Alawi 26 - ÎVUKU RÎA ÛVORO MWARO

Irathimo nîûndû wa kwathîkîra Ngai

¹ Ngai-Mûnene nîwerire andû a Isiraeli atîrî, “Mûtikerûthîre ngai cia mîvuanano kana mûvuanano wa îthiga rîrî riumie atî nîguo mûigoocage. Nie nînie Ngai-Mûnene, Ngai wenyu.

² Menyagîrîrani mîthenya yakwa ya thavatû na mûtîîage vandû varîa ngoocagîrwa. Nie nînie Ngai-Mûnene.

³ “Ethîrwa mûkaamenyagîrîra maathani makwa na mwathîkagîre irîra ciakwa,

⁴ nî ngaamurithîria mbura kavinda karîa kagîrîru, nîguo mîgûnda yenyu îgîcage na irio nyîngî na mîtî îciare matunda.

⁵ Irio cienyu nîikengîva na mûikethage nginya vîndî ya gûketha thavibu, na mûkethîrwa mûgîketha thavibu nginya vîndî ya kûvanda ngano. Mûkethagîrwa mûrî na irio nyîngî irîa mûvatarîte na mûtûûre vûrûrirî wenyu mûrî agitîre.

⁶ “Nî ngaamûva thayû vûrûrirî wenyu, na mûkaamamaga mûtagwîtigîra wanarî mûndû. Nî ngaathiria nyamû cionthe njûku vûrûrirî na mûtikaarûa na nthû cienyu rîngî.

⁷ Nî mûkaarûa na nthû cienyu na mûivoote.

⁸ Andû atano enyu nî makaavoota andû îgana, nao andû îgana enyu nîmakaavoota andû ngiri îkûmi na nî mûkaavoota nthû cienyu.

⁹ Nîngaamûrathima na ndûme mwongerereke na nîngaavingia kîrîkanîro kîrîa naarûthire namue.

¹⁰ Irio cienyu nîikeengîva mûno, na vîndî ya maketha nîkwa mûgaata irîa ngûrû nîguo irîa ikethîrwa igîkethwa cione gwa kwigwa.

¹¹ Ngaatûûra gatagatîrî kenyu nîrî îgemarî rîakwa rîtheru na ndikaamûtiganîria.

¹² Ngethagîrwa nîrî namue na ngethîrwa nîrî Ngai wenyu, namue mwîthagîrwe mûrî andû akwa.

¹³ Nie nînie Ngai-Mûnene, Ngai wenyu, ûrîa wamûrutire vûrûri wa Misiri nîguo mûtigatuîke ngombo ciao rîngî. Nînaamwovorire mînyororo îrîa mwovetwe nayo na ngîtûma mûthiîcage mûrî na wîyathi.”

Îvera nîûndû wa kûrega kwathîkîra Ngai

¹⁴ Ngai-Mûnene nîwerire andû a Isiraeli atîrî, “Mwarega kûnthikîrîria na mwathîkîre Maathani makwa,

¹⁵ mwarega kûvingia maathani makwa na irîra ciakwa na mûrege kûvingia kîrîkanîro kîrîa naarûthire namue,

¹⁶ nî ngaamûverithia. Nî ngaamûretere mîrimû îtakaavora na mîrimû ya kûviûva mwîrî îrîa îgaatûma mûtuîke ndumumu na mûthirwe nî vinya. Mûkaavandaga irio, nwatî mûtikaairîa, nîûndû nthû cienyu nîcio igaaketha irio icio na iirîe.

¹⁷ Nîngaamûtiganîria nîguo mûkaavootwa nî nthû cienyu, nao andû arîa mamûmenete nî makaamwatha. Mûkaamaka nginya mûrage wana gûtarî mûndû ûmûvinyûrithîtie.

¹⁸ “Ethîrwa wana neka maûndû mau monthe mûtikaavingia Maathani makwa, nî ngaamûverithia makîria nîûndû wa mevia menyu.

¹⁹ Nî ngaathiria vinya ûcio ûtûmaga mwîtîîe. Gûtikethîrwa na mbura na gûtirî irio igaakûra vûrûrirî wenyu.

²⁰ Wana mwaruta wîra na kîîo kînene atîa, wîra wenyu ndûkaamûtethia, nîûndû gûtirî irio igaakûra vûrûrirî wenyu na mîtî ya kuo ndîgaaciara maciaro.

²¹ “Ethîrwa nî mûkaathiî na mbere kûregana nanie na mûrege kûmbathîkîra nî ngaamûverithia maita mûgwanja makîria ya mevia menyu.

²² Nîngaarekereria nyamû njûku ciûke kûrî mue nîguo ciûrage ciana cienyu, ciûrage nyamû irîa mûrîthagia na mûtigare andû anini mûno, na njîra cienyu iture andû a kûthiîra.

²³ “Na ethîrwa vuva wa îvera rîîrî nwa mûkaathiî mbere na kûregana nanie na mûrege kûmbathîkîra,

²⁴ Nie mwene nî ngaaregana namue na nîmûverithie maita mûgwanja nîûndû wa mevia menyu.

