Ayubu 7 - ÎVUKU RÎA ÛVORO MWARO

¹ “Wîra wa mûndû gûkû nthî nî mûrito mûno. Mûtûûrîre wake nîta wa mûruti wîra wa kîvarûa.

² Ekariî ta ngombo îgîcaria mwîgunyî, kana ta mûruti wîra etererete mûcara.

³ Kwoguo nîrî mûvangîre mîeri ya kwona mathîna, wa ûtukû ndaraga na kîeva.

⁴ Rîrîa namama ndaraga ngîûria gûgakîa rî, nwatî ûtukû nî mûraca, ndaraga ngîîgarûra nginya gûgakîa.

⁵ Mwîrî wakwa wîcûrîte igunyû na gîko, mwîrî wakwa watûkangîte wonthe, ûrî na ironda ikuuma mavira.

⁶ Mîthenya yakwa îravinyûra gûkîra nthugû ya cararani, îrathira ndarî na ûndû mbîrîgîrîrîte.

⁷ “We Ngai, ta ririkana atî ûtûûro wakwa nî ta mîvevû; ritho rîakwa rîtigacoka kwona ûndû mwaro rîngî.

⁸ Mûndû ûrîa ûramona rîu ndagaacoka kûmona rîngî, ûkanjaria ndure nîûndû ngethîrwa ndarî vo.

⁹ Wata ûrîa îtu rîthiraga rîkaûrîra, nwata guo ûrîa ûthiîcaga kwa arîa akuû atacokaga.

¹⁰ Ke ndacokaga gwake mûciî, na andû onthe arîa maamwicî nîmariganagîrwa nîke.

¹¹ “Kwoguo nie ndingîkira, nîmbaria nîrî na ûrûrû mwîngî mûno wa ngoro; nînîtetera nîrî na marakara meengî.

¹² Nîkwa nîrî îria, kana kîûmbe kîrîa kînene Kîam îriarî, nîguo ûmbigîre mûnangîri?

¹³ Rîrîa nauga, ‘Gîtanda gwakwa nîgîkûmvurûkia, ûrîrî wakwa nîûkûnthirîria mateta makwa,’

¹⁴ we ûkaga kûûmakia na njîra ya iroto; na ûkambîgwithia guoya na njîra ya cioneki.

¹⁵ Nie nthuurîte nîkava gwîita; nîkava gûkua gûkîra kwona mathîna ta mama.

¹⁶ Nînthûrîte mwoyo wakwa, ndingîtûûra kavinda karaca. Tiganani na nie, nîûndû ûtûûro wakwa nîta mîvevû.

¹⁷ Mûndû nû nîguo ûrûmbûyanagie nake? Ûtindaga ûkîîthînia nîke nîkî?

¹⁸ We nîûmûtuîragia wa kîraûko, na nîûmûgeragia wa mûthenya.

¹⁹ Nîûtûûra ûndoragia nginya rî, wana ndûrekaga merie mata?

²⁰ Ethîrwa nînjîvagia, ûturagwa nîkî we ûtuîragia ngoro cia andû? Ûnduîte kîndû gîa kwîthima cava nîkî? Nduîkîte mûrigo kûrî we nîkî?

²¹ Nîkwa ûtangîndekera mevia makwa, na ûngirîre mavîtia makwa? Nîûndû kavinda gatarî karaca ngethîrwa nîrî mbîrîrarî, ûkanjaria nwatî ndikethîrwa nîrî vo.”