Aroma 10 - ÎVUKU RÎA ÛVORO MWARO

¹ Ariû na aarî a îthe wetû, wendi wa ngoro yakwa yonthe na mavoya makwa kûrî Ngai nî atî, andû etû mavonoke.

² Nie nîrî mûira wao atî methagîrwa marî na kîîo kînene mûno wîrarî wa Ngai, nwatî matiîthagîrwa marî na ûmenyo.

³ Nîûndû wa kûrega kûmenya ûthingu ûrîa uumaga kûrî Ngai, o nîmageretie kwîrûthîra ûndû wao o ene. Kwoguo nîmaaregire kûrûmîrîra njîra îrîa Ngai atûcaga mûndû mûthingu.

⁴ Nîûndû Kristû nîwathiririe watho nîguo mûndû wa wonthe ûmwîtîkîtie etîkîrîke nî Ngai.

Ûvonokio nî wa andû onthe

⁵ Musa nîwandîkire ûvoro wîgiî ûrîa mûndû atuîkaga mûthingu na njîra ya kwathîkîra watho na akiuga atîrî: “Mûndû wa wonthe wathîkagîra watho nî agaatûûra mwoyo.”

⁶ Nwatî ûvoro wîgiî ûthingu ûrîa mûndû agîcaga naguo nîûndû wa gwîtîkia, Mandîko Matheru maugaga atîrî: “Ndûkeyûrie we mwene nû ûkunûkia îgûrû (ûguo nî kuga, Nû ûkunûkia îgûrû na arete Kristû gûkû nthî?”)

⁷ Ndûkeyûrie we mwene nû ûkûnyûrûrûka rungu rwa nthî (ûguo nî kuga, “Nû ûkûnyûrûrûka îrimarî rîrîa rîtarî mûthiia na atûme Kristû aunûkie kuuma kûrî arîa akuû?”)

⁸ Mandîko Matheru maugîte atî: “Ûvoro mwaro ûrî vakuvî nawe, ûrî kanyuarî gaku na njararî yaku.” Ûguo nî kuga ûvoro wa wîtîkio ûrîa tûvunjagia.

⁹ Nîûndû ûngiumbûra na kanyua gaku atî Jesû nî Mwathani na wîtîkie na ngoro yaku atî Ngai nîwamûriûkirie, nî ûkaavonoka.

¹⁰ Nîûndû mûndû etîkagia na ngoro agatuuwa mûthingu, na akaumbûra na kanyua gake na akavonoka.

¹¹ Mandîko matheru maugîte atîrî, “Mûndû wa wonthe ûmwîtîkîtie ndagaaconorithua.”

¹² Nîûndû gûtirî ngûrani gatagatîrî ka Mûyahudi na mûndû wa Ndûrîrî. Ngai nî Mwathani wa andû onthe na nîavecanaga irathimo ciake nyîngî kûrî andû onthe arîa mamûkaagîra.

¹³ Nîûndû Mandîko Matheru maugîte atîrî, “Mûndû wa wonthe ûgaakaîra Ngai-Mûnene nî akaavonoka.”

¹⁴ Nwatî andû mangîkaîra Mwathani atîa ethîrwa matîmwîtîkîtie? Na mangîtîkia atîa mateguîte ndûmîrîri ya Mwathani? Andû mangîgua ndûmîrîri atîa gûtarî na mûvunjia.

¹⁵ Nao andû mangîvunjia atîa matarî atûme. Mandîko Matheru maugîte atîrî, “Na kaî andû arîa mathiîcaga kûvunjia ûvoro Mwaro nî aro-î!”

¹⁶ Nwatî tî andû onthe maamûkîre ûvoro mwaro. Nîûndû Isaia nî waûririe atîrî, “Mwathani, nû wetîkirie ndûmîrîri yetû?”

¹⁷ Kwoguo wîtîkio umanaga na kwîgua ûvoro mwaro, naguo Ûvoro Mwaro umanaga na kûvunjia ûvoro wîgiî Kristû.

¹⁸ Nwatî nîmbûria atîrî: Nîma atî andû matirî megua ûvoro mwaro? Nîma nîmeguîte nîûndû Mandîko Matheru maugîte atîrî: “Mîgambo yao nîyathiîre nthî yonthe, na ciugo ciao igîkinya ituri cionthe cia nthî.”

¹⁹ Wana rîngî nîmbûria atîrî: Nîkwa andû a Isiraeli mataataûkîrwa? Nîma nîmaataûkîrwe. Musa nîwaugire wa mbere atîrî: “Nîngaatûma mwîgue wîru nîûndû wa rûrîrî vatarî, na njîra ya rûrîrî rwa andû aritu nîngaatûma mûrakare.”

²⁰ Nake Isaia wanake nîaugîte arî na ûmîrîru atîrî: “Nînoonirwe nî andû arîa mataanjaragia; nîneyumîririe kûrî andû arîa mataambûragia.”

²¹ Nwatî ûvoro wîgiî Isiraeli Ngai augîte atîrî, “Natindire mûthenya mûgima ndambûrûkîtie njara kûrî andû aremi na aûmû ngoro.”