Alawi 25 - ÎVUKU RÎA ÛVORO MWARO

Mwaka wa mûgwanja

¹ Rîrîa Musa aarî kîrîmarî gîa Sinai Ngai-Mûnene nîwamwîrire atîrî,

² “Îra andû a Isiraeli atî mwathiî vûrûrirî ûrîa ngûmûva, mûkaavurûkaga mwaka wa mûgwanja, nîguo magooce Ngai-Mûnene.

³ Mûkaavandaga irio mîgûndarî yenyu, mûmenyagîrîre mîgûnda yenyu ya mîthavibu, na mûnganagie maketha ma mîgûnda îo îvindarî rîa mîaka îtandatû.

⁴ Nwatî mwaka wa mûgwanja mûtikarîme mîgûnda. Mwaka ûcio nî thavatû ya Ngai-Mûnene. Mûtikavandage irio mîgûndarî yenyu kana mûmenyerera mîgûnda yenyu ya mîthavibu.

⁵ Wana mûtigakethage makûra, na mûtikaûnganagie thavibu kuuma mîthaviburî îrîa îtarî mîmenyerere. Ûcio nî mwaka ûrîa mîgûnda îkaavurûkaga.

⁶ Wana ethîrwa mîgûnda îo ndîkaarîmwa mwaka ûcio, nîgûkaauma irio cienyu, cia ngombo cienyu, cia andû arîa mwandîkîte, cia ageni arîa mûtûûranagia nao,

⁷ cia nyamû cienyu irîa mûrîthagia na cia nyamû cia kîthaka irîa ciîthagîrwa irî mîgûndarî yenyu. Nwa mûrîe indo cionthe irîa ciumaga mîgûndarî îo.

Mwaka wa gûcokia indo irîa icunanîtwe

⁸ “Mûgaatara mîaka mûgwanja maita mûgwanja, na yonthe îkethîrwa îrî mîaka mîrongo îna na kenda.

⁹ Nîmûgaacoka mûvuve tûrumbeta vûrûrirî wonthe mûthenya wa îkûmi mwerirî wa mûgwanja. Ûcio nîguo mûthenya wa mambura ma kûtheria mevia.

¹⁰ Ûguo nîguo mûkaamûra mwaka wa mîrongo îtano na mwanîrîre wîyathi kûrî andû onthe arîa matûûraga vûrûrirî ûcio. Indo cionthe irîa ikethîrwa ciendetue nîigaacokerua ene kana njiarwa ciao, nake mûndû wa wonthe wendetue arî ngombo nîagaacoka kwa andû ao.

¹¹ Mûtikaavanda irio mîgûndarî yenyu kana mûketha makûra, kana mûngania thavibu kuuma mîthaviburî yenyu îrîa îtarî mîmenyerere.

¹² Nîmûkaamûrîra Ngai mwaka ûcio wonthe. Mûkaarîcaga makûra tu kuuma mîgûndarî îo.

¹³ “Indo cionthe irîa ciendetue igaacokerua ene mwakarî ûcio wa mîrongo îtano.

¹⁴ Kwoguo ûkîenderia Mûisiraeli ûrîa wîngî mûgûnda kana ûkîgûra kuuma kûrî ke, mûkeegucanîra ûrîa kwagîrîrîte.

¹⁵ Vîndî îrîa mûkûgûra kana mûkwendia mîgûnda, îrîvi rîa mîgûnda îo rîkaaringanaga na irio irîa ingîkethwa mîgûndarî îo mbere ya mwaka ûcio wa gûkûngûîra.

¹⁶ Ethîrwa mîaka îrî mîîngî, îrîvi rîkethîrwa rîrî înene, nwatî ethîrwa mîaka îtarî mîîngî, îrîvi rîkethîrwa rîrî înini nîûndû kîrîa gîkwendua nî irio irîa ingîvota gûkethwa mûgûndarî ûcio.

¹⁷ Mûtikaveenie Aisiraeli arîa engî, nwatî mwîtigagîre Ngai-Mûnene, Ngai wenyu.

Ngai nîakaavecana irio cia kûrîwa mwaka wa thavatû

¹⁸ “Vingagiani Maathani makwa na irîra ciakwa, nîguo mûtûûre vûrûrirî mûrî na thayû.

¹⁹ Nîgûgaakûra irio vûrûrirî ûcio na nî mûkaagîa irio cia kwîgana na mûtûûre mûrî na thayû.

