Ayubu 14 - ÎVUKU RÎA ÛVORO MWARO

¹ “Mûndû ûrîa ûciarîtwe nî mûndûmûka, atûûraga mîthenya mînini, na îcûrîtwe nî mathîna.

² Akûraga ta maûa marîa macokaga kûma, avinyûraga na akaûrîra wa rîmwe ta kîruru.

³ We Ngai, ûratindanîra na mûndû ta ûcio nîkî, na ûgaciira nake?

⁴ Nû ûngîvota kûruta kîndû kîtheru kuuma kûrî kîndû gîtarî kîtheru! Gûtirî mûndû ûngîvota?

⁵ Mîthenya ya mûndû gûtûûra mwoyo nî mîtare, na nîwicî mîeri îrîa agûtûûra mwoyo; na ndangîvîtûkia îvinda rîrîa ûmwigîrîte rîa gûtûûra.

⁶ Roria na kwîngî ûtige kûmwona, tiga akenerere mîthenya yake ta mûthûkûmi.

⁷ Mûtî ûngîtemwa kwîthagîrwa na mwîvoko, atî nîûkûtheûka na ûgakûra rîngî.

⁸ Wana ethîrwa mîri yaguo yekara mûno mûtheturî nîîkûraga, na kîthukî Kîamguo gîkorera nthî,

⁹ ûngîvutania na manjî nîûthundagia, nîûkûraga wata mûtî mwîthî.

¹⁰ Nwatî rîrîa mûndû akua, ûcio wîthagîrwa ûrî mûthiia wake; arîkia gûtuîkana atigagwa na ndûî rîngî?

¹¹ “Wata ûrîa manjî mavûcaga îriarî, na rûnjî rûkavûa rûgatiga kûnyûrûrûkia manjî,

¹² ûguo nîguo mûndû akucaga akarega kûramûka. Ndakaaramûka rîngî kana agirimûke, nginya rîrîa îgûrû rîkathira.

¹³ “Wana nîkava ûngîanthithire kwa arîa akuû, nîkava ûngîanthithire nginya marakara maku mathire, ûnthithe nginya marakara maku mathire, narîo îvinda rîrîa ûtuîte rîathira ûndirikane.

¹⁴ Mûndû angîkua nwa ariûke? Nwatî nîmbîkara ngwetererete ngîrutaga wîra, nginya îvinda rîa kûrekererua rîkinye, rîrîa mathîna makaathira.

¹⁵ Nîûgacoka ûmbîte nanie nîngagwîtîka, na nîûgakenua nînie, nie kîûmbe gîaku.

¹⁶ Nîûgacokaga kûrorereria mîthiîre yakwa yonthe, na ndûkona mevia makwa.

¹⁷ Nîûkaanjovera mevia makwa na ûnthengutîrie mo, na ûthirie mavîtia makwa.

¹⁸ “Nwatî irîma nîigûcaga na ikavaragana, na mathiga nîmakaagûkaga makauma varîa methagîrwa marî.

¹⁹ Manjî nîmatûmaga mathiga mathira, naguo mwîcûro wamo ûgakuua mûthetu; ûguo nîguo we ûcûkangagia kîîrîgîrîro Kîam mûndû.

²⁰ We nîûvootaga mûndû na akathiî viû, we nîûgarûraga kîthithi gîake na akathira.

²¹ Ke ndamenyaga rîrîa ciana cia aka ikûvewa gîtîîo, na ndonaga rîrîa makûnyivua.

²² Egucaga ûrûrû wa mwîrî wake tu, na agecakayagîra ke mwene.”