2Atha 12 - ÎVUKU RÎA ÛVORO MWARO

Joashi, mûthamaki wa Juda

¹ Mwakarî wa mûgwanja Jehu arî mûthamaki wa Isiraeli, Joashi nîwatuîkire mûthamaki wa Juda, na nîwathanire arî Jerusalemu îvinda rîa mîaka mîrongo îna (40). Ng'ina wa Joashi eetagwa Zibia kuuma îtûûra rînene rîa Beerisheba.

² Joashi nîwekire maûndû marîa maakenagia Ngai-Mûnene ûtûûrorî wake wonthe, nîûndû nîwataaragwa nî mûthînjîri-Ngai Jehoiada.

³ Kûnarî ûguo, kûndû kûrîa gûtûgîru kwagoocagîrwa gûtiacûkangua, na andû nîmaathiîre na mbere kûrutîra magongoona kuo.

⁴ Joashi nîwerire athînjîri-Ngai atîrî, “Ocanagiani mbeca cionthe irîa ikaretagwa hekarûrî. Nacio nî: mbeca irîa ciumanaga na kwendia indo irîa nyamûre, mbeca irîa mûndû eranîrîte, mbeca cia gwîtara, na mbeca irîa irutagwa nî mûndû na njîra ya kwîyendera.

⁵ Wa mûthînjîri-Ngai akaamenyagîrîra mbeca irîa ikarutagwa nî andû arîa atungataga, na mbeca icio igaatûmagîrwa gûtuma rîngî hekarû kûrîa gûkwoneka kûrî na vata wa gûtumwa.”

⁶ Nwatî mwakarî wa mîrongo îîrî na îthatû (23) Joashi arî mûthamaki, athînjîri-Ngai matiatûmîte andû macoke hekarûrî.

⁷ Kwoguo, mûthamaki Joashi nîwetire mûthînjîri-Ngai Jehoiada na athînjîri-Ngai acio engî na akîmaûria atîrî, “Mûrarega gûtuma hekarû rîngî kûrîa kûtharûku nîkî? Kuuma rîu kûthiî na mbere, tîkwa mûkaaigaga mbeca irîa mûgoocanagia. Mûkaainenganagîra nîguo itûmagîrwe gûtuma rîngî hekarû kûrîa kûtharûku.”

⁸ Kwoguo athînjîri-Ngai nîmeetîkîrire atî matigoocania mbeca rîngî na magîtîkia atî matigaatuma rîngî hekarû kûrîa kûtharûku.

⁹ Mûthînjîri-Ngai Jehoiada nîwacokire agîoca kathandûkû, agîtûra îrima gîkunîkorî gîa ko na agîkaiga vakuvî na metha ya kîgongoona, mwena wa ûrîo mûndû agîtonya hekarûrî. Nao athînjîri-Ngai arîa maarangîrîte mûrango wa hekarû nîmeekîrire kathandûkûrî kau mbeca cionthe irîa ciaviragwa hekarûrî.

¹⁰ Rîrîa rîonthe mona, atî kûrî na mbeca nyîngî kathandûkûrî kau, karani wa mûthamaki marî na Mûthînjîri-Ngai mûnene nîmaathiîcaga magatara mbeca icio ciaumaga hekarûrî na magaciova magaciîkîra mîvukorî.

¹¹ Marîkia gûitara, nîmaainenganagîra kûrî andû arîa maarûngamagîrîra wîra ûrîa warutagwa hekarûrî. Nao andû acio nîmaacokaga makarîva andû arîa maarutaga wîra wa mbaû, atumi arîa maarutaga wîra hekarûrî,

¹² andû arîa maarutaga wîra wa gûtuma na mathiga, na andû arîa maaumagia mathiga, wa vamwe na kûgûra mbaû na mathiga marîa maatûmagîrwa gûtuma rîngî hekarû.

¹³ Mbeca irîa ciarutagwa hekarûrî itiatûmîrwa kûrûtha tûraî twa sîlûva, tûnyamû twa gûtinia ndambi, mbakûri, tûrumbeta, kana tûnyamû tûrûthîtwe na thaavu kana sîlûva.

¹⁴ Cionthe ciatûmagîrwa na kûrîva andû arîa maarutaga wîra wa gûtuma rîngî hekarû kûrîa kûtharûku.

¹⁵ Andû arîa maarûngamagîrîra wîra wa gûtuma hekarû rîngî kûrîa kûtharûku maarî evokeku, kwoguo gûtiarî na vata wa kûmeera monanie ûrîa matûmîrîte mbeca icio.

¹⁶ Mbeca irîa ciarutagwa irî matega ma mavîtia na irîa ciarutagwa irî matega ma kûtheria mevia, itiaviragwa hekarûrî; nîûndû ciarî cia athînjîri-Ngai.

¹⁷ Vîndî îo, Hazaeli, mûthamaki wa Sîria nîwatharîkîre îtûûra rînene rîa Gathu, na akîrîvoota. Hazaeli nîwacokire agîtua nîakûtharîkîra Jerusalemu.

¹⁸ Joashi, mûthamaki ma Juda nîwocire matega monthe marîa Jehoshafati, Jehoramu, na Ahazia, athamaki a Juda maamûrîrîte Ngai-Mûnene. Nîwamonganîrîrie na matega make ke mwene vamwe na thaavu yonthe îrîa yarî mûthithûrî wa hekarû na nyomba ya mûthamaki na agîitûma cionthe irî kîveo kûrî Hazaeli mûthamaki wa Sîria. Hazaeli nîwacokire akiuma Jerusalemu.

¹⁹ Maûndû marîa mengî monthe marîa mûthamaki Joashi eekire nîmandîke Îvukuurî rîa Maûndû ma Tene ma Athamaki a Juda.

²⁰ Ndungata cia mûthamaki Joashi nîciavangire ûrîa ingîmûraga na nîciamûragîre nyombarî îrîa îrî kûrîa gwikîrîrie mûthetu mwena wa îrathîro wa Jerusalemu, njîrarî îrîa înyûrûrûkîte îthiîte Sila.

²¹ Aaûragirwe nî ndungata ciake, Isakaru mûvîcî wa Shimeathi marî na Jehozabadi mûvîcî wa Shomeri. Nîmaamûthikire mbîrîrarî cia athamaki kûu îtûûrarî rînene rîa Daudi, nake mûvîcî Amazia nîwatuîkire mûthamaki vuva wake.