Ciîko 18 - ÎVUKU RÎA ÛVORO MWARO

Paûlo arî Korinitho

¹ Na vuva wa ûguo, Paûlo nîwaumire Athene na akîthiî Korinitho.

² Kûu nîkuo aatûnganire na Mûyahudi wetagwa Akuila waciarîrîtwe Pontasi. Nwatî Akuila marî na Pirisila, ûrîa warî mûndûmûka wake, methîrîtwe maauma Italia, nîûndû Mûthamaki Kilaudio nîwathanîte akauga Ayahudi onthe nwa nginya maume kûu Roma. Nake Paûlo nîwathiîre gûcerera Akuila na Pirisila,

³ na agîkarania akîrutithanagia wîra nao nîûndû ke aarî mûtumi wa magema wa tao.

⁴ Na wa mûthenya wa thavatû arî îvoerorî, Paûlo nîwaranagîria na Ayahudi na Angiriki akîgeria kûmeguithia matuîke etîkia.

⁵ Na rîrîa Sailasi na Timotheo maakinyire maumîte Makedonia, Paûlo nîwambîrîrie gûtûmîra mavinda monthe make na wîra wa kûvunjia na akarutaga ûira kûrî Ayahudi akiugaga atî Jesû nîke Mesaya.

⁶ Nao nîmaamûkararirie na makîmûruma. Kwoguo nîwarivarivire rûkûngû kuuma nguorî ciake na akîmeera atîrî, “Mwona mwarega kûvonoka, nî venyu! Nie ndirî vo! Kuuma rîu nie nîngûthiî kûrî andû a ndûrîrî.”

⁷ Kwoguo Paûlo nîwaumire kûu îvoerorî na akîthiî gwîkara nyomba kwa mûndû warî mûgooci Ngai wetagwa Titio Jusito. Nyomba ya Titiasi yariganîtie na îvoero rîu.

⁸ Kirisipo ûrîa warî mûnene wa îvoero rîu, na andû onthe a mûciî wake nîmeetîkirie Mwathani. Wana andû engî eengî arîa maarî kûu Korinitho nîmaathikîrîrie Paûlo, magîtîkia na makîvatithua.

⁹ Na ûtukû ûmwe Mwathani nîwarîrie Paûlo na njîra ya kîoneki, akîmwîra atîrî, “Tiga kûgîa na guoya. Thiî na mbere kwarîria andû na ndûgakire.

¹⁰ Nie nîrî vamwe nawe, na gûtirî mûndû wana ûmwe ûgûkûtharîkîra agwîke naaî, nîûndû andû eengî îtûûrarî rîîrî nî akwa.”

¹¹ Kwoguo Paûlo nîwekarire kûu kwa îvinda rîa mwaka ûmwe na nuthu, akîthomithagia andû kiugo Kîam Ngai.

¹² Na vîndî îrîa Galio aatwirwe mwarîrîria wa Akaia, Ayahudi marî vamwe nîmaanyitire Paûlo, makîmûvira Kîammarî,

¹³ na makiuga atîrî, “Mûndû ûyû nîarageria kwîgwithia andû magooce Ngai na njîra îreganîte na watho wetû!”

¹⁴ Nwatî rîrîa Paûlo aathiîte kwaria, Galio nîwerire Ayahudi atîrî, “Mue Ayahudi! Kethîrwa mûrateta nîûndû wa ûndû ûyû mûcûku wîkîtwe kana nîûndû wa ngero îgeretwe, nie nîngîamûthikîrîria ngirîrîrîtie.

¹⁵ Nwatî maûndû marîa maratûma mûkararanie megiî ciugo, marîîtwa na watho wenyu. Kwoguo mue ene nîmwagîrîrwe nî kûmenya ûrîa mûgwîka. Nie nînarega kûthondeka îtua îgûrû rîa maûndû ta mama!”

¹⁶ Nake Galio nîwamarutûrûrire kûu Kîammarî.

¹⁷ Nao onthe nîmaanyitire Sosithene ûrîa warî mûnene wa îvoero, na makîmûriva Kîamma gîkîonaga. Nwatî Galio ndaatindanîra na ûndû ûcio.

Paûlo nîwacokire Antiokia

¹⁸ Na kwa îvinda rîa mîthenya îngî mîîngî, Paûlo nîwekaranirie na etîkia kûu Korinitho. Nîwacokire akîmatiga na agîtwa meri akîthiî Sîria marî na Pirisila na Akuila. Mbere ya kuuma Kenikerea marî merirî, Paûlo nîwenjirwe njuîrî nîûndû aarî na mwîvîtwa mbere ya Ngai.

¹⁹ Na rîrîa maakinyire Efeso, Paûlo nîwatigire Pirisila na Akuila na akîthiî agîtonya îvoerorî na akîaranîria na Ayahudi.

²⁰ Nao andû nîmaamwîrire ekarakare kwao, nwatî nîwaregire.

²¹ Vandû va ûguo, akîmatiga nîwamerire atîrî, “Ngai enda, nie nîngaacoka rîngî kûrî mue.” Nake nîwatwîre meri akiuma kûu Efeso.

²² Na rîrîa Paûlo aakinyire Kaisarea, nîwathiîre Jerusalemu, agîkethia andû a kanitha, na agîcoka akîthiî Antiokia.

²³ Na vuva wa gwîkara kuo kwa îvinda rîîgana ûndû mûna, nîwaumire kuo na akîthiî avîtûkîrîrîte vûrûrirî wa Galatia na Furîgia akîûmagîrîria arutwa onthe.

Apolo arî Efeso na Korinitho

²⁴ Na kavindarî wa kau, Mûyahudi ûmwe wetagwa Apolo na waciarîrîtwe Alekisandiria, nîwaûkire kûu Efeso. Ke aarî mûndû waicî kwaria waro na waicî Mandîko Matheru waro.

²⁵ Ke nîwathomithîtue ûvoro wîgiî Njîra ya Mwathani. Vîndî cionthe ke eethagîrwa ecûrîtwe nî wendi wa kwaria na kûthomithania na njîra îrîa mbaro ûma wîgiî Jesû. Nwatî Apolo aaicî tu ûvatithio wa Johana.

²⁶ Ke nîwambîrîre kwaria îvoerorî arî na ûmîrîru. Nwatî vîndî îrîa Pirisila na Akuila maamwîgwire, nîmaamûvirire kwao mûciî na makîmûtaarîria na njîra îno mbaro makîria, ûvoro wîgiî Njîra ya Ngai.

²⁷ Na vîndî îo Apolo nîwatwire atî ke nîakûthiî Akaia. Kwoguo etîkia arîa maarî kûu Efeso nîmaamûmîrîrie na makîandîka maarûa kûrî etîkia arîa maarî Akaia makîmathaitha mamûnyite ûgeni. Na rîrîa Apolo aakinyire kuo, nîwatethirie arîa maatuîkîte etîkia mûno nîûndû wa wega wa Ngai.

²⁸ Nake nîwakararanirie na Ayahudi na vinya mûno mbere ya andû onthe, na nîwamavootire na njîra ya kwonania kuuma Mandîkorî Matheru atî Jesû nîke Mesaya.