Aroma 14 - ÎVUKU RÎA ÛVORO MWARO

Ndûgatuîre mûndû ûrîa wîngî

¹ Amûkagîrani mûndû ûrîa ûtarî vinya wîtîkiorî, nwatî mûtigakararanie nake ûvororî wa maûndû marîa ke etîkîtie nwatî mue mûtimetîkîtie.

² Mûndû ûmwe etîkîtie atî nwa arîe irio cia mîthemba yonthe. Nwatî mûndû wîngî ûtarî na vinya wîtîkiorî wake arîcaga manyenyi tu.

³ Mûndû ûrîa ûrîcaga irio cia mîthemba yonthe ndagîrîrwe nî kûnyarara ûrîa ûtairîcaga nîûndû Ngai nîmûmwamûkîru.

⁴ We wî û nîguo ûtuîke wa gûtuîra ndungata ya mûndû ûrîa wîngî? Mwathi wa ndungata îo nîke ûgaatua kana nî îkîte waro kana nî îkîte naaî. Nayo ndungata îo nîîkavotana nîûndû Mwathani arî na ûvoti wa gûtûma îvootane.

⁵ Andû amwe meciragia atî kûrî mûthenya ûrî vata gûkîra îrîa îngî, na engî mageciria atî mîthenya yonthe îthagîrwa îkariî ûndû ûmwe. Wa mûndû agîrîrwe nî kwîthîrwa arî mwîkindîriu viû meciriarî make.

⁶ Mûndû ûrîa ûtucaga mûthenya mûna wa mwanya, ekaga ûguo nîûndû wa gûtîîa Mwathani. Nake ûrîa ûrîcaga irio cia mîthemba yonthe ekaga guo nîûndû wa gûtîîa Mwathani, nîûndû ke nîacokagia ngatho kûrî Ngai nîûndû wa irio. Mûndû ûrîa ûregaga kûrîa irio cia mîthemba mîna ekaga ûguo nîguo Mwathani atîwe, nake nîacokagia ngatho kûrî Ngai.

⁷ Gûtirî mûndû wana ûmwe gatagatîrî getû ûtûûraga mwoyo nîûndû wa kwenda gwake, na gûtirî mûndû ûkucaga nîûndû wa kwenda gwake ke mwene.

⁸ Ethîrwa nîtûgûtûûra mwoyo nîtûtûûra nîûndû wa Kristû, na ethîrwa nî tûgûkua nîtûkua nîûndû wa Kristû. Kwoguo wana ethîrwa nîtûgûtûûra mwoyo, kana nîtûgûkua tûrî a Mwathani.

⁹ Nîûndû Kristû aakwire na agîcoka akîriûka nîguo atuîke Mwathani wa arîa akuû na arîa marî mwoyo.

¹⁰ Nîndûî gîtûmaga mûtuîre andû arîa engî? Nîndûî gîtûmaga mûnyarare aamûrûwanyûkwe? Tuonthe nîtûkaarûngama mbere ya Ngai na nîke ûgaatûtuîra.

¹¹ Nîûndû mandîko matheru maugîte atî: Mwathani augîte atîrî, “Wata ûrîa ndûûraga mwoyo, andû onthe nîmagaaturia maru mbere yakwa, na maumbûre atî nie nînie Ngai.”

¹² Kwoguo wa mûndû nîakoonania kûrî Ngai maûndû monthe marîa aaneka.

Ndûgatûme mûndû ûrîa wîngî agwa

¹³ Kwoguo nîtûtige gûtucanîra. Vandû va ûguo twagîrîrwe nî gûtua atî tûtigeke ûndû wana ûmwe ûrîa ûngîtûma mûndû ûrîa wîngî avîngwe kana agwe meviarî.

¹⁴ Na nîûndû wa kwîthîrwa tûrî kîndû kîmwe na Mwathani Jesû, nîmenyete waro atî gûtirî irio ciîthagîrwa irî njûku cio mene. Nwatî mûndû ethîrwa nwa ecirie atî kûrî irio njûku, irio icio nî njûku tu kûrî mûndû ûcio.

¹⁵ Ethîrwa irio irîa ûrîcaga nîitûmaga mûrwanyûkwe egue naaî, we ndûreka ciîko cia wendani. Ndûgetîkîre kîrîa ûkûrîa gîcûkie wîtîkio wa mûndû ûrîa Kristû aakwire nîûndû wake.

¹⁶ Ndûkanareke kîndû kîrîa wonaga kîrî Kîamro gîcambue.

¹⁷ Nîûndû ûthamaki wa Ngai tî wa kûrîa na kûnyua, nwatî nî ûthingu, thayû na gîkeno kuuma kûrî Roho Mûtheru.

¹⁸ Rîrîa andû matungatîra Kristû na njîra ta îno, nîmakenagia Ngai na magetîkîrwa nî andû arîa engî.

¹⁹ Kwoguo nîtûcaragie maûndû marîa maretaga thayû na marîa mangîtûtethia kwonganagîrîra vinya.

²⁰ Mûtigacûkie wîra wa Ngai nîûndû wa irio. Irio cionthe nî ntheru, nwatî nî naaî kûrîa irio irîa ingîtûma mûndû ûrîa wîngî agûe meviarî.

²¹ Nî ûndû mwaro gûtiga kûrîa nyama, kûnyua ndivei kana gwîka ûndû wa wonthe ûngîtûma mûndû ûrîa wîngî avîngwe.

²² Wîtîkio waku îgûrû rîa maûndû mama nî ûtuîke nthitho gatagatîrî gaku na Ngai. Gûkena nî mûndû ûrîa ûtecukaga vîndî îrîa areka ûndû ûrîa onaga ûrî mwaro!

²³ Nwatî angîthîrwa arî na nganja îgûrû rîa kîrîa arîcaga, Ngai nîamûtucagîra nîûndû areka ûndû ûrîa ûtaumanîte na wîtîkio wake. Na ûndû wa wonthe ûtaumanîtie na wîtîkio nî wîvia.