kana ngiunjuga kîrîndî nîrî mavoerorî kana nîrî îtûûrarî.

¹³ O wana matingîvota gûkwonia atî maûndû mau rîu maranthitanga nîûndû wamo nî ma ma.

¹⁴ Nwatî ûndû ûrîa ngwîtîkîra nî atîrî: Nie ngoocaga Ngai wa methe metû ma tene nîrî mûrûmîrîri wa Njîra ya Jesû. Ayahudi maugaga atî Njîra îo nî ya maveeni. Wana nîmbîtîkîtie maûndû monthe marîa mandîkîtwe Wathorî wa Musa na mavukurî ma arathi.

¹⁵ Nie nîrî na mwîrîgîrîro kûrî Ngai wata ûrîa andû aya o ene marî naguo, atî andû onthe arîa aro na acûku, nîmakaariûka.

¹⁶ Kwoguo vîndî cionthe nie ngeragia gwîka wa ûrîa nîngîvota, nîguo mbîthagîrwe nîrî na thamiri ntheru methorî ma Ngai na ma andû.

¹⁷ “Na vuva wa gwîkara kavinda karaca ndathiîte Jerusalemu, nînaacokire kuo nthiîte kûvira mbeca kûrî andû etû na kûruta magongoona.

¹⁸ Rîrîa naarutaga magongoona nîrîo Ayahudi maambîthîrîrie nîrî hekarûrî. Nie naarî mûrîkiu mambura ma kwîtheria, na gûtirî kîrîndî twarî nakîo na gûtiarî na gacagaca.

¹⁹ Nwatî kuo kwarî na Ayahudi amwe a kuuma Asia. Magîrîrwe nî kwîthîrwa marûngamîte ava mbere yaku makînthitanga ethîrwa kûrî ûndû wana ûmwe mangînthitanga naguo.

²⁰ Kana Ayahudi aya marî ava makwîre nî ngero îrîkû moonire mbîkîte vîndî îrîa netetere nîrî mbere ya Kîamma.

²¹ Nwatî nîkûrî na ûndû ûmwe nekire. Vîndî îrîa naarûngamîte mbere yao nînaugîrîrie atîrî: ‘Nie nîracirithua ûmûnthî nîmue nîûndû nîmbîtîkîtie atî akuû nîmakaariûka.’ ”

²² Feliki nîwamenyete waro ûvoro wîgiî Njîra ya Mwathani. Kwoguo nîwatîririe ciira îo na akîmeera atîrî, “Nie ngaatua ciira îno yenyu rîrîa Lîsia mûnene wa mbûtû ya athigari a Roma akaanyûrûrûka aûke gûkû.”

²³ Feliki nîwathire mûnene wa athigari îgana akîmwîra Paûlo ekare arî mûrangîre, nwatî amûvecage wîathi mûnini na etîkagîrie arata ake mamûviragîre kîndû wa kîonthe kîrîa angîvatara.

Paûlo nîwarîrie Feliki na Durusila

²⁴ Vuva wa mîthenya mînini Feliki nîwakinyire marî na mûka Durusila warî Mûyahudi na akiuga Paûlo avirwe kûrî ke. Nake nîwathikîrîrie Paûlo akîaria ûvoro wîgiî gwîtîkia Kristû Jesû.

²⁵ Nwatî vîndî îrîa Paûlo aathiîcaga na mbere kwaria ûvoro wîgiî ûthingu, ûvoti wa kwatha merirîria ma mwîrî na mavinda marîa Mûthenya wa îtuîro ûgaakinya, Feliki nîwanyitirwe nî guoya na akiuga atîrî, “We nwa ûthiî rîu. Nagîa na kanya nîngaagwîta rîngî.”

²⁶ Na vîndî wa îo Feliki aarî na mwîrîgîrîro atî Paûlo nîakûmûva mbeca. Kwoguo Feliki nîwekaraga agîtûmanaga atî Paûlo avirwe kûrî ke na akarangagia nake.

²⁷ Rîrîa mîaka îîrî yavîtûkire, Porikio Fesito nîwocire wîra wa Feliki, na agîtuîka mûnene wa thirikari. Feliki nîwendaga kwîyendithia kûrî Ayahudi, kwoguo nîwatigire Paûlo arî njeera.