1Maû 24 - ÎVUKU RÎA ÛVORO MWARO

Wîra ûrîa wagaîrwe athînjîri-Ngai

¹ Njiarwa cia Aroni nîciagaanîtue ikundi mwanya mwanya. Avîcî a Aroni maarî: Nadabu, Abihu, Eleazaru na Ithamaru.

² Nadabu na Abihu nîmaakwire mbere ya îthe na maakwire matagîte ciana. Kwoguo aa mûrwang'ina Eleazaru na Ithamaru nîmaatuîkire athînjîri-Ngai.

³ Mûthamaki Daudi nîwatethirue nî mûthînjîri-Ngai Zadoku wa njiarwa cia Eleazaru na mûthînjîri-Ngai Ahimeleku wa njiarwa cia Ithamaru kûmagaania kûringana na mawîra marîa maavetwe ma ûtungati.

⁴ Kwarî na atongoria eengî a kuuma njiarwarî cia Eleazaru gûkîra arîa maaumîte njiarwarî cia Ithamaru. Kwoguo nîmaagaanirue ikundi îkûmi na ithathatû cia njiarwa cia Eleazaru, na ikundi inyanya cia njiarwa cia Ithamaru.

⁵ Andû maathuuragwa na njîra ya gwikîrua mîtî nîûndû kwarî na anene a hekarû na atongoria a maûndû ma Ngai kuuma njiarwarî cia Eleazaru na Ethamaru.

⁶ Shemaia mûvîcî wa Nethaneli wa kuuma mûvîrîgarî wa Lawi nîke warî mwandîki na nîwandîkire marîîtwa mao onthe. Mûthamaki, ndungata ciake, mûthînjîri-Ngai Zadoku, Ahimeleku mûvîcî wa Abiatha, na atongoria a nyomba cia athînjîri-Ngai na Alawi nîmaatuîkire aira.

⁷ Ûrîa wathuurirwe wa mbere aarî Jehoiaribu, wa kaîrî aarî Jedaia,

⁸ wa kathatû aarî Harimu, wa kana aarî Seorimu,

⁹ wa gatano aarî Malikija, wa gatandatû aarî Mijamini,

¹⁰ wa mûgwanja aarî Hakozi, wa kanana aarî Abija

¹¹ wa kenda aarî Jeshua, wa îkûmi aarî Shekania,

¹² wa îkûmi na ûmwe aarî Eliashibu, wa îkûmi na îîrî aarî Jakimu,

¹³ wa îkûmi na kathatû aarî Hupa, wa îkûmi na kana aarî Jeshebeabu,

¹⁴ wa îkûmi na gatano aarî Biliga, wa îkûmi na gatandatû aarî Imeri,

¹⁵ wa îkûmi na mûgwanja aarî Heziri, wa îkûmi na anana aarî Hapizezi,

¹⁶ wa îkûmi na kenda aarî Pethania, wa mîrongo îîrî aarî Jehezikeli,

¹⁷ wa mîrongo îîrî na ûmwe aarî Jakini, wa mîrongo îîrî na îîrî aarî Gamuli,

¹⁸ wa mîrongo îîrî na athatû aarî Delaia, wa mîrongo îîrî na ana aarî Maazia.

¹⁹ Ûguo nîguo andû maandîkirwe kûringana na wîra ûrîa maagaîrîtwe wa gûtungata hekarûrî ya Ngai-Mûnene. Maarûmagîrîra mawatho marîa maatigîrîtwe nî Aroni îthe wao wa tene, wata ûrîa Ngai-Mûnene, Ngai wa Isiraeli aamwathîte.

Mûtaratara wa Alawi

²⁰ Aya marûmîrîrîte nîo atongoria a nyomba cia njiarwa cia Lawi: Amuramu aarî îthe wa Shebueli, nake Shebueli aarî îthe wa Jehideia.

²¹ Rehabia aarî îthe wa Ishia.

²² Iziharu aarî îthe wa Shelomithi, nake Shelomithi aarî îthe wa Jahathi.

²³ Heburoni aarî îthe wa Jeria, Amaria, Jehazieli, na Jekameamu.

²⁴ Uzieli aarî îthe wa Mika, nake Mika aarî îthe wa Shamiru.

²⁵ Mûrwang'ina na Mika eetagwa Isihia. Isihia aarî na mûvîcî wetagwa Zekaria.

²⁶ Njiarwa cia Merari ciarî: Mahili na Mushi. Merari aarî na mûvîcî wetagwa Jaazia.

²⁷ Jaazia aarî na anake athatû meetagwa Beno, Shohamu, Zakuri na Iburi.

²⁸ Mûvîcî wa Mahili aarî Eleazaru, nwatî Eleazaru ndaaciara anake.

²⁹ Kishi aarî na mûvîcî wetagwa Jerahimeli.

³⁰ Avîcî a Mushi maarî athatû: Mahili, Ederi na Jeremothi. Aya nîo maarî avîcî a Lawi kûringana na nyomba ciao.

³¹ Nao maagaîrwe mawîra ma mwanya na njîra ya gwikîrua mîtî wata ûrîa andû ao arîa maarî athînjîri-Ngai na maarî njiarwa cia Aroni meekire. Maaikîrue mîtî mbere ya mûthamaki Daudi, Zadoku, Ahimeleku, na anene a nyomba cia athînjîri-Ngai na Alawi.