²⁰ “Nwatî nwa mwîyûrie kîrîa mûkaarîa mwakarî wa mûgwanja mwarega kûvanda kana mûketha irio.

²¹ Nie, Ngai-Mûnene nî ngaarathima mîgûnda mwakarî wa gatandatû na nî gûkaauma irio irîa mûkaarîa îvinda rîa mîaka îîrî.

²² Mwavanda irio mîgûndarî yenyu mwakarî wa kanana, mûkethîrwa mûkîrîcaga irio irîa mûkethîrwa mûkethete mwakarî wa gatandatû na mûkethîrwa mûrî na irio cia kwîgana nginya rîrîa irio irîa mûkaavanda igaakethwa.

Gûcokia mîgûnda îrîa yendetue

²³ “Mûtiagîrîrwe nî kwendia mûgûnda wenyu viû, nîûndû tî wenyu. Nî wakwa, na mue mûrî ageni evîtûkîri arîa etîkîrie gûûtûmîra.

²⁴ “Vîndî îrîa mûgûnda ûkwendua, mûndû ûrîa warî mwene guo mbere nwanginya avewe kamweke ga kûûgûra arî wa mbere.

²⁵ Mûisiraeli angîkaathîna na endie mûgûnda wake, mûrwang'ina ûrîa maciaranîrîtue nake nwanginya akaagûra mûgûnda ûcio rîngî.

²⁶ Ethîrwa mûndûmûrûme atarî na mûrwang'ina ûrîa maciaranîrîtue nake ûngîgûra mûgûnda ûcio rîngî, na vuvarî mûndû ûcio ke mwene agîe na mbeca nyîngî ingîûgûra,

²⁷ nîagaatara mbeca cia mwîgana wa irio irîa irî mûgûndarî ûcio na airute kuuma kûrî mbeca irîa endeetie mûgûnda, acoke oce mûgûnda wake.

²⁸ Nwatî ethîrwa atarî na mbeca mbîganu cia kûgûra mûgûnda wake rîngî, mûgûnda ûcio ûkethîrwa ûrî wa mûndû ûrîa waûgûrire nginya mwakarî wa mîrongo îtano rîrîa agaacokerua guo. Mwakarî ûcio nîrîo mwene mûgûnda ûcio agîrîrîwe nî gûcokerua guo.

²⁹ “Mûndû angîendia nyomba îrîa ekaraga îtûûrarî rîrî ririgîre na rûthingo, mûndû ûcio arî na kîvooto gîa gûkûûra nyomba îo rîngî mwakarî wa mbere wonthe kuuma mûthenya ûrîa aamîendirie.

³⁰ Nwatî angîrega kûmîkûûra rîngî mwakarî wa ûcio, ndagîrîrwe nî kûmîgûra rîngî, na nyomba îo îgaatûûra îrî ya mûndû ûcio ûmîgûrîte viû na njiarwa ciake. Ndîgaacokerua mwene mwakarî wa mîrongo îtano.

³¹ Nwatî nyomba irîa irî icagirî irîa itarî mbirigîre na rûthingo igeekagwa ta mîgûnda. Ene cio nwa maikûûre rîngî na ciagîrîrwe nî gûgaacokua mwakarî wa mîrongo îtano.

³² Kûnarî ûguo, Alawi nwa magûre rîngî nyomba ciao irîa irî matûûrarî mao kûrîa matwîre wa rîrîa mangîenda.

³³ Ethîrwa nyomba wa yonthe îrî îtûûrarî rîmwe rîa mama nwa yendue nî Mûlawi na arege kûmîgûra rîngî, nwanginya îgaacokua mwakarî wa gûcokerua indo, nîûndû nyomba cia Alawi irîa irî matûûrarî mao nî itûûra irî ciao gatagatîrî ka andû arîa engî a Isiraeli.

³⁴ Nwatî gûtirî mûndû wagîrîrwe nî kwendia mîgûnda îrîa îthiûrûrûkîrîtie matûûra ma Alawi, îgaatûûra îrî yao.

Gûtethia athîni

³⁵ “Ethîrwa Mûisiraeli ûrîa wîngî mûtûûranîrîte nake nîwatuîka mûthîni na eremwa, nwanginya mûmûtethagie na kîrîa angîvatara, nîguo mûvotage gûtûûrania nake wata ûrîa mûtethagia ageni arîa mûtûûranagia nao.

