Agal 5 - ÎVUKU RÎA ÛVORO MWARO

Îkara ûrî na wîyathi

¹ Tue tûrî na wîyathi rîu nîûndû Kristû nîwatûrutire ûkomborî! Kwoguo îkaragani ta andû marî na wîyathi na mûtigetîkîre gûcoka ûkomborî rîngî.

² Tanthikîrîriani! Nie Paûlo nîramwîra atî ethîrwa nwa mwîtîkîre kûrwithua, ûguo nî ta kuga mûtirî na vata wa Kristû wana vanini.

³ Wa rîngî nîngwîra mûndû wa wonthe wîtîkagîra kûrua atî ke nîwagîrîrwe nî kwathîkîra watho wonthe.

⁴ Mue arîa mûgeragia gûtuuwa athingu na njîra ya kûrûmîrîra watho, nîmûthengutîrîte Kristû na nîmumîte wegarî wa Ngai.

⁵ Tue twîthagîrwa tûrî na mwîvoko atî Ngai nîagaatûtua athingu. Ûndû ûcio nîguo twîthagîrwa twetererete tûrî na wîtîkio na tûvotithîtue nî Roho wa Ngai.

⁶ Nîûndû rîrîa tûrî ûrûmwe na Jesû Kristû, ûndû ûrîa ûrî vata tî kûrua kana kûrega kûrua, nwatî nî wîtîkio ûrîa ûrutaga wîra na njîra ya wendani.

⁷ Nîmwathiîte na mbere waro mûno! Nû wamûgiririe kwathîkagîra ûvoro ûrîa wa ma?

⁸ Ûrîa ûmwîtaga tîke wamûgiririe.

⁹ Ndawa nini ya kwimbia mîgate nîimbagia mûtu wonthe ûrîa wîthagîrwa ûkimanîtue nayo.

¹⁰ Nîrî na mwîvoko atî mûtingîgarûrûka nîûndû tuonthe tûrî na ûrûmwe na Mwathani. Nake mûndû ûrîa ûramûthînia wana ethîrwa ke nû, nî agaatuîrwa nî Ngai.

¹¹ Ariû na aarî a îthe wetû, ethîrwa nwa mvunjagia atî nî waro kûrua, nîkî kîratûma nyarirwe? Ethîrwa ûvoro ûcio nî wa ma, maûndû marîa mvunjagia megiî mûtharava wa Kristû matingîrete thîna.

¹² Nwa mende andû acio maramwagagia mathiî na mbere nginya mekarambe o ene.

¹³ Ariû na aarî a îthe wetû, mwetirwe nîguo mwîyathe. Nwatî mûtikanareke wîyathi ûcio wenyu ûtûme mûtongorue nî merirîria ma mwîrî. Vandû va ûguo tigani wendani ûtûme mûtungatanagîre mue ene.

¹⁴ Nîûndû watho wonthe ûvingagua nî rîathani rîmwe rîrîa riugaga; “Enda mûndû ûrîa mûriganîtie nake wata ûrîa wîyendete we mwene.”

¹⁵ Nwatî ethîrwa mwîkaga ta nyamû cia kîthaka, mûgatûma andû maturwe na mathînanie. Îîmenyerereni nîûndû nwa mûthiranie viû.

Roho na ûmûndû

¹⁶ Nie nîrauga atî mûtûûre mûtongoretue nî Roho, na mweka ûguo mûtikaavingagia merirîria ma mwîrî.

¹⁷ Nîûndû merirîria ma mwîrî nîmareganîte na wendi wa Roho, naguo wendi wa Roho nîûreganîte na merirîria ma mwîrî. Mwîrî na Roho nîireganîte. Kwoguo mûtingîvota gwîka wa ûrîa mûkwenda.

¹⁸ Ethîrwa mûtongoragua nî roho, mûtirî rungu rwa watho.

¹⁹ Maûndû marîa macûku mekagwa nî mwîrî nîmeyonanîtie, namo nî: ûtharia, gwîka ciîko njûku na cia ûûra nthoni,

²⁰ kûgooca mîvuanano, kûrogana, kûmenana, kûrûa, wîru, marakara, kwîenda, kwamûkana,

²¹ Rwetho, ûrîu na gwîka ciîko cia gwîkenia nîûndû wa kûrîwa, na gwîka maûndû mengî ma mîthemba ta îo. Nîngûmûkaania wata ûrîa naamûkanirie wa rîngî, atî andû arîa mekaga maûndû ta mau matikagaa ûthamaki wa Ngai.

²² Nwatî Roho ûciaraga wendani, gîkeno, thayû, gûkirîrîria, gwîkana waro, gûtugana, kwîvokeka,

²³ ûvoreri na kwîrigîrîria merirîria ma kîîmwîrî. Gûtirî watho ûreganîte na maûndû ta mama.

²⁴ Nao arîa metanîtue na Kristû Jesû nîmaûragîte ûmûndû wao wa vamwe na ngumba na merirîria maguo macûku.

²⁵ Ethîrwa tûtûûraga na njîra ya Roho, nwanginya atûtongoragie wana ûtûûrorî wetû.

²⁶ Tue ene, tûtiagîrîrwe nî gwîtîîa, kûrakara wana kana kwîgucanîra wîru.