Aroma 8 - ÎVUKU RÎA ÛVORO MWARO

Mûtûûrîre wa Kîîroho

¹ Nîûndû wa ûguo, rîu arîa marî ndaarî ya Jesû Kristû matingîtuîrwa atî nî evia.

² Nîûndû watho wa Roho ûrîa ûtûmaga tûtûûre tûrî ndaarî ya Jesû Kristû nîmûnjovoru kuuma kûrî watho wa mevia na gîkuû.

³ Ûndû ûrîa watho ûtangîavotire gwîka nîûndû wa kwagithua vinya nî mwîrî Ngai nîwawîkire. Eekire ûguo na njîra ya kûrekia Mûrû wake arî na mwîrî wîkariî ta îno yetû ya mevia na arî na mwîrî ûcio nîwavootire mevia.

⁴ Ngai eekire ûguo nîguo tue arîa tûrûmagîrîra maûndû marîa Roho endaga nwatî tî maûndû marîa meriragîrua nî mwîrî tûvingagie maûndû marîa watho ugîte.

⁵ Nîûndû andû arîa marûmagîrîra maûndû ma mwîrî meciragia maûndû marîa mwîrî wendaga, nwatî andû arîa marûmagîrîra maûndû ma Roho, meciragia wa maûndû marîa Roho endaga.

⁶ Kwathwa nî mwîrî kûretaga gîkuû, nwatî kwathwa nî Roho kûretaga mwoyo na thayû.

⁷ Kwoguo andû arîa mathagwa nî maûndû ma mwîrî methagîrwa marî ûthû na Ngai, nîûndû matiathîkagîra Watho wake, na matingîvota kûwathîkîra.

⁸ Andû arîa mathîkagîra mîîrî yao, matingîvota gûkenia Ngai.

⁹ Nwatî mue mûtiathagwa nî mîîrî yenyu mwathagwa nî Roho, ethîrwa nama Roho wa Ngai atûûraga ndaarî yenyu. Mûndû wa wonthe wîthagîrwa atarî na Roho wa Kristû ûcio tî wake.

¹⁰ Nwatî ethîrwa Kristû atûûraga ndaarî yenyu wana ethîrwa mîîrî yenyu nîgaakua nîûndû wa mevia, maroho menyu marî mwoyo nîûndû mûrî atue athingu.

¹¹ Ethîrwa Roho wa Ngai ûrîa wariûkirie Jesû Kristû atûûraga ndaarî yenyu, ûcio wariûkirie Jesû Kristû nî akaava mîîrî îo yenyu îrîa îkuucaga mwoyo. Ageeka guo na njîra ya Roho ûcio wake ûrîa ûtûûraga ndaarî yenyu.

¹² Kwoguo ariû na aarî a îthe wetû, tûrî na wîra wa kûruta nwatî tî gûtûûra twathagwa nî mîîrî.

¹³ Nîûndû mwatûûra mwathagwa nî maûndû ma mwîrî nîmûgaakua. Nwatî ethîrwa na njîra ya Roho nîmûkûûraga ciîko cienyu njûku irîa mwîkaga, nîmûgûtûûra mwoyo.

¹⁴ Nîûndû arîa onthe matongoragua nî Roho wa Ngai nî ciana cia Ngai.

¹⁵ Roho ûrîa Ngai amûveete tî wa gûtûma mûtuîke ngombo na tî wa gûtûma mwîtigîre. Vandû va ûguo Roho ûcio amûtucaga ciana cia Ngai. Roho nîke ûtûvecaga vinya wa gûkaîra Ngai tûkiugaga, “Aba! Vava.”

¹⁶ Roho ûcio nî mûira vamwe na maroho metû atî tûrî ciana cia Ngai.

¹⁷ Ethîrwa tûrî ciana cia Ngai, tûrî agai a irathimo irîa aigîrîte andû ake. Wana nîtûkagaa vamwe na Kristû kîrîa Ngai amwigîrîte. Nwatî nwanginya tûthînue ta Kristû nîguo tûkaagîa na riiri ta ke.

Riiri wa vuvarî

¹⁸ Nie monaga atî mathîna marîa tûrî namo îvindarî rîîrî matingîringithanua wana vanini na riiri ûrîa tûkaaguûrîrua.

¹⁹ Indo cionthe irîa ciaûmbirwe cietererete mûno rîrîa Ngai akoonania ciana ciake.

