Ciîko 22 - ÎVUKU RÎA ÛVORO MWARO

¹ “Mue ariû a îthe wetû na aa vava, rîu tanthikîrîriani ngîîtetera nîrî ava mbere yenyu!”

² Rîrîa Ayahudi meegwire akîmaarîria na Kîhibirania, nîmaakirire wana makîria ya mbere, na Paûlo akîmeera atîrî:

³ “Nie nîrî Mûyahudi, na naaciarîrwe Tariso vûrûrirî wa Kilikia, nwatî ngîrererwa gûkû îtûûrarî rîîrî rîa Jerusalemu. Gamalieli nîke wanthomithirie. Ke nîwanthomithirie na njîra îno mbîcûru viû ûvororî wîgiî Watho wa methe metû ma tene. Nie nînatungatagîra Ngai nîrî na kîîo kîîngî mûno wa tamue muonthe arîa mûrî ava ûmûnthî.

⁴ Nînaanyariraga andû arîa maarûmagîrîra Njîra îno ya Mwathani. Nînaanyitaga arûme na aka na ngamavingîrithia njeera.

⁵ Mûthînjîri-Ngai ûrîa mûnene na athuuri onthe a Kîamma nwa marute ûira atî nie nîraria ûma. Nîo maanengeere maarûa nîguo nîivire kûrî ariû na aarî a îthe wetû arîa maarî Damesiki. Kwoguo Nînathiîre kuo, ngînyita andû acio na ngîmarete gûkû Jerusalemu marî oove nîguo maverithue.

Paûlo nîwaugire ûrîa ke aagarûrûkire

⁶ “Ta thaa thita cia mûthenya vîndî îrîa nakinyire vakuvî na Damesiki, ûtheri mûnene nîwaumire îgûrû na ûkîîmûrîka wa rîmwe kuuma mîena yonthe.

⁷ Nanie nînaagwîre nthî na ngîgua mûgambo ûkîmbîra atîrî, ‘Saûlo, Saûlo! Ûnyariraga nîkî?’

⁸ Nanie nînaûririe atîrî, ‘We wî û, Mwathani?’ Nake nîwambîrire atîrî, ‘Nie nînie Jesû wa Nazarethi, ûrîa ûranyarira.’

⁹ Nao andû arîa twarî nao nîmoonire ûtheri ûcio, nwatî matiegua mûgambo wa ûcio wambaragîria.

¹⁰ Nanie nînaûririe atîrî, ‘Nie nîmbîka atîa Mwathani?’ Nake Mwathani nîwanjokerie atîrî, ‘Ûkîra wa rîu, ûthiî Damesiki na wakinya kuo nîûkwîrwa maûndû monthe marîa Ngai avangîte wîke.’

¹¹ Nînaaremirwe nî kwona nîûndû wa ûtheri ûcio mûnene. Kwoguo andû arîa twarî nao nîmaathiîre manyitîte njara nginya tûgîkinya Damesiki.

¹² “Na kûu îtûûrarî rîu nîkwarî na mûndû wetagwa Anania. Ke nîwathîkagîra Watho wa Musa mûno na nîwavetwe gîtîîo mûno nî Ayahudi onthe arîa maatûûraga kûu Damesiki.

¹³ Nake nîwaûkire kûrî nie, akîrûngama vakuvî nanie na akîmbîra atîrî, ‘Saûlo mûrû wa îthe wetû, coka kwona rîngî!’ Na vîndî wa îo nînavotire kwona rîngî na ngîmûroria.

¹⁴ Nake nîwaugire atîrî, ‘Ngai wa methe metû ma tene nîakûthuurîte nîguo ûmenye wendi wake, wone Ndungata yake îrîa nthingu na wîgue ke agîkwarîria na kanyua gake.

¹⁵ We nîûgûtuîka mûira wake kûrî andû onthe. Ûkaameraga ûvoro wîgiî maûndû marîa wonete na wîguîte.

¹⁶ Na rîu wetererete Ndûî? Ûkîra ûvoe Ngai, ûvatithue na nîûkwoverwa mevia maku.’