³⁶ Mûtikamwîtie maciaro ma kîrîa mûmûkombithîtie, nwatî athîkagîrani Ngai na mûtûûranie na Mûisiraeli ûrîa wîngî.

³⁷ Mûtikamûkombithie mbeca atî nîguo akaarîva na maciaro, na mûtikamûnengere irio atî nîguo akaamûrîva irî nyîngaîngî.

³⁸ Nie nînie Ngai-Mûnene, Ngai wenyu, ûrîa wamûrutire vûrûri wa Misiri nîguo nîmûve vûrûri wa Kanaani nîguo nduîke Ngai wenyu.

Mawatho megiî ûkombo

³⁹ “Ethîrwa Mûisiraeli ûrîa mûtûûranîrîte nake nîwatuîka mûthîni na eyendia kûrî we arî ngombo ndûkamûrutithie wîra ta ngombo.

⁴⁰ Ke agekaranagia nawe arî ta mûndû mwandîke na ta mûgeni na agûtungatagîre nginya mwaka wa mîrongo îtano.

⁴¹ Vîndî îo nîrîo ke na ciana ciake makaauma gwaku na macoke vûrûrirî wa methe mao.

⁴² Andû a Isiraeli nî ngombo ciakwa, na nînie naamarutire vûrûri wa Misiri. Matiagîrîrwe nî kwendua marî ngombo.

⁴³ Ndûkamwathe ûmûvinyîrîrîtie, nwatî wathîkagîre Ngai waku.

⁴⁴ Mûngîvatara ngombo, nwa mûigûre kuuma mavûrûrirî marîa mamûthiûrûrûkîrîtie.

⁴⁵ Wana nwa mûgûre ciana cia ageni arîa mûtûûranagia nao. Ciana ta icio iciarîrîtwe vûrûrirî wenyu nwa ituîke indo cienyu.

⁴⁶ Nwa mûnenganîre ciana icio kûrî avîcî enyu marî îgai rîao, nîguo imatungatagîre ûtûûrorî wao. Nwatî mûtikathe Aisiraeli arîa engî mûmavinyîrîrîtie.

⁴⁷ “Mûgeni ûrîa mûtûûranagia nake angîtonga, nake Mûisiraeli wenyu athîne na eyendie arî ngombo kûrî mûgeni ûcio kana kûrî mûndû wa mûciî wao,

⁴⁸ Vuva wa kwendua, Mûisiraeli ûcio nwa akûûrwe rîngî nî ûmwe wa aa mûrwang'ina,

⁴⁹ kana mamawe kana mûvîcî wa mûrwang'ina na îthe kana mûndû wîngî wa nyomba yao; kana ke mwene angîtonga nwa ekûûre.

⁵⁰ Mûisiraeli ûcio ngombo nwanginya makaaranîria na mûndû ûcio wamûgûrire na nwanginya magaatara mîaka kuuma rîrîa eeyendirie nginya mwaka ûcio wîngî wa mîrongo îtano. Îvinda rîrîa akethîrwa ekarîte kwa mûgeni ûcio rîgaatarwa kûringana na mûcara wa mûndû arî mwandîke.

⁵¹ Ethîrwa mîaka îrîa îtigarîte nginya mwaka wa gûcokia indo nî mîngî, agaacokia mbeca nyîngî ta irîa ciarîvirwe akîgûrwa.

⁵² Ethîrwa nî mîaka mînini nginya mwaka wa gûcokerua indo mwaka wa mîrongo îtano, nwanginya agaatara mbeca mwîgana ta wa mbeca cia mîaka îrîa îtigarîte mûndû arî mwandîke nginya mwaka ûcio wa gûcokerua indo.

⁵³ Mûgeni ûcio ageekaraga na Mûisiraeli ûcio ta mûndû andîkîtwe mwaka wa mwaka. Kwoguo ndagîrîrwe nî kûmwatha amûvinyîrîrîtie Aisiraeli acio engî makîonaga.

⁵⁴ Ethîrwa tîakûûrwa na njîra îmwe ya icio, ke vamwe na ciana ciake nwanginya makaarekererua mwakarî ûcio wîngî wa mîrongo îtano.

⁵⁵ Kwoguo andû a Isiraeli nî akwa, nî ndungata ciakwa irîa naarutire vûrûri wa Misiri. Nie nînie Ngai-Mûnene, Ngai wenyu.”