²⁰ Nîûndû indo cionthe cia nthî ciatuirwe cia mana, nwatî gûtiarî kwenda gwa cio, nî Ngai wendaga ciîkare guo. Kûnekariî ûguo ciarî na kîîrîgîrîro

²¹ atî mûthenya ûmwe nîikoovorwa ciume ûkomborî wa kwora, na igîe na wîyathi ûrî na riiri wa ciana cia Ngai.

²² Nîûndû nîtwîcî atî nginya îvindarî rîîrî ciûmbe cionthe nîiracaa irî na ûrûrû ta ûrîa mûndûmûka egucaga mbere ya agîe na mwana.

²³ Nwatî twa ciûmbe cionga tu icaaga, wana tue ene arîa tûrî na Roho ûrî ta kîveo Kîam mbere Kîam iveo cia Ngai nîtûcayaga na kûu ndaarî yetû wa tûgîetagîrîra Ngai atûtue ciana ciake na atûkûûre viû kuuma ûkomborî.

²⁴ Nîûndû twavonokirue nîûndû wa kîîrîgîrîro kîu. Nwatî ethîrwa tûrî onu kîrîa twîrîgagîrîra, gûtirî na vata wa gûkîîrîgîrîra nîûndû gûtirî mûndû wîrîgagîrîra kîrîa arona.

²⁵ Nwatî ethîrwa nîtwîrîgagîrîra kîrîa tûtakwona, nîtûgîetagîrîra tûkirîrîrîtie.

²⁶ Na njîra ta îno, Roho nîatûtethagia nîûndû tûtirî na vinya. Nîûndû tûtiîcî ûrîa twagîrîrwe nî kûvoya. Nwatî Roho nîke ûtûthaithanagîrîra kûrî Ngai arî na mûcao ûtangîgweteka.

²⁷ Nake Ngai ûrîa ûtuîragia kîrîa kîrî ngororî cietû nîecî meciria ma Roho nîûndû Roho nîke ûthaithanagîrîra atheru kûringana na kwenda kwa Ngai.

²⁸ Tue nîtwîcî atî maûndûrî monthe Ngai nî arutaga wîra nîûndû wa wagîrîru wa arîa mamwendete. Andû acio nî arîa ke etîte kûringana na wendi wake.

²⁹ Nîûndû andû arîa Ngai aathuurire kuuma wa tene nîwamamûrire matuîke ta Mûrû wake nîguo nake Mûrû wake atuîke îrikithathi rîa ciana nyîngî cia îthe ûmwe.

³⁰ Kwoguo arîa Ngai amûrîte nîwametire, nao acio eetire nîwamatuire athingu na akîmagaîra riiri wake.

Ngai nî atwendete

³¹ Nîtuga atîa îgûrû rîa maûndû mama? Ethîrwa Ngai arî mwena wetû, nû ûngîtûtuma ûthû?

³² Ngai ûcio ndaavota gûcaîra mûrû wake wa mûmwe, nwatî nîwamûrutire nîûndû wetû tuonthe. Ethîrwa ke nîwatûvere Mûriû, na kinthî ndagaatûva indo cionthe mbaro?

³³ Nû ûngîona ûndû wa kûthitanga andû arîa Ngai athuurîte? Ngai ke mwene nîamatucaga athingu.

³⁴ Nû ûngîmatuîra atî nî evia? Gûtirî wana ûmwe. Jesû Kristû nîke wakuire na agîcoka akîriûka na arî njararî ya ûrîo ya Ngai. Ke nîke ûtûthaithanagîra kûrî Ngai.

³⁵ Nî ndûî kîngîtûtigithania na wendani wa Kristû? Nî mathîna, kana kîeva, kana mînyamaaro, kana yûra, kana ûthîni, kana ûgwati wana kana kûûragwa?

³⁶ Wata ûrîa kwandîkîtwe mandîkorî matheru atîrî, “Tûtûûraga tûûragagwa vîndî cionthe nîûndû waku, tûtucagwa ta ng'ondu cia kûthînjwa.”

³⁷ Nwatî maûndûrî mama monthe, tue nîtûvootanîte na njîra ya ûcio watwendire.

³⁸ Nîûndû nîmûmenyu waro atî gûtirî ûndû ûngîtûtigithania na wendo wa Kristû; tî gîkuû kana mwoyo, araika, tî maavinya ma îgûrû, tî maûndû marîa marekîka rîu na marîa mageekîka, tî monene,

³⁹ tî indo irîa irî îgûrû kana nthî kûrîa kûrikîru. Gûtirî kîndû wa kîonthe Kîam irîa ciûmbîtwe kîngîtûtigithania na wendo ûrîa Ngai atwendete naguo na njîra ya Jesû Kristû Mwathani wetû.