Yohane 4 - Kivunjo New Testament 1999

Yesu na Mndu mka o Kyisamaria

¹ Kyiyeri Mndumii alemanya kye Mafarisayo wamuicho kye Yesu naigalutsia wandu wafoi ura lokye na iwapatisa kuta Yohane,

² (kyaindi Yesu alepatisa-pfo, indi wanalosho wakye),

³ nalewuka Uyuda, kayenda-se mṟasa Galyilaya.

⁴ Na oe kyiwemmbaṟi naiṙe kyiiṙi kya Samaria.

⁵ Kyasia kashika mṟinyi o Samaria, okyelago Sikari, kufuhi na ṙema lyilya Yakobo alekoaenenga Yosefu mono-kye.

⁶ Na iho hawewoṙe kyisima kya Yakobo. Kyasia Yesu, kyipfa kyaro kyilekokyamwenenga iwina, kaṙamia halya kyisimenyi. Na nyi-we cha saa tsiṟandaaṟu tsa kyingoto.

⁷ Mndu mka o kyisamaria kacheṙahia mṟinga. Yesu kammbia, “Ngyienenga mṟinga ngyinyo.”

⁸ Cha kyipfa wanalosho wakye waweiyenda mṟinyi iguṟa kyelya.

⁹ Kyasia mndu mka ulya o Kyisamaria kammbia, “Kyawa kuṙa iyoe Myuda iterewa mṟinga koko na inyi nyi mndu mka o Kyisamaria?” (Kyipfa Wayuda na Wasamaria wekyekaa handu hamwi-pfo).

¹⁰ Yesu kagaluo, kammbia, “Kokooya uweichi kyindo Ruwa ekyeenengyia, na nyi wui aikuwia ‘Ngyienenga mṟinga ngyinyo’, nuwechimterewa oe, na oe nawechikuenenga mṟinga uwoṙe moo.”

¹¹ Mndu mka ulya kammbia, “Mndumii, uwoṙe kyindo kyeṙahia-pfo, na kyisima kyikyileshi. Nyi kwi owona mṟinga-cho uwoṙe moo?

¹² Ngyesa iyoe nung'anyi kuta awu oṙu, Yakobo, aleluenenga kyisima-kyi, na oe kanyo pfo mṟinga, na wana wakye taa, na shima shakye?”

¹³ Yesu kagaluo, kammbia, “Orio mndu anyo mṟinga-chu nechiwoṙo-se nyi nyoṙa;

¹⁴ kyaindi orio mndu echinyo mṟinga ulya ngyechimwenenga inyi echiwoṙo nyoṙa nyi mṟasa mlungana-pfo. Indi mṟinga ulya ngyechimwenenga ochiwa shoka ya mṟinga ochimwenenga moo o mlungana.”

¹⁵ Mndu mka ulya kammbia, “Mndumii, ngyienenga mṟinga-cho, ngyilawoṙo nyi nyoṙa, maa ngyilache-se iṙahia iha.”

¹⁶ Yesu kammbia, “Yenda undelaga mii opfo, uche na oe na iha.”

¹⁷ Mndu mka ulya kagaluo, kagamba, “Ngyiwoṙe mii-pfo.” Yesu kammbia, “Nogamba necha, ‘Ngyiwoṙe mii-pfo’;

¹⁸ kyipfa ulemkaa na wasoṟo wataanu, na ulya ukyeri na oe wulalu chi mii opfo-pfo. Iho nogamba loi.”

¹⁹ Mndu mka ulya kammbia, “Mndumii, ngyiwonyi kye nui moonguo shisuku!

²⁰ Waku waṙu waleindia Ruwa iha fumvunyi, na nyoe mokyegamba kye ipfo Yerusalemu nyi handu luwaṟi iindia pfo Ruwa.”

²¹ Yesu kammbia, “Mama, ngyiiṙikyia. Kyiyeri kyiicha mulechiiṙima iindia Ruwa iha fumvunyi, maa kulya Yerusalemu.

²² Nyoe muindia kyindo mulakyiichi; soe luindia kyindo lukyiichi; cha kyipfa wukyiṟo wuwukyie ko Wayuda.

²³ Kyaindi kyiyeri kyiicha, na wulalu kyikyeri ho, wandu wechiindia necha Awu mumuyonyi na wuloinyi. Cha kyipfa Awu naipfula wandu cha iwo wamwindie.

²⁴ Ruwa nyi Mumuyo na iwo wekyemwindia kyiwawaṟi imwindia mumuyonyi na wuloinyi.”

²⁵ Mndu mka ulya kammbia, “Ngyiichi kye Mesia naicha (ekyelago Kristo); na oe ilyi echicha, nechilutambuluya shindo shoose.”

²⁶ Yesu kammbia, “Inyi ngyiṙeṙa na iyoe nyi oe.”

²⁷ Kyiyeri kyilya kyilya wanalosho wakye wakacha, wakaṟiyio kyipfa naweiṙeṙa na mndu mka; kyaindi kuwoṙe alegamba, “Nuipfula kyi?” Ang'u “Ny'kyilyi uiṙeṙa na oe-pfo?”