²⁵ Nîngaarekereria nthû cienyu irûe namue nîguo nîmûverithie nîûndû wa kûrega kûvingia kîrîkanîro gîetû. Na wana mwaûngana vamwe matûûrarî menyu nîguo mûgitîrwe, nî ngaamûtûmîra mûrimû mûcûku mûno wa kûûraga andû eengî mûno gatagatîrî kenyu na nî ngaamûrekereria kûrî nthû cienyu.

²⁶ Nîngaatûma mûgîe na yûra rînene, na aka îkûmi makaarugagîra rikorî rîmwe. Nîmakagaanaga wa mûndû kîthimo gîake, na wana maarîa matikavaa.

²⁷ “Ethîrwa vuva wa maûndû mama monthe nwa mûkaathiî mbere kûregana nanie na mûrege kûmbathîkîra,

²⁸ nîngaaregana namue nîrî na marakara, na nîmûverithie maita mûgwanja nîûndû wa mevia menyu.

²⁹ Yûra nî rîkaaneneva mûno nginya rîtûme mûrîcage ciana cienyu.

³⁰ Nîngoomomora kûndû kûrîa mûgoocagîra mûrî îgûrû rîa irîma, nyomomore metha cienyu cia magongoona cia kûvîvîria ûbani na mbikie ciimba cienyu îgûrû rîa mîvuanano yenyu îno mîkuû, na nîmûnyarare.

³¹ Nîngaacûkangia matûûra menyu viû, njûkangie viû kûndû kûrîa mûgoocagîra na ndikaamûkîra magongoona menyu.

³² Ngaacûkangia vûrûri wenyu viû, nacio nthû cienyu irîa îgaatûûra kuo nî ikaamakua nî ûrîa vûrûri ûcio ûkethîrwa ûcûkangîtue.

³³ Nîngaatûma mûrûe mbaara na nîmûnyaganie mavûrûrirî marîa mengî. Vûrûri wenyu nîûgaatiganîrua, na matûûra menyu matigwe marî momokangu.

³⁴ “Rîrîa mûkethîrwa mûrî mavûrûrirî ma nthû cienyu, mîgûnda yenyu nîkaavurûka na îkûngûîre thavatû irîa mûtaakûngûagîra.

³⁵ Rîrîa rîonthe vûrûri wenyu ûka ethîrwa ûrî îganjo nîûkaavurûka, nîûndû ndwavurûkaga kavinda karîa mwatûûraga kuo.

³⁶ Nîngaatûma andû enyu arîa marî îthamîriorî mecûrwe nî guoya nginya mamakague nî mûgambo wa îthangû rîkinainua nî rûkûngi. Mûkaaûraga takwa mûvinyûrîtue mûkîûrîra mbaara, na mûkaagûcaga wana gûtarî nthû imûvinyûrîtie.

³⁷ Mûkaavîngîcanaga mue ene takwa mûrîte mûtikaûragwe vîndî îrîa gûtarî mûndû ûmûvinyûrîtie, na mûtikaavota kûrûa na nthû cienyu.

³⁸ Mûthiiarî mûgaakuîra îthamîriorî na mûthikwe kûu vûrûrirî wa nthû cienyu.

³⁹ Andû enyu anini arîa magaatigara nî makoorera mavûrûrirî ma nthû cienyu nîûndû wa mevia mao na mevia ma methe mao.

⁴⁰ “Nwatî njiarwa cienyu nî ikaaumbûra mevia mao na mevia ma methe mao ma tene, arîa maareganire nanie na makîrega kûmbathîkîra.

⁴¹ Nînaareganire nao na ngîmavira îthamîriorî vûrûrirî wa nthû ciao. Mûthiiarî ethîrwa njiarwa cienyu nîikenyivia na ciîrire itige kwîvia,

⁴² nîngaavingia kîrîkanîro kîrîa naarûthire na Iburahimu, Isaka na Jakovu, na ndirikane vûrûri ûrîa naamwîrîre atî nîngaamûva.

⁴³ Nwatî mbere, andû nî makaauma vûrûrirî ûcio, naguo nîûkaavurûka na ûkûngûîre thavatû cia guo, na nwanginya makaaverithua nîûndû wa mevia mao ma kûregana na mawatho na irîra ciakwa.

⁴⁴ Nwatî kûnarî ûguo, ndikaamatiganîria viû kana nîmacûkangia viû vîndî îrîa makethîrwa marî vûrûrirî wa nthû ciao, atî nîguo wîthîrwe ûrî mûthiia wa kîrîkanîro gîetû nao, nîûndû Nie nînie Ngai-Mûnene, Ngai wao.

⁴⁵ Nwatî nîngaavingia kîrîkanîro kîrîa naarûthire na methe mao ma tene rîrîa nonanirie vinya wakwa mavûrûrirî monthe na njîra ya kûruta andû akwa vûrûri wa Misiri, nîguo Nie Ngai-Mûnene nduîke Ngai wao.”

⁴⁶ Mama nî mawatho, irîra na maathani marîa Ngai-Mûnene aaveere andû a Isiraeli kûvîtûkîrîra kûrî Musa kîrîmarî gîa Sinai.