2Akor 1 - ÎVUKU RÎA ÛVORO MWARO

¹ Nie Paûlo, mûtûmwa wa Kristû Jesû nîûndû wa wendi wa Ngai na kuuma kûrî mûrwaiya Timotheo. Tûramwandîkîra mue kanitha wa Ngai ûrîa ûrî Korinitho, na kûrî andû onthe a Ngai arîa marî Akaia kuonthe:

² Mûrogîa na wega na thayû kuuma kûrî Ngai Vava wetû na Mwathani Jesû Kristû.

Paûlo nîwacokirie ngatho kûrî Ngai

³ Nîtûcokieni ngatho kûrî Ngai îthe wa Mwathani wetû Jesû Kristû. Nî îthe wetû ûrî ntha, na nî Ngai ûmanagîrîria maûndûrî monthe!

⁴ Ke nîatûmagîrîria mathînarî metû monthe nîguo tûvotage kûmîrîria arîa engî marî na mathîna ma mîthemba yonthe, tûgîtûmagîra ûmîrîru wata ûrîa tue ene tûgwatîte kuuma kûrî Ngai.

⁵ Wata ûrîa tûrî na îgai înene mînyamarorî ya Kristû, nwa ta guo kûvîtûkîra kûrî Kristû tûgaaga ûmîrîru mwîngî kuuma kûrî Ngai.

⁶ Nwatî ethîrwa nîtukûnyamarua, nîtûnyamarua nîguo mûmîrîrue na mûvonokue. Na ethîrwa tûrî aûmîrîrie, wa namue mûrî aûmîrîrie. Ûndû ûyû nî ûmûtethagîrîria kwamûkîra mûkirîrîrîtie mînyamaaro wata îrîa wanatue tûmagîrîria.

⁷ Kwoguo kîîrîgîrîro gîetû kûrî mue gîtingîinaina. Tue nîtwîcî atî wata ûrîa mûgwatanagîra natue mathînarî metû nwataguo mûgwatanagîra natue wana ûmîrîru ûrîa twamûkagîra.

⁸ Ariû na aarî a îthe wetû, tue nîtûkwenda mûmenye mathîna marîa twarî namo vûrûrirî wa Asia. Mîrigo îrîa tue twakuithîtue yarî mînene na mîrito nginya tûkîûrwa nî kîîrîgîrîro gîa ûtûûro.

⁹ Ngororî cietû nîtwegucaga atî nîtwatuîrîrîtwe kûragwa. Nwatî ûguo wekîkire nîguo tûtikevoke vinya wetû tue ene, nwatî twîvoke Ngai ûrîa ûriûkagia arîa makuîte.

¹⁰ Ngai nîwatûvonokirie kuuma mogwatirî mau manene ma gîkuû, na ke nîakûthiî na mbere gûtûvonokia. Twigîte kîîrîgîrîro gîetû kûrî ke na nîagaatûvonokia rîngî.

¹¹ Wanamue nîmwagîrîrwe nî gûtûtethia na mavoya nîguo andû engî magaacokia ngatho kûrî Ngai vandûrî vetû nîûndû wa irathimo irîa tûgwatîte kuuma kûrî Ngai nîûndû wa mavoya mao meengî.

Paûlo nîwagarûrire mîvango yake

¹² Ûrîa ûratûma twîtîîe na nwa mvote kuga nîrî na thamiri ntheru atî, maûndûrî monthe marîa twîkîte gûkû nthî na makîria kûrî mue, tue twarî na wîvokeku na ngoro ntheru kuuma kûrî Ngai. Twekire ûguo na njîra ya wega wa Ngai na tî na ûûgî wa ûmûndû.

¹³ Twamwandîkagîra tu ûrîa mue mûngîvota kûthoma na gûtaûkîrwa. Nanie nîngwîvoka atî nîmûgûtaûkîrwa waro

¹⁴ nîûndû rîu mûtaûkîrîtwe nî maûndû mamwe marîa matwîgiî. Rîrîa mûthenya wa Mwathani wetû Jesû ûgaakinya nîmûgetîîa nîûndû wetû wata ûrîa twîthagîrwa tûgîtîîa nîûndû wenyu.

¹⁵ Nie nînaamenyete ûndû ûyû waro na nînathondekire mîvango ngaaûka nîmûcerere mbere, nîguo mûgîe na gîkeno maita maîrî.

¹⁶ Nînavangîte nîmûcerere nîrî njîrarî ngîthiî Makedonia na rîngî ngîcoka, nîguo mûkaandethereria ngîthiî Judea.

¹⁷ Nie ngîvanga mûvango nîkwa nonekaga ta nîngîgarûrûka? Vîndî îrîa ngûthondeka mîvango yakwa, nîkwa nîmîthondekaga nîrî na meciria ma ûmûndû nîvarîrîtie kuga “Ii,” na “naarî” vîndî wa îo?

¹⁸ Nî ma wata ûrîa Ngai arî mwîvokeku, kîîranîro gîakwa gîtiarî “Ii” na “naarî”.

¹⁹ Nîûndû Jesû Kristû Mûriû wa Ngai, ûrîa twamûvunjîrie tûrî nie, Sailasi, na Timotheo, ndarî “Ii” na “naarî”. Kûrî Kristû kwîthagîrwa vîndî cionthe kûrî “Ii”,

²⁰ nîûndû nîke wîthagîrwa arî “Ii” kûrî ciîranîro cionthe cia Ngai. Ûndû ûyû nîguo ûtûmaga tuge na njîra ya Jesû Kristû “Ameni” rîrîa tûgûkumia Ngai na njîra ya Jesû Kristû.

²¹ Ngai ke mwene nîke ûtûmaga mue mûrî vamwe natue tûgîe na kîîrîgîrîro tûrî ûrûmwe na Kristû. Ngai nîke ûtûthuurîte.

²² Ke nîwekîrire rûûri rwake kûrî tue rwa kwonania atî tûrî ake, na nîwekîrire Roho wake ngororî cietû wa gûtwonia nama kîrîa kîonthe atwigîrîte.

²³ Nie nîreta Ngai mûira wakwa: nîaicî ngoro yakwa! Nînaaregire kûthiî Korinitho rîngî nîguo ndigatûme mûgîe na mathîna meengî.

²⁴ Tue tûtiramûringîrîria maûndû marîa mwagîrîrwe nî gwîtîkia; Nîtwîcî atî mûrî ekindîru wîtîkiorî wenyu, nwatî tûrutithanagia wîra namue nîguo mûkenage.