Agal 3 - ÎVUKU RÎA ÛVORO MWARO

Watho kana wîtîkio

¹ Mue Agalatia aya aritu! Nû wamûrogire? Nîmwataarîrue waro ûrîa Kristû aakwire arî mûtharavarî.

² Tambîrani atîrî: Mwamûkîre Roho na njîra ya kûrûmîrîra watho, kana nî na njîra ya kwîgua ûvoro mwaro na kûwîtîkia?

³ Nîkwa mûritîte atîa? Mue mwambîrîrie na Roho na rîu mûrenda kûrîkîrîria na vinya wa mwîrî?

⁴ Nîkwa maûndû monthe marîa mwemenyeretie maatuîkire ma mana? Ngwîvoka matiarî ma mana.

⁵ Ngai amûvecaga Roho na akaringa ciama gatagatîrî kenyu nîûndû nîmûrûmagîrîra watho kana nîûndû nîmwîgucaga ûvoro mwaro na mûgawîtîkia?

⁶ Ririkanani ûrîa mandîko matheru maugîte ûvoro wîgiî Iburahimu atî; “Ke nîwetîkirie Ngai nake Ngai nîwamûtuire Mûthingu.”

⁷ Kwoguo nîmwagîrîrwe nî kûmenya atî andû arîa metîkîtie nî ciana cia Iburahimu.

⁸ Mandîko matheru nîmoonanirie na vau kavere atî Ngai nîagaatua andû a Ndûrîrî athingu nîûndû wa gwîtîkia. Kwoguo Iburahimu nîwamenyithirue na njîra ya ûvoro mwaro atî: “Andû a Ndûrîrî cionthe nîmakaarathimwa nîûndû waku.”

⁹ Iburahimu nîwetîkirie na akîrathimwa. Kwoguo arîa onthe metîkîtie makaarathimagwa wata Iburahimu.

¹⁰ Andû arîa meciragia nîmagaatuwa athingu mbere ya Ngai nîûndû wa kûvingia watho nî arume. Nîûndû mandîko matheru maugîte atîrî: “Mûndû wa wonthe ûtavingagia maûndû monthe marîa mandîkîtwe wathorî nî mûrume.”

¹¹ Na rîu nîgwîcîkene atî gûtirî mûndû ûngîtuwa mûthingu mbere ya Ngai nîûndû wa gwîka ûrîa watho ugîte. Nîûndû Mandîko Matheru maugîte atîrî, “Mûndû ûrîa ûgaatuwa mûthingu mbere ya Ngai na njîra ya gwîtîkia nîke ûgaatûûra mwoyo.”

¹² Nwatî watho ndumanîte na wîtîkio. Vandû va ûguo mandîko matheru maugîte atîrî, “Mûndû wa wonthe wîkaga ûrîa watho ugîte nî agaatûûra mwoyo.”

¹³ Nwatî Kristû nîwatuîkire kîrumi nîûndû wetû nîguo atûkûûre kuuma kûrî kîrumi kîrîa kîretagwa nî watho. Nîûndû Mandîko matheru maugîte atîrî “Mûndû wa wonthe mwambe mûtharavarî nî mûrume nî Ngai.”

¹⁴ Kristû eekire ûguo nîguo kîrathimo kîrîa Ngai eerîre Iburahimu, gîkinyîre andû a Ndûrîrî na njîra ya Jesû Kristû nîguo na njîra ya wîtîkio tûvote kwamûkîra Roho ûrîa Ngai eeranîre.

Watho na Kîîranîro

¹⁵ Ariû na aarî a îthe wetû, nîngûmûva ngerekano ya maûndû marîa mwonaga wa mûthenya. Andû aîrî mangîrîkanîra ûndû na mawîtîkanîrie, gûtirî mûndû ûngîcûkia kana ongerere kîndû ûndûrî ûcio.

¹⁶ Rîu Ngai nîwarûthire kîîranîro gîake na Iburahimu vamwe na rûciaro rwake. Mandîko matheru matiugîte atîrî, “Na njiarwa ciake,” ûguo nî kuga andû eengî, nwatî maugîte “Rûciaro rwake,” na nî kuga mûndû ûmwe, na nîke Kristû.

¹⁷ Ûrîa nîrageria kuga nî atî Ngai nîweranîre atî nîakwiga kîrîkanîro kîrîa maarîkanîre na Iburahimu. Watho ûrîa wacokire kûvecanwa vuva wa mîaka magana mana ma mîrongo îthatû, ndûngiuna kîrîkanîro kana ûregana na kîîranîro Kîam Ngai.

¹⁸ Nîûndû ethîrwa Ngai avecanaga kîveo nîûndû wa kwathîkîra watho rî ke ndavecanaga kûringana na kîîranîro. Nwatî Ngai aaveere Iburahimu kîveo nîûndû wa kîîranîro.

¹⁹ Watho warî wakî? Watho wongerererwe kûrî kîrîkanîro nîguo wonanie maûndû marîa macûku nginya rîrîa rûciaro rwa Iburahimu rûgaûka, rûrîa rwerîrîtwe kîîranîro kîu. Watho wanenganîrwe kûvîtûkîrîra kûrî Araika na kûrî mûndû ûrîa wegwithanagia andû na Ngai.

²⁰ Nwatî gûtirî na vata wa kwîthîrwa na mûndû wa kwîguithania andû rîrîa ûndû ûcio wîgiî mûndû ûmwe; na Ngai nî ûmwe.

Ûrîa watho wendaga gwîka

²¹ Ûndû ûyû ûrenda gûtwonia atî watho nîûreganîte na ciîranîro cia Ngai? Naarî. Nîûndû ethîrwa andû nîmaagîre na watho wa gûtûma magîe na mwoyo, andû onthe nîmangîatuirwe athingu nî Ngai nîûndû wa kûwathîkîra.

²² Nwatî mandîko matheru maugaga atî andû onthe a nthî marî rungu rwa vinya wa mevia. Kwoguo kîveo kîrîa kîranîrîtwe nî ûndû wa gwîtîkia Jesû Kristû nîkîvecanagwa kûrî andû arîa metîkîtie.

²³ Nwatî mbere ya wîtîkio ûke, twatwîre tûrî ove nî watho. Tûtiarî na wîathi nginya rîrîa Ngai aatwonirie njîra ya wîtîkio ûrîa ûkaaguûranîrua.

²⁴ Kwoguo twarî rungu rwa watho nginya rîrîa Kristû aaûkire. Aaûkire nîguo tûcoke tûtuwe athingu mbere ya Ngai na njîra ya wîtîkio.

²⁵ Na rîu nîûndû nî vîndî ya gwîtîkia, tûtirî rungu rwa watho.

²⁶ Muonthe mûrî ciana cia Ngai nîûndû wa kwîthîrwa mûrî ûrûmwe na Kristû na njîra ya wîtîkio.

²⁷ Mue arîa mûvatithîtue na mûgatuîka kîndû kîmwe na Kristû nîmûtuîkîte take.

²⁸ Kwoguo gûtirî ngûrani gatagatîrî ka Ayahudi na andû a Ndûrîrî, ngombo na arîa matarî ngombo, arûme na aka muonthe mûrî kîndû kîmwe na Kristû.

²⁹ Ethîrwa mûrî a Kristû, mûrî a rûciaro rwa Iburahimu na nîmûkagaa kîrîa Ngai eeranîre.