²⁸ Kyasia mndu mka ulya kaṙa kyitongoṟima kyilya kyakye, kayenda mṟinyi, kawia wandu,

²⁹ “Nnjonyi muwone mndu angyiwia shindo shoose ngyilewuta. Ngyesa ichu chi oe Kristo-pfoe?”

³⁰ Kyasia wandu wakawuka mṟinyi wakayenda ko Yesu.

³¹ Kyiyeri-kyo ikyo wanalosho wakye walemterewa, wechigamba, “Rabi, lya kyelya.”

³² Kawawia, “Inyi ngyiwoṙe kyelya mulakyiichi nyoe.”

³³ Kyasia wanalosho wakye wakawesana wo wenyi ko wenyi, “Ngyesa kuwoṙe mndu amwendie kyelya?”

³⁴ Yesu kawawia, “Kyelya kyako ny'kyo ikyi, ngyiwute shilya ulya alengyiṙuma akundi, ngyiafutsie iṟunda lyakye.

³⁵ Ngyesa mokyegamba, ‘Hatsugai mori ina kyiyeri kyesambuo kyishikye-pfoe?’ Inyi ngammbia, kye maṙema gamshika kyiyeri kyesambuo.

³⁶ Na ulya mosambuo nekyeambilyia wori, na isania shilyimu kyipfa kya moo o mlungana; kundu ulya ekyewaaya na ulya ekyesambuo waiṙime ichihiyo handu hamwi.

³⁷ Cha kyipfa iho ṙeṙo-lyo lyekyewa loi, ‘Umwi nekyewaaya ungyi kasambuo.’

³⁸ Inyi ngyilemṙuma musambuo shilya mulaleshiwinia. Wengyi walewina, nyoe mowona kyiira kyipfa waleṟunda kui wuragari.”

³⁹ Na kulya mṟinyi Wasamaria wafoi walemwiṙikyia kyipfa kya ulogo lo mndu mka ulya, aleṟingyishia kye, “Nalengyiwia shindo shoose ngyilewuta.”

⁴⁰ Kyasia Wasamaria walya kyiyeri waleyenda kokye, wakamterewa nakae kowo; na oe kakaa pfo mfiri iwi.

⁴¹ Wandu wafoi ngoseṟa wakawaṙa iiṙikyia kyipfa kya ulogo lokye.

⁴² Wakawia mndu mka ulya, “Wulalu loiṙikyia, maa chi kyipfa kya maṙeṙo gapfo tupu-pfo, maa soe loicho luwenyi. Lyingyi-se luichi kye kyaloi ichu nyi oe Mkyiṟa o wuyana.”

Ikyiṟo lya Mana o Mchilyi

⁴³ Na numa ya mfiri iya iwi nalewuka pfo, kayenda Galyilaya.

⁴⁴ Cha kyipfa Yesu amonyi naleṟingyishia kye moonguo shisuku nekyeindio kundu koose sile kulya urukyenyi kokye.

⁴⁵ Kyasia kyiyeri aleshika Galyilaya, Wagalyilaya walemwambilyia; cha kyipfa walewona shindo shoose alewuta ipfo Yerusalemu kyiyeri kya mfiri ung'anyi; kyipfa Wagalyilaya-wo walekowayenda Yerusalemu kyipfa kya mṟumoe o Pasaka.

⁴⁶ Kyasia naleshika-se Kana ya Galyilaya, halya-ndu alekoagaluo mṟinga ukowa mpfinyo. Na kuwewoṙe mchilyi umwi mono-kye aweluoe kulya Kaperinaumu.

⁴⁷ Mchilyi-cho kyiyeri aleicho kye Yesu nacha awuka uruka lo Uyuda mṟasa Galyilaya, naleyenda kokye, kamterewa nandekyiṟa mono-kye; kyipfa nawekyeri kufuhi na ipfa.

⁴⁸ Kyasia Yesu kammbia, “Mulandewone shiṟiyisho na ṟigo tsifoi maa ale-pfoe?”

⁴⁹ Mchilyi ulya kammbia, “Mndumii, nnjo mono-ko alapfa.”

⁵⁰ Yesu kammbia, “Yenda; mono-pfo nai na moo.” Mndu ulya kaiṙikyia kyindo kyilya alewio nyi Yesu, na oe kayenda.

⁵¹ Na kyiyeri aweiyenda, masinga gakye gakamwambilyia, gechigamba kye mono-kye nai na moo.

⁵² Kyasia kawawesa mbonyi tsa saa alewooka iwa ungyi-ungyi; nawo wakammbia, “Ukou, saa mfungaaṙe, isemu lyilemleka.”

⁵³ Kyasia awuye kamanya kye nyi saa iya iya Yesu alemmbia, “Mono-pfo nai na moo.” Kaiṙikyia oe na woose wa kanyi kokye.

⁵⁴ Ikyo nyi kyiṟiyisho kya kawi Yesu alekyiwuta, kyiyeri alekoawuka uruka lo Uyuda ishika Galyilaya.