Paûlo nîwerirwe nî Ngai akavunjîrie andû a ndûrîrî

¹⁷ “Nie nînaacokire Jerusalemu. Na rîrîa naavoyaga nîrî hekarûrî, nînaagîre na kîoneki,

¹⁸ na ngîona Mwathani. Nake nîwambîrire atîrî, ‘We îîvîke ume Jerusalemu narua, nîûndû andû arîa marî gûkû tîmetîkîra we ûmarutîre ûira ûrîa ûmbîgiî.’

¹⁹ Nwatî nînaugire atîrî, ‘Mwathani, o ene nîmaicî waro atî nie nînathiîcaga mavoerorî monthe, na arîa maagwîtîkîtie nînaamavingagîra njeera na ngamariva.

²⁰ O nwa maicî waro atî nie naarî vo vîndî îrîa Stefano, ûrîa warî mûira waku, aaûragirwe. Nie nînetîkanirie na ûndû ûcio. Nao arîa maamûûragire nînaamanyitîre magooti mao.’

²¹ Nake Mwathani nîwambîrire atîrî, ‘Thiî rîu, nîûndû nie nîngûgûtûma kûraca ûthiî kûrî andû a ndûrîrî.’ ” Kîrîndî kîu Kîamthikîrîrie Paûlo nginya rîrîa aaugire ûguo.

²² Nakîo nîkîambîrîrie kugîrîria atîrî, “Ke nîaûragwe! Ndagîrîrwe nî gûtûûra mwoyo!”

²³ Nao andû acio nîmaaugagîrîria makinainagia nguo ciao na makîûmbûraga rûkûngû.

²⁴ Nake mûnene ûcio wa mbûtû ya athigari a Roma nîwathire athigari ake akîmeera mavire Paûlo kûrîa athigari maambîte magema na mamûrive na kîvoko. Mûnene ûcio wa athigari eendaga kûmenya kîrîa gîatûmaga Paûlo augîrîrue ûguo nî Ayahudi acio.

²⁵ Nwatî rîrîa athigari maamwovire nîguo mamûrive na kîvoko, Paûlo nîwerire mûnene wa athigari îgana ûrîa warûngamîte vakuvî nake atîrî, “Nîmwîtîkîrîtue nî Watho mûrive Mûûroma wana atatuîrîrîtwe atî nîekîte naaî?”

²⁶ Rîrîa mûnene ûcio wa athigari îgana eegwire ûguo, nîwathiîre kûrî mûnene wa mbûtû ya athigari na akîmwîra atîrî, “We nîwîka atîa? Mûndû ûcio nî Mûûroma!”

²⁷ Nake mûnene ûcio wa mbûtû ya athigari nîwathiîre kûrî Paûlo na akîmûria atîrî, “Tambîra atîrî, we rî wî Mûûroma?” Nake Paûlo nîwamûcokerie atîrî, “Ii.”

²⁸ Nake mûnene ûcio wa mbûtû ya athigari nîwaugire atîrî, “Nie nînarîvire mbeca nyîngî mûno nîguo nduîke Mûûroma.” Nake Paûlo nîwamwîrire atîrî, “Nie naaciarirwe nîrî Mûûroma.”

²⁹ Na vîndî wa îo andû arîa maarî matuîrie ûvoro wa Paûlo, nîmaathengutire makiuma varîa ke aarî. Nake mûnene ûcio wa mbûtû ya athigari nîwatemûkire mûno vîndî îrîa aamenyire atî Paûlo aarî Mûûroma na atî ke nîwamwovithîtie.

Paûlo nîwavirirwe kîamarî

³⁰ Mûnene ûcio wa mbûtû ya athigari nîwendaga kûmenya na ma kîrîa gîatûmîte Ayahudi mathitange Paûlo. Kwoguo mûthenya ûcio warûmîrîrîte, mûnene ûcio nîwathanire akiuga anene a athînjîri-Ngai na Kîamma Kîam Ayahudi kîonthe gîcemanie. Nake nîwaugire Paûlo ovorwe mînyororo na avirwe mbere ya Kîamma.