Aroma 12 - ÎVUKU RÎA ÛVORO MWARO

Gûtûûra nîguo ûtungatîre Ngai

¹ Kwoguo ariû na aarî a îthe wetû, nîûndû wa ntha nyîngî irîa Ngai atwonetie, namûthaitha mûrute mîîrî yenyu îrî ta îgongoona rîrî mwoyo kûrî Ngai, rîrî rîamûre nîûndû wa ûtungata wake na rîa kûmûkenia. Îno nîyo njîra yama ya kûgooca Ngai.

² Mûtikagarûrûke atî nîguo mwîkare ta andû a gûkû nthî, nwatî îtîkîrani Ngai agarûre meciria menyu viû nîguo matuîke macerû. Mweka ûguo mûkaavotaga kûmenya wendi wa Ngai. Mûkaavotaga kûmenya ûndû ûrîa mwaro na ûngîmûkenia na ûrîa mûkinyanîru.

³ Nîûndû wa wega ûrîa naveerwe nî Ngai, muonthe nîramwîra atîrî: Mûtigetue anene gûkîra ûrîa mwagîrîrwe nî kwîthîrwa mûrî. Vandû va ûguo îthagîrwani mûrî na meciria matarî ma mwîtîîo, kûringana na wîtîkio ûrîa Ngai avete wa mûndû wa mûndû.

⁴ Mûndû wa wonthe gatagatîrî kenyu ethagîrwa na mwîrî ûrî na ciîga nyîngî, na ciîga icio cionthe irutaga wîra ngûrani.

⁵ Na njîra ta îno, wana ethîrwa tûrî eengî twîthagîrwa tûrî mwîrî ûmwe na Kristû na tuonthe twîthagîrwa twovanîtue vamwe tûrî ciîga cia mwîrî ûmwe.

⁶ Tuonthe nîtûtûmîre iveo mwanya mwanya irîa Ngai atûvete ciumanîte na wega wake. Mûndû ûrîa ûrî na kîveo gîa kûvunjia ndûmîrîri ya Ngai nî avunjie kûringana na wîtîkio ûrîa avetwe.

⁷ Ûrîa ûrî na kîveo gîa gûtungata, nwanginya atungate. Ûrîa ûrî na kîveo gîa kûthomithia nwanginya athomithanie.

⁸ Ûrîa ûrî na kîveo gîa kûûmanîrîria, nwanginya aûmanagîrîrie. Ûrîa ûrî na kîveo gîa kûvecana indo ciake, nî avecanage na ûtaana. Mûndû ûrîa ûrî na kîveo gîa ûtongoria nî atongoragie na kîîo. Mûndû ûrîa ûrî na kîveo gîa kwîgucanîra ntha nîegucanagîre ntha akenete.

⁹ Nwanginya wendani wenyu ûtuîke wa ma. Menani ûndû ûrîa mûcûku na mûnyitie na vinya maûndû marîa maro.

¹⁰ Endanagani mûndû na ûrîa wîngî ta andû a ng'ina ûmwe. Vecanagani gîtîîo mûndû na ûrîa wîngî.

¹¹ Rutagani wîra na kîîo na mûtigatuîke igûta; tungatagîrani Mwathani na ngoro cienyu cionthe.

¹² Îkaragani mûkenete nîûndû mûrî na kîîrîgîrîro. Kiragîrîriani vîndî ya mathîna na mûvoyage vîndî cionthe.

¹³ Tethagiani andû a Ngai arîa mavatarîte ûtethio, na mwamûkagîre ageni mîciîrî yenyu.

¹⁴ Rathimagani andû arîa mamwîkaga naaî, marathimageni na mûtikamarume.

¹⁵ Kenagani na arîa marakena na mûrîrage na arîa mararîra.

¹⁶ Tûûrani mwîgucanîte mûndû na mûndû ûrîa wîngî. Mûtigetîîe, nwatî tumagani ûrata na andû arîa monekaga matarî îgweta. Tigagani kwîyona ta mûrî aûgî.

¹⁷ Mûndû angîgwîka naaî, ndûkamwîke naaî. Nwatî geragia gwîka andû onthe maûndû marîa maro.

¹⁸ Geragiani mûno wa ûrîa mûngîvota gûtûûrania na andû onthe mûrî na thayû.

¹⁹ Arata akwa, mûtikerîvîrie, nwatî tigani Ngai amûrîvagîrîrie na marakara make. Nîûndû mandîkorî matheru kwandîkîtwe atîrî, “‘Kwîrîvîrîria nî gwakwa, nînie ngeerîvîrîria,’ ûguo nîguo Mwathani augîte.”

²⁰ Vandû va ûguo, mandîko matheru maugîte mwagîrîrwe nî gwîka atîrî, “Ethîrwa mûndû ûrîa mûrî na ûthû nake nî mûvûtu mûve gîa kûrîa. Ethîrwa nî mûnyondu mûve kîndû gîa kûnyua, nîûndû weka ûguo nîtakwa wamwigîrîra makara marî na mwaki kîongorî gîake.”

²¹ Ndûgetîkîre kûvootwa nî ûndû mûcûku, nwatî vootaga ûndû ûrîa mûcûku na njîra ya gwîka waro.