Afil 4 - ÎVUKU RÎA ÛVORO MWARO

Mataaro

¹ Ariû na aarî a îthe wetû, nie nînîmwendete na nînîriragîria mûno kûmwona. Nîmûngenagia mûno na mûgatûma nîtîîe nîûndû wenyu. Kwoguo arata akwa nîmwagîrîrwe nî gwîkindîria mûtûûrîrerî wenyu, mûrî ndaarî ya Mwathani.

² Eudia na Sunituke, namûthaitha mûgerie kwîgucana ta aarî a îthe wetû mûrî ndaarî ya Mwathani.

³ Wa nawe mûrata wakwa mwîvokeku, nîngwenda ûtethagîrîrie aka aya. Nîndutithanîtie wîra wa kûvunjia ûvoro mwaro nao, wa vamwe na Kîlementi marî na andû onthe arîa twarutithanagia wîra nao arîa marîîtwa mao mandîkîtwe îvukuurî rîa mwoyo.

⁴ Îkaragani mûkenete mûrî ûrûmwe na Mwathani vîndî cionthe. Na nîngûmwîra rîngî atî mwîkarage mûkenete.

⁵ Gûkirîrîria kwenyu nîkûmenywe nî andû onthe. Mwathani arî vakuvî gûka.

⁶ Mûtikamakue nî ûndû wana ûrîkû nwatî voyani na mwîtie Ngai kîrîa kîonthe mûrenda na mûcokagie ngatho vîndî cionthe.

⁷ Naguo thayû wa Ngai ûrîa ûtangîmenyeka nî andû ûgekaragia ngoro na meciria menyu, nîûndû wa kwîthîrwa mûrî ndaarî ya Kristû Jesû.

⁸ Ngîrîkîrîria Ariû na aarî a îthe wetû, îcirieni ûvoro wîgiî maûndû marîa maro na mangîgathîrîrua: maûndû marîa ma ma, matîîku, ma kîvooto, matheru, ma kwendeka na ma ûvoreri.

⁹ Îkagani maûndû marîa mwathomire na mûkîamûkîra kuuma kûrî ciugo ciakwa wa vamwe na ciîko ciakwa. Nake Ngai ûrîa ûtûvecaga thayû akethagîrwa vamwe na mue.

Gûcokia ngatho nîûndû wa iveo

¹⁰ Nîrî na gîkeno mûno nîrî ndaarî ya Mwathani, nîûndû vuva wa kavinda karaca nîmûgîte na kanya ga kûnîîciria. Ndirauga atî kûrî vîndî mwariganîrîtwe nî nie, nwatî mûtiagîa na kanya ga kwonania atî nîmûranîciria.

¹¹ Ndirauga ûguo atî nîûndû nînîrenda ûtethio. Nîmenyerete kwîganagîrwa nî kîrîa nîrî nakîo.

¹² Nîmbîcî gwîkara ndarî na kîndû na nîmbîcî gwîkara nîrî na indo nyîngî. Nîmenyete nthitho îno nîguo vîndî cionthe mbîthagîrwe mbîganîrîtwe wana ethîrwa nîrî mûvau kana mûvûtu, nîrî na indo nyîngî kana nini.

¹³ Nwambîke maûndû monthe na njîra ya ûrîa ûmvecaga vinya.

¹⁴ Nwatî nîmwekire waro nîûndû wa kûnyitanîra na nie mathînarî makwa.

¹⁵ Mue andû a kanitha wa Filipi nîmwîcî waro atî Kîammbîrîriarî gîa kûvunjia ûvoro mwaro naauma Makedonia, kanitha wenyu wonga nîguo wandethirie rîrîa naarî na thîna na nîrî mathînarî.

¹⁶ Mavinda meengî nîmwandûmîre indo irîa naavatarîte rîrîa naarî Thesalonike.

¹⁷ Nie ndirenda iveo kuuma kûrî mue, nwatî nîrenda mûgîe na maciaro marîa maumanaga na ûvecani.

¹⁸ Na rîu nîngîte na indo nyîngî na ngakîrîrîria. Nîrî na indo cia kûmbîgana nîûndû Epafarodito nîwandetere iveo kuuma kûrî mue. Iveo icio ciîkariî ta kîndû kîrî na mûnungo mwaro gîkîrutîrwa Ngai, na ta îgongoona rîa gwîtîkîrîka nîke na rîa kûmûkenia.

¹⁹ Ngai wakwa akaamûvecaga kîrîa kîonthe mûvataraga kûringana na ûtonga wake mwîngî ûrîa ûvecanagwa na njîra ya Jesû Kristû.

²⁰ Ngai na nwake Vava wetû arokumua tene na tene! Ameni.

Ngethi cia Mûthiia

²¹ Kethiani andû onthe a Ngai arîa marî ûrûmwe na Jesû Kristû. Ariû na aarî a îthe wetû arîa tûrî nao gûkû nîmamûkethia.

²² Andû onthe a Ngai arîa marî gûkû na mûno makîria arîa marî mûciî kwa mûthamaki wa Roma nîmamûkethia.

²³ Wega wa Mwathani Jesû Kristû ûrekara namue muonthe.