Aroma 16 - ÎVUKU RÎA ÛVORO MWARO

Ngethi cia Paûlo kûrî etîkia amwe

¹ Nie nînagathîrîria mwarî wa îthe wetû Foebe ûrîa ûrutaga wîra wa ûtungati kanitharî wa Kenikerea.

² Mwamûkîreni nîûndû ke nîwîtîkîtie Mwathani, wata ûrîa andû a Ngai magîrîrwe nî kwamûkîrwa. Mûtethieni na kîrîa kîonthe angîvatara, nîûndû ke aanandethia na aanatethia andû eengî.

³ Kethiani Pirisika na Akula, arîa tûrutaga wîra wa Kristû nao.

⁴ Andû aya matietigîra gûkua nîguo mamvonokie. Nie nîngûcokia ngatho kûrî o, wana makanitha monthe ma andû a ndûrîrî nîmamacokeria ngatho.

⁵ Kethiani wana kanitha ûrîa ûcemanagia nyombarî yao. Kethiani mûrata wakwa Epaeneto, ûrîa warî wa mbere gwîtîkia Kristû vûrûrirî wa Asia.

⁶ Na mûkethie Mariamu, ûrîa wîthîrîtwe akîruta wîra gatagatîrî kenyu arî na kîîo mûno.

⁷ Kethiani Anderoniko na Juniasi arîa Ayahudi wata nie na maarî njera vamwe nanie. Nîmecîkene mûno gatagatîrî ga atûmwa na nîmaatuîkire Akristiano mbere yakwa.

⁸ Kethiani Amupiliato, ûrîa mendete nîûndû wa Mwathani.

⁹ Kethiani Urubano, ûrîa tûrutaga wîra wa Kristû nake, na mûkethie mûrata wakwa Sitakusi.

¹⁰ Kethiani Apele, ûrîa wagerirue na akîonania nama atî ke nîwathîkagîra Kristû. Kethiani andû a mûciî wa Aristobulo.

¹¹ Kethiani Herodiani ûrîa Mûyahudi ta nie, na mûkethie Akristiano arîa marî kwa Narikiso mûciî.

¹² Kethiani Turufena na Turufosa, aka arîa marutaga wîra wa Mwathani na kîîo.

¹³ Kethiani Rufasi ûrîa wîrutîrîte mûno wîrarî wa Mwathani, na mûkethie ng'ina ûrîa wandethagia ta mwana wake.

¹⁴ Kethiani Asunikirito, na Filegoni, Herime, Pateroba, Herima, na ariû a îthe wetû onthe arîa marî vamwe nao.

¹⁵ Kethiani Filologo, Julia, Nerea na mwarî wa ng'ina, Olîmupa na andû a Ngai onthe arîa mekaranagia nao.

¹⁶ Kethaniani mûndû na mûndû ûrîa wîngî na ngethi cia kûmumunyana. Nîmwakethua nî makanitha monthe ma Kristû.

Mataaro ma mûthiia

¹⁷ Ariû na aarî a îthe wetû, nîramûthaitha atî: mwîmenyagîrîre kûrî andû arîa maretaga nyamûkano na kûvîngithia mûndû. Andû acio nîmareganaga na maûndû marîa mwathomithirue. Îthemageeni andû ta acio.

¹⁸ Nîûndû andû arîa mekaga maûndû ta mau matungatagîra mavu mao, nwatî tî Mwathani wetû Jesû Kristû. Na njîra ya ciugo ciao mbaro na mîario yao îrî na mûrîo, andû acio nîmaveenagîrîria andû arîa marî ngoro mvûthû.

¹⁹ Etîkia onthe nîmamenyete atî nîmwathîkagîra Ûvoro ûrîa mwaro, na nîûndû wa gîtûmi gîkî, nie nîngenaga nîûndû wenyu. Nie nîrenda mue mwîthagîrwe mûrî aûgî maûndûrî marîa maro, nwatî ûvororî wîgiî maûndû marîa macûku, îthagîrwani mûtarî na ûcuke.

²⁰ Nake Ngai, ûrîa ûvecanaga thayû, îvinda rîtarî îraca nîakaavoota Caitani na amûve wathani îgûrû rîake. Wega wa Mwathani wetû Jesû Kristû ûrogîa namue.

²¹ Nîmwakethua nî Timotheo, ûrîa tûrutaga wîra vamwe nake, wana Lukio, na Jasoni, na Sosipateri arîa tûrî a rûrîra rûmwe nîmamûkethia.

²² Nie Teretio, na nînie mwandîki wa maarûa îno vandûrî va Paûlo nînamûkethia nîûndû wa Mwathani.

²³ Nake Gayo, ûrîa mbîkaraga gwake na nwa kuo kanitha îcemanagia nîwamûkethia. Nîmwakethua nî Erasito ûrîa wigaga kîgîna Kîam îtûûra înene na mwakethua nî mûrû wa îthe wetû Kwarito. [

²⁴ Wega wa Mwathani wetû Jesû Kristû ûrogîa namue muonthe. Ameni.]

Mavoya ma mûthiia ma gûkumia Ngai

²⁵ Nîtûkumieni Ngai! Ke arî na ûvoti wa gûtûma mwîkare mûkindîrîtie wîtîkiorî wenyu kûringana na Ûvoro mwaro wîgiî Jesû Kristû ûrîa mvunjagia, na kûringana na kûguûrîrua nthitho ya ûvoro wama ûrîa wethîrîtwe ûrî mûthithe gwa kavinda karaca mûno.

²⁶ Na rîu, maûndû marîa mandîkîtwe nî arathi nîmatûmîte ûndû ûcio ûmenyeke. Ngai ûrîa ûtûûraga tene na tene nîwathanire atî ûvoro ûcio ûmenyithue andû onthe a nthî nîguo onthe metîkie na mathîkîre Ngai.

²⁷ Nake Ngai ûrîa wîthagîrwa arî na ûûgî maûndûrî monthe, arotûûra agoocagwa na njîra ya Jesû Kristû tene na tene! Ameni.