Aroma 11 - ÎVUKU RÎA ÛVORO MWARO

Ntha cia Ngai kûrî andû a Isiraeli

¹ Kwoguo nîraûria atîrî: Nîkwa Ngai aaregire andû ake? Naarî! Nîûndû nie mwene nîrî Mûisiraeli wa rûciaro rwa Iburahimu na wa mûvîrîga wa Benjamini.

² Ngai tîmûregu andû ake arîa ke aathuurire kuuma wa Kîammbîrîria. Mue nîmwîcî ûrîa Mandîko Matheru maugîte gacunjîrî karîa kandîkîtwe ûvoro wîgiî Elija. Elija nîwathaithire Ngai na agîcuka andû a Isiraeli akiuga atîrî,

³ “Mwathani, nîmaûragîte arathi aku na magacûkangia metha ciaku cia kîgongoona. Nwa nie tu mûrathi waku ûrîa ûtigarîte na nîmarageria kûmbûraga wa nanie.”

⁴ Ngai aamûcokerie atîa? Aamûcokeria atîrî, “Nie nînîigîrîte andû ngiri mûgwanja arîa mataanavoya Baali.”

⁵ Ûguo nwa guo gûkariî wana rîu: kûrî na andû matarî eengî arîa Ngai athuurîte na njîra ya wega wake.

⁶ Ngai aamathuurire nîûndû wa wega wake nwa tî ûndû wa ciîko ciao. Nîûndû ethîrwa aamathuurîte nî ûndû wa ciîko ciao, wega ûcio wake ndûngîthîrwa ûrî wa ma.

⁷ Ûrîa kûrî nî atî Aisiraeli matiavota kûgîa na kîrîa maatwîre macaragia. Nwatî gakundi kanini karîa Ngai aathuurire nîkaavotire kûgîa na kîrîa maacaragia. Acio engî metirwe nî Ngai makîûrîria matû kîrong'oi.

⁸ Wata ûrîa Mandîko Matheru maugîte atîrî, “Ngai nîwatûmire maremwa nî gwîciiria kana gûtaûkîrwa, na nginya ûmûnthî metho mao mationaga na matû mao matiîgucaga.”

⁹ Nake Daudi nîwaugire atîrî: “Irugo ciao irotuîka mîtego ya kûmagwatithia, o nîmagwe na maverithue!

¹⁰ Metho mao marovingwa nîguo matikone, na ûtûme magîe na thîna vîndî cionthe.”

¹¹ Kwoguo nîraûria atîrî, rîrîa Ayahudi maavîngirwe-î, nîmaagwîre? Naarî! Nwatî ûrîa gwîkariî nî atî nîûndû wa mevia mao ûvonokio nîwakinyîre andû a ndûrîrî. Nao maavonoka Ayahudi nîmeguire wîru.

¹² Mevia marîa meekirwe nî Ayahudi nîmaaretire irathimo nyîngî gûkû nthî, na ûthîni wao wa ngoro nîwaretire irathimo nyîngî kûrî andû a Ndûrîrî. Kwoguo nthî îkaagîa na irathimo ciîgana atîa vîndî îrîa Ayahudi onthe magatonyua ûvonokiorî!

Kûvonokua kwa andû a Ndûrîrî

¹³ Rîu nîraria na mue andû a Ndûrîrî. Rîrîa rîonthe mbîthagîrwa nîrî mûtûmwa kûrî andû a ndûrîrî nînîrutanagîria ûtungatarî wakwa,

¹⁴ nîguo ndûme andû a rûruka rwakwa na nîo Ayahudi megue wîru, na na njîra îo, ndethie amwe kûvonoka.

¹⁵ Nîûndû rîrîa Ngai aaregire Ayahudi, andû acio engî a nthî nîmaatuîkire arata ake. Kwoguo rîrîa Ngai ageetîkîra Ayahudi, andû arîa makeethîrwa marî akuû nîmakaariûka.

¹⁶ Ethîrwa kîenyûa Kîam mûgate kîrutîrîtwe Ngai nî kîtheru, mûgate wonthe nî mûtheru. Ethîrwa mîri ya mûtî îrutîrîtwe Ngai nî mîtheru, wana mvûa nî ntheru.

¹⁷ Mvûa imwe cia mûtî wa mûtamaiyû nî ngavûrange, na ruo rûvûa rwa mûtî wa mûtamaiyû wa kîthaka rûgaciarithanua na guo. Mue andû a Ndûrîrî mwîkariî ta mûtamaiyû ûcio wa kîthaka. Nîmûtethekaga nî kîrîa kiumaga kûrî Ayahudi na njîra ta îrîa rûvûa rwa mûtamaiyû wa kîthaka rûtethekaga rwaciarithanua na mûtamaiyû ûrîa wa mûgûndarî.

