Aroma 13 - ÎVUKU RÎA ÛVORO MWARO

Kwathîkîra aathani a vûrûri

¹ Nwanginya mûndû wa wonthe athîkagîre andû arîa mathanaga. Nîûndû wathani wonthe uumaga kûrî Ngai na arîa mathanaga mavecagwa ûvoti nî Ngai.

² Kwoguo andû arîa mareganaga na wathani ûrîa ûrî kuo, methagîrwa mareganîte na wathani ûrîa Ngai avecanîte. Arîa mekaga ûguo nîmagaatuîrwa na maverithue.

³ Andû arîa mekaga waro matiagîrîrwe nî gwîtigîra athani, nwatî andû arîa mekaga naaî nîmetigagîra athani. Nwa wende kwîthîrwa ûtarî na guoya nîûndû wa mûndû ûrîa wathanaga? Coka gwîkaga maûndû marîa maro na agagûkumagia.

⁴ Nîûndû ke nî ndungata ya Ngai na arutaga wîra nîûndû wa wagîrîru waku. Nwatî ûngîka naaî, mwîtigîre nîûndû ke ethagîrwa arî na ûvoti wa kûverithia mûndû. Ke nî ndungata ya Ngai ya kûverithia arîa mekaga naaî.

⁵ Kwoguo nwanginya mûndû athîkagîre arîa mathanaga, tî nîûndû nwa makûverithie; nwatî nîûndû thamiri yaku nîrakwîra wîke guo.

⁶ Ûndû ûcio nwa guo ûtûmaga mûrute gooti nîûndû athani methagîrwa magîtungatîra Ngai vîndî îrîa mararuta wîra ûcio.

⁷ Marîvageni onthe kîrîa mwagîrîrwe nî kûmarîva. Rutagani gooti rîrîa rîonthe mwagîrîrwe nî kûruta. Îtigagîreni arîa magîrîrwe nî gwîtigîrwa, na mûtîîe arîa magîrîrwe nî gûtîîwa.

Maûndû marîa mûndû agîrîrwe nî gwîka ûrîa wîngî

⁸ Îthagîrwani mûtarî na thirî na mûndû wana ûrîkû tiga tu thirî wa kwendana mûndû na ûrîa wîngî. Ûrîa wendaga mûndû ûrîa wîngî nîmûvingiu watho.

⁹ Maathani maugîte atîrî, “Ndûkatharanie, ndûkaûragane, ndûkaîe na ndûkerirîrie kîndû kîene.” Maathani mama monthe na marîa mengî monthe mavingagua na rîathani rîmwe tu, atî: “Enda mûndû ûrîa mûriganîtie nake wata ûrîa wîendete we mwene.”

¹⁰ Ethîrwa we nîwendete mûndû ndûngîmwîka naaî. Kwoguo kwendana nî kûvingia watho wonthe.

¹¹ Nwanginya mwîke maûndû mama nîûndû nîmwîcî atî mavinda menyu ma kûramûka muume tororî nî makinyu. Nîûndû îvinda rîetû rîa kûvonoka rîrî vakuvî mûno gûkîra vîndî ya mbere rîrîa twetîkirie.

¹² Ûtukû ûrî vakuvî kûthira na mûthenya ûrî vakuvî gûka. Nîtûtige gwîka ciîko irîa ciîkagîrwa ndumarî na tûoce indo cia mbaara irîa itûmagîrwa kûrûa ûtherirî.

¹³ Nîtwîthagîrwe tûrî na mîtugo mîaro ta andû arîa mathiîcagîra ûtherirî. Tûtikethagîrwe tûrî marugarî marîa mekagwa waganu wa ûrîu, kana ciîkorî cia ûûra nthoni, ûtharia, mbaara, kana wîru.

¹⁴ Nwatî îkîrani Mwathani Jesû Kristû arî take indo cienyu cia mbaara, na mûtige kwîthînia nîûndû wa mîîrî yenyu îrîa îvagia atî nîguo mûvingie maûndû marîa îriragîria.