Aroma 6 - ÎVUKU RÎA ÛVORO MWARO

Gûtûûra Mwoyo nîûndû wa Kristû

¹ Nîtuga atîa rîu? Nîtûtûûre twîvagia nîguo wega wa Ngai wongerereke?

² Naarî! Tue twakwire ûvororî wa mevia kûngîvoteka atîa tûthiî na mbere na kwîvia?

³ Nîmwîcî nama atî rîrîa twavatithirue tûgîtuîka kîndû kîmwe na Kristû twavatithirue na tûgîtuîka kîndû kîmwe gîkuûrî gîake.

⁴ Rîrîa twavatithirue nîtwathikirwe vamwe na Kristû ûvororî wîgiî gîkuû gîake, nîguo atî wata ûrîa Kristû ariûkirue nî vinya ûrîa ûrî riiri wa îthe wanatue nwa tûgatûûra mûtûûrîre mûcerû.

⁵ Ethîrwa nîtwatuîkire kîndû kîmwe nake nîûndû wa gûkua wata ûrîa aakwire, na njîra wata îo nîtûgaatuîka kîndû kîmwe nake na njîra ya kûriûka gwake.

⁶ Nîtwîcî atî ûmûndû wetû wa tene nîwambirwe mûtharavarî vamwe na Kristû nîguo vinya wa mwîrî ûrîa wîvagia ûthirue na tûtigacoke gûtuîka ngombo cia mevia.

⁷ Nîûndû rîrîa mûndû akua ndatûûraga arî ngombo ya mevia.

⁸ Ethîrwa nîtûrîkîtie gûkua vamwe na Kristû, nîtwîtîkîtie atî nîtûgaatûûra vamwe nake.

⁹ Nîtwîcî atî Kristû nîwariûkirue na ndagaacoka gûkua rîngî na gîkuû gîtigacoka kûmwatha.

¹⁰ Gîkuû kîrîa aakwire, aakuîrîre nîguo avoote mevia rîmwe rîa kwîgana, naguo ûtûûro ûrîa atûûraga atûûraga nîguo akenagie Ngai.

¹¹ Na njîra wata îo, mwagîrîrwe nî kwîyona ta mûrî akuû ûvororî wa mevia na atî mûtûûraga kûrî Ngai mûrî kîndû kîmwe na Jesû Kristû.

¹² Kwoguo mûtikanareke mevia mathamakage mîrirî yenyu îo îkuucaga atî nîguo mwathîkagîre merirîria mayo.

¹³ Mûtikanareke ciîga cienyu cia mwîrî ciîvie na ituîke indo cia gwîkaga naaî. Nwatî îîvecaneni kûrî Ngai ta andû mariûkîtue na mwîvecane kûrî ke nîguo mûtuîke ciîga cia gwîkaga maûndû ma ûthingu.

¹⁴ Mevia matiagîrîrwe nî kûmwatha nîûndû mûtitûûraga rungu rwa watho, nwatî mûtûûraga rungu rwa wega wa Ngai.

Ngombo cia gwîkaga maûndû ma ûthingu

¹⁵ Rîu nîtuga atîa? Nî twîvagie atî nîûndû tûtirî rungu rwa watho nwatî tûrî rungu rwa wega wa Ngai? Naarî!

¹⁶ Mue nîmwîcî nama atî vîndî îrîa mwevecana kûrî mûndû ta ngombo nîguo mûmwathîkagîre, na ma mûrî ngombo cia ûcio mwathîkagîra. Nwa kwîthîrwe mûrî ngombo cia mevia marîa maretaga gîkuû, kana wathîki ûrîa ûtûmaga mûndû atuwe mûthingu.

¹⁷ Nwatî nwanginya tûcokie ngatho kûrî Ngai nîûndû vîndî îmwe mwarî ngombo cia mevia, nwatî nîmwacokire kwathîkîra ûvoro wa ma ûrîa wonekaga maûndûrî marîa mwathomithirue.

¹⁸ Mue nîmwovorirwe kuuma meviarî, na rîu mûrî ngombo cia gwîkaga maûndû ma ûthingu.

¹⁹ (Nîramwarîrîria ngîtûmagîra ngerekano irîa mûngîtaûkîrwa nîcio nîûndû mûtirî na vinya wa gûtaûkîrwa nî maûndû monthe.) Vîndî îmwe nîmwevecanîte magatuîka ngombo cia maûndû macûku na mwecûrîtwe nî waganu nîûndû nîmwekaga maûndû macûku. Na njîra wata îo nîmwagîrîrwe nî kwîvecana viû mûtuîke ngombo cia maûndû ma ûthingu.

²⁰ Rîrîa mwarî ngombo cia mevia, mwarî ovore ûvororî wîgiî maûndû ma ûthingu.

²¹ Nî umithio ûrîkû mwagîre naguo kuuma maûndûrî marîa rîu mûconokaga nîmo? Maûndû mau macokaga kûrete gîkuû.

²² Nwatî rîu mûrî ovore kuuma meviarî na mûrî ngombo cia Ngai. Naguo umithio ûrîa mûgîcaga naguo nî gûtûûra mwîyamûrîrîte Ngai na mûthiiarî mwoyo wa tene na tene.

²³ Nîûndû mûcara wa mevia nî gîkuû, nwatî kîveo kîrîa Ngai avecanaga nî mwoyo wa tene na tene mûrî rûmwe na Jesû Kristû Mwathani wetû.