¹⁸ Kwoguo mûtiagîrîrwe nî kûnyarara andû arîa Ngai aakavûrangire ta mvûa. Mûtiagîrîwe nî gwîtîîa nîûndû mwîkariî wata rûvûa, tî mue mûnyitagîrîra mîri, mîri nîyo îmûnyitagîrîra.

¹⁹ Nwatî nwa muge atîrî, “Mvûa ciakavûrangirwe nîguo tûciarithanue na mûtî.”

²⁰ Nî ûvoro wa ma. Mvûa ciakavûrangirwe nîûndû itietîkia na mue mwîthagîrwa mûrî gîcunjî Kîam mûtî ûcio nîûndû nîmwîtîkîtie. Nwatî ndûgetîîe nîûndû wa ûguo, vandû va ûguo îîtigîreni.

²¹ Ethîrwa Ngai ndaacaîra mvûa irîa ciarî mûtîrî ûrîa wa mbere na nîyo Ayahudi, angîmûcaîra atîa?

²² Ûndû ûyû ûratwonia ûrîa Ngai arî mûtugi, na ûrîa arî mwaganu. Ke nîwaganagîra andû arîa magwîte na agatuga arîa matûûraga wegarî wake, nwatî ethîrwa tîmwîkara wegarî wake, nîakûmûkavûranga!

²³ Na ethîrwa Ayahudi nwa macoke gwîtîkia Ngai rîngî nwa maciarithanue, nîûndû Ngai arî na ûvoti wa kûmaciarithania rîngî.

²⁴ Andû a Ndûrîrî mekariî ta rûvûa rwa mûtamaiyû wa kîthaka rûrîa rûkavûre rûgacoka rûgaciarithanua na njîra îtarî ya kîndûîre na mûtî wa mûtamaiyû wa mûgûndarî. Ayahudi mekariî ta mûtî ûcio wa mûgûndarî. Nîûndû wa ûguo nî ûvûthû Ngai gûcokanîrîria mvûa icio ngavûrange cia kîndûîre mûtîrî wa cio.

Ntha cia Ngai kûrî andû onthe

²⁵ Ariû na aarî a îthe wetû, nie nînîrenda kûmûmenyithia ûma ûrîa mûthithe nîguo mûtigekare mûkîîraga na ngoro cienyu atî mûrî aûgî mûno. Ûma ûcio nî atî ûremi wa andû amwe a Isiraeli tî wa gûtûûra, nwatî ûkethagîrwa vo tu nginya rîrîa andû onthe a Ndûrîrî magaûka kûrî Ngai.

²⁶ Ûguo nîguo Aisiraeli onthe makaavonokua. Wata ûrîa mandîko matheru maugîte atîrî, “Mûvonokia nîagaaûka kuuma Zayuni, na nîakaathengutia waganu wonthe kuuma rûciarorî rwa Jakovu.

²⁷ Nie nîngaathondeka kîrîkanîro gîkî na andû acio, vîndî îrîa ngaathengutia mevia mao.”

²⁸ Ayahudi nîmaregete Ûvoro Mwaro. Kwoguo o nî nthû cia Ngai nîûndû wenyu mue andû a Ndûrîrî. Nwatî nîûndû Ayahudi nîathuure nî Ngai nî arata ake nîûndû wa methe mao ma tene.

²⁹ Nîûndû Ngai arathuura mûndû na akîmûrathima, ndagarûrûkaga.

³⁰ Mue andû a Ndûrîrî nîkûrî vîndî mwatûîre mûremerete Ngai, nwatî rîu nîmûrîkîtie kwîguîrwa ntha nî Ngai nîûndû Ayahudi nîmaaregire kwathîka.

³¹ Na njîra wata îo nîûndû wa ntha irîa mweguîrîrwe nî Ngai, Ayahudi nîmaregete kwathîka nîguo wanao meguîrwe ntha.

³² Nîûndû Ngai nîatûmîte andû onthe matuîke ta marî ove nîûndû wa ûremi wao nîguo acoke ameguîre ntha onthe.

Ngai nîakumue

³³ Na kaî ûtonga wa Ngai nî mûnene-î! Na kaî ûûgî wake na ûmenyo nî mûrikîru-î! Nû ûngîtaarîria matua make? Nû ûngîmenya njîra ciake?

³⁴ Wata ûrîa mandîko matheru maugîte atîrî: “Nû wîcî meciria ma Mwathani? Nû ûngîvota kûmûtaara?

³⁵ Nû wanamûva wanarî kîndû, atî nîguo acoke arîvwe nîke?”

³⁶ Nîûndû indo cionthe ciaûmbirwe nîke na indo cionthe itûîre nîûndû wa ûvoti wake na nî ciake. Nake arokumua tene na tene! Ameni!