Agal 4 - ÎVUKU RÎA ÛVORO MWARO

¹ Rîu nîrauga atî mûndû wa kûgaa îthe, rîrîa arî mwana, ethagîrwa avanene na ngombo wana ethîrwa nîke mwene indo cionthe cia îthe.

² Rîrîa arî mûnini ethagîrwa arî na andû ma kûmûmenyerera na magitagîre indo ciake nginya kavinda karîa îthe amûrîte gakinye.

³ Na njîra wata îno, wana tue twarî ngombo cia maroho marîa mathanaga nthî mbere ya tûtuîka andû agima kîîroho.

⁴ Nwatî rîrîa kavinda karîa kagîrîru gaakinyire, Ngai nîwatûmire Mûriû wake. Aaûkire na njîra ya gûciarwa nî mûndûmûka na agîtûûra arî rungu rwa watho wa Ayahudi,

⁵ nîguo akûûre arîa onthe maarî rungu rwa watho na nîguo tûtuîke ciana cia Ngai.

⁶ Na nîguo Ngai onanie atî tûrî ciana ciake, nîwatûmire Roho wa Mûriû wake ngororî cietû. Roho ûcio nîke ûtûmaga twîtane Vava.

⁷ Kwoguo, we nîwatigire gûtuîka ngombo ûgîtuîka mûriû. Na ethîrwa nîwatuîkire mûriû wa Ngai, ke nîagaakûva kîrîa kîonthe aigîrîte ciana ciake.

Paûlo nîwetangire nîûndû wa Agalatia

⁸ Tene mûtiaicî Ngai. Kwoguo mwatwîre ûkomborî wa ngai irîa itarî cia ma.

⁹ Nwatî rîu nîûndû nîmûmenyanîte na Ngai, kana mbuge Ngai nîamenyanîte na mue, nîkî kîratûma mûcokerere maroho marîa matarî vinya na matarî vata? Mûrenda gûtuîka ngombo cia maroho mau rîngî nîkî?

¹⁰ Nîmûtuîte mîthenya îmwe, mîeri, imera, na mîaka ya vata makîria.

¹¹ Nîmûmakîtie mûno! Nwa gûtuîkîke atî wîra wakwa wonthe ûrîa naamûrutîre warî wa mana?

¹² Ariû na aarî a îthe wetû, nîramûthaitha mwîkare ta nie, nîûndû wana nie mbîkariî ta mue. Mûtianamvîtîria.

¹³ Nîmwîcî atî nî kûrwara gwatûmire nîmûvunjîrie Ûvoro Mwaro vîndî ya mbere.

¹⁴ Wana ethîrwa nîmwagîre na mathîna meengî nîûndû naarî mûrwaru, mûtiamena kana mûndiga. Nîmwanyamûkîre wata ûrîa mûngîamûkîra mûraika wa Ngai, kana ta Jesû Kristû ke mwene.

¹⁵ Mwarî akenu mûno! Nî atîa gwekarire? Nîrî mûira atî kûngîavotekire nîmûngîakûûrire metho menyu mûkînamva.

¹⁶ Nîkwa rîu nduîkîte nthû yenyu nîûndû wa kûmwîra ûma?

¹⁷ Andû acio engî nîmonanagia atî marî na vata mûno mûtuîke ao, nwatî mekaga ûguo matarî na wendi mwaro. Kîrîa mendaga nî kûmûtigithania nanie nîguo mûgîe na vata nao wata ûrîa marî na vata namue.

¹⁸ Nî waro kûgîa na vata mûnene wa ûndû ethîrwa ûrî na mworoto mwaro vîndî cionthe na twa rîrîa tûrî namue.

¹⁹ Ciana ciakwa mendete, wa rîngî nîregua nîrî na ûrûrû mwîngî mûno nîûndû wenyu wata ûrûrû ûrîa mûndûmûka egucaga akîgîa na mwana. Nîmbîgua ûrûrû ûcio nginya rîrîa mûgaatuîka arûmîrîri a ma a Kristû.

²⁰ Nwatî kethîrwa nîrî vamwe na mue rîu, nîngîamwonia na njîra ya mîario yakwa ûrîa nîregua îgûrû rîenyu. Mue nîmûmakîtie mûno.

Ngerekano ya Hagari na Sara

²¹ Mue arîa mwendete kwîthîrwa mûrî rungu rwa watho, ta mbîrani atîrî: nîkwa mûtegucaga ûrîa watho ugaga?

²² Kwandîkîtwe wathorî atî Iburahimu aarî na ariû aîrî. Mûriû ûmwe aaciarîtwe nî mûndûmûka ûrîa warî ngombo, na ûcio wîngî aaciarîtwe nî mûndûmûka ûrîa ûtaarî ngombo.

²³ Mûriû wa Iburahimu ûrîa maagîte na mûndûmûka ûrîa warî ngombo aaciarirwe na njîra îrîa ciana iciaragwa nayo. Nwatî mûriû wa Iburahimu ûrîa maagîre na mûndûmûka ûrîa ûtaarî ngombo aaciarirwe na njîra ya kîîranîro.

²⁴ Maûndû mama maragua marî ngerekano, na aka aya aîrî marûngamîrîrîte irîkanîro igîrî. Hagari na nîke wagîrîre ciana ûkomborî agerekanîtue na kîrîkanîro kîrîa Kîamrûthîrwe kîrîmarî gîa Sinai.

²⁵ Hagari nî ta kîrîma gîa Sinai kîrîa kîrî Arabia na nîke mûvano wa îtûûra rîa Jerusalemu rîrîa rîrî vo vîndî îno na rîrî ûkomborî vamwe na andû arîo onthe.

²⁶ Nwatî Jerusalemu îrîa îrî îgûrû ndîrî ûkomborî na nî ta yo ng'ina wetû.

²⁷ Nîûndû mandîkorî matheru kwandîkîtwe atîrî: “Kena we mûndûmûka ûyû ûtagîcaga ciana! Ina na wanîrîre ûrî na gîkeno, we ûtaanegua ûrûrû wa kûgîa na mwana. Nîûndû mûndûmûka ûrîa watigirwe, nî akaagîa na ciana nyîngî gûkîra ûrîa ûtaanatigwa nî mûthuuri wake.”

²⁸ Rîu mue ariû na aarî a îthe wetû, mûrî ciana cia Ngai nîûndû wa kîîranîro wata Isaka.

²⁹ Îvindarî rîu mûriû ûcio waciarîtwe na njîra îrîa ciana iciaragwa nayo nîwanyaririre ûrîa waciarîtwe na njîra ya Roho wa Ngai, na nwaguo gwîkariî nginya ûmûnthî.

³⁰ Nwatî mandîko matheru maugaga atîa? Maugaga atîrî: “Îngata mûndûmûka ûcio ngombo na mûvîcî, nîûndû mûvîcî wa mûndûmûka ngombo ndakaagîa na îgai ûndû ûmwe na mûvîcî wa mûndûmûka ûrîa ûtarî ngombo.”

³¹ Kwoguo ariû na aarî a îthe wetû, tue tûtirî ciana cia mûndûmûka ûrîa ngombo, nwatî tûrî ciana cia mûndûmûka ûrîa ûtarî ngombo.