Ayubu 37 - ÎVUKU RÎA ÛVORO MWARO

¹ “Maûndû mau nîmaratûma ngoro yakwa îtetema, na îratetema takwa îkûgûûka.

² Thikîrîriani mûrurumo wa mûgambo wa Ngai, na mûgambo ûrîa umaga kanyuarî gake.

³ Atûmaga ûtheri kuuma îgûrû ûnyaganie kûndû kuonthe, naruo rûveni rwake rûgakinya mîena yonthe ya nthî.

⁴ Vuva wa ûguo mûgambo wake nîûrurumaga, mûgambo wa Ngai ûgambaga na vinya, na vîndî îo rûveni rwîthagîrwa rûkîvenia.

⁵ Ngai agambaga na mûgambo wa magegania, ekaga maûndû manene wana tûtangîvota kûmenya.

⁶ Nîke wîraga mbaravu îgwe nthî, na akaurithia mbura nene.

⁷ Avingaga mawîra monthe ma andû, nîguo andû onthe mamenye wîra wake.

⁸ Nyamû cia kîthaka nîicokaga imamorî ciao, na igekara kûu makurungurî.

⁹ Kîvuvûkanio kiumaga mwena wa îveti, nayo mvevo îkauma mwena wa rûgûrû.

¹⁰ Mîvevû ya Ngai îkiragia manjî mvevo, magatuîka ta îthiga rîa mbaravu.

¹¹ Ngai ecûragia matu mbura makaritûva, matu manyaganagia mveni ciake.

¹² Aciathaga ikathiûrûrûka kûndû kuonthe, ikavingie maûndû marîa Ngai aciathaga ciîke, nthî yonthe kûrîa gûtûûragwa.

¹³ Ngai ekaga wendi wake gûkû nthî, ûrî wa kûverithia andû, kana wa kwonania wendo wake.

¹⁴ “Ayubu, tathikîrîria; tatarania maûndû ma magegania marîa Ngai ekaga.

¹⁵ Nîwîcî ûrîa Ngai athaga matu, na agatûma mveni ivenie kuuma matuurî mau?

¹⁶ Nîwîcî ûrîa matu mereraga îgûrû matakûgwa? Ûcio nî wîra wa magegania wa ûrîa ûrî ûmenyo mûkinyanîru.

¹⁷ We wonaga wîkîrîte nguo cia ûrugarî mûno, rîrîa rûkûngi kuuma mwena wa îveti rûratharîkîra nthî.

¹⁸ Nwa ûvote gûtambarûkia matu ta ûrîa Ngai ekaga, na ûtûme maûme ta gîcicio?

¹⁹ Tûthomithie ûrîa tûkera Ngai; tûrî ndumarî, tûtingîmenya ûrîa tûkuga.

²⁰ Nie ndingîûria kwaria na Ngai; mûndû ûngîaranîria nake nwakwa angîmerua.

²¹ “Rîu gûtirî mûndû ûngîvota kûroria îgûrû nîûndû wa ûrîa kwarîte; rûvuvo rûvatîte matu monthe îgûrû gûkathera.

²² Aûkaga arî na riiri ta wa thaavu aumîte mwena wa rûgûrû, Na riiri wake nîûtûmaga arîa mamwonaga mamwîtigîre.

²³ Tûtingîvota gûkuvîvîria Ngai Mwene Vinya; ke arî ûvoti mwîngî na kîvooto, ke ecûrîtwe nî wega na ndavinyanagîrîria.

²⁴ Kwoguo andû onthe nîmamûvecaga gîtîîo; na ndarûmbûyanagia na mûndû ûrîa wîtucaga mûgî.”