Ayubu 35 - ÎVUKU RÎA ÛVORO MWARO

¹ Nake Elihu nîwaugire atîrî,

² “Ûreciria ûndû ûyû nî mwaro, kuga ûrî mwagîrîru mbere ya Ngai?

³ Kana ûragia Ngai atîrî, ‘Ngîte na mûnyaka ûrîkû? Ngîte na umithio ûrîkû ethîrwa atî ndiîvîtie?’

⁴ Nie nîngûgûcokeria, na njokerie arata aku.

⁵ Taroria îgûrû wone, ûrorie wone matu marîa marî îgûrû rîaku.

⁶ Rîrîa wevia, ûngîverera Ngai na ndûî? Wana mevia maku mangîongerereka, Ngai nîaturagwa?

⁷ Ethîrwa wî mûthingu nîndûî ûmûvecaga, kana nîndûî amûkagîra kuuma kûrî we?

⁸ Waganu waku ûcûkangagia andû ta we, ûthingu waku ûgunaga mûndû ûrîa wîngî.

⁹ “Rîrîa andû mavinyîrîrua mûno nîmarîraga, nîmetagia ûtethio nîûndû wa kûvinyîrîrua nî arîa marî vinya,

¹⁰ Nwatî gûtirî ûragia, ‘Ngai mûnyûmbi arî kû, ûrîa ûmvotithagia andû kwina wana kûrî na thîna;

¹¹ ûrîa ûtûthomithagia gûkîra nyamû cia kîthaka, na agatûma tûvîge gûkîra iconi cia rîerarî!’

¹² Kwoguo metagia ûtethio nwatî Ngai ndamanogaga, nîûndû nî andû etîi na aganu.

¹³ Nama Ngai ndathikagîrîria kîrîro Kîam mana, wana Mwene Vinya ndoonaga ta ûndû.

¹⁴ Ngai angîgûcokeria atîa rîrîa ûrauga atî ndûmwonaga, na ciira waku ûrî mbere yake, na nîke wetererete?

¹⁵ Rîu, nîûndû Ngai arakara ndaverithanagia wana ndarûmbûyanagia na mavîtia ma andû;

¹⁶ Ayubu, ûratumûra kanyua kwaria ciugo cia mana, ûraria ndeto nyîngî ûtarî na ûmenyo.”