2Joh 1 - ÎVUKU RÎA ÛVORO MWARO

¹ Nie mûthuuri nîrandîkîra mûndûmûka mûtîîe wa vamwe na ciana ciake arîa mendete mûno. Twa nie nienga nîmwendete, nwatî nîmwendetwe nî arîa onthe mecî ûma.

² Nîûndû ûma wîthagîrwa ûrî ndaarî yetû na nîtûtûûra naguo tene na tene.

³ Tûrogîa na wega, ntha na thayû kuuma kûrî Ngai îthe na mûriû Jesû Kristû na njîra ya ma na wendani.

Ûma na Wendani

⁴ Nie nînakenire mûno nona ciana imwe ciaku ikîrûmîrîra ûvoro wa ma wata ûrîa twathirwe nî Vava wetû.

⁵ Kwoguo we mûndûmûka mûtîîe, nîrakûthaitha atî tuonthe twendanage mûndû na ûrîa wîngî. Rîîrî tî rîathani rîcerû nîrakwandîkîra, nî rîathani rîrîa twegwire kuuma wa Kîammbîrîria.

⁶ Wendo ûrîa nîraria ûvoro waguo ugaga atî nwanginya tûrûmîrîre maathani ma Ngai. Rîathani rîîrî nî rîrîa mwegwire kuuma wa Kîammbîrîria atî nwanginya muonthe mûtûûre mwendanîte.

⁷ Aveenania eengî mûno nîmathiîte nthî yonthe. Aya nî andû arîa mataumbûraga atî Jesû Kristû aûkire arî na mwîrî ta mûndû. Mûndû ta ûcio nî wa maveeni na nî nthû ya Kristû.

⁸ Îîmenyerereni nîguo mûtigate kîrîa kîonthe mûrutîrîte wîra, nwatî mûkaagwata mûcara wenyu wonthe.

⁹ Mûndû wa wonthe ûreganîte na kîrîra gîa Kristû na akathiî agakîria njano, ndethagîrwa arî na Ngai. Nwatî ûrîa ûrûmagîrîra kîrîra gîa Kristû ethagîrwa arî na îthe wana Mûriû.

¹⁰ Ethîrwa mûndû nwa aûke kûrî mue atakûthomithia kîrîra gîa Kristû, mûtikamûgwate ûgeni kwenyu mûciî wana mûtikamûkethie.

¹¹ Nîûndû mûndû ûrîa ûmûkethagia nîanyitanagîra nake maûndûrî make macûku marîa ekaga.

Ciugo cia mûthiia

¹² Nîrî na maûndû meengî mûno ma kûmwîra, nwatî ndirenda gwîka ûguo na njîra ya karatathi na rangi. Vandû va ûguo nîmbîrîgîrîrîte gûka kûmwona na twaranîrie metho kwa metho nîguo gîkeno gîetû gîtuîke gîcûru.

¹³ Ciana cia mwarwanyûkwe ûrîa mûtîîe nîciagûkethia.