Waroma 4 - Kivunjo New Testament 1999

Mfano o Iiṙikyia lya Abrahamu

¹ Kyasia, lugambe luṙa mbonyi tsa Abrahamu, awu oṙu?

² Kyipfa kokooya Abrahamu naletalyio wusumganyi kyipfa kya mawuto gakye, nawoṙe kyekushelyia; indi chi mbele ya Ruwa-pfo.

³ Kyipfa shiṟeio shagamba-kyi? Abrahamu naleiṙikyia Ruwa, kyikatalyio kokye kye nyi wusumganyi.

⁴ Kyaindi ko mndu aiṟunda, wori wokye wokyetalo nyi isaṟia-pfo, indi kye nyi sile.

⁵ Kyaindi ko mndu alaiṟunda, indi kaiṙikyia ulya aimtalyia wusumganyi mndu alakundi na iowuo Ruwa, iiṙikyia lya mndu-cho lyatalo kye nyi wusumganyi.

⁶ Chandu Dawidi alegamba agusu mndu ulya Ruwa amtalyia kye namsumganyi kulawoṙe mawuto,

⁷ “Agusu wawahooṟie maṙeko gawo na ngyuunyamaṟi tsawo tsilatsisende nyi Ruwa.

⁸ Agusu mndu ulya Mndumii alaimtalyia ngyuunyamaṟi.”

⁹ Kyasia ngyesa sia-yo nyi ko iwo wawaṙine, ang'u nyi ko iwo walawaṙine taa? Kyipfa luigamba kye ko Abrahamu iiṙikyia lyakye lyiletalo kye nyi wusumganyi.

¹⁰ Ngyesa naletalyio kuṙa-ng'u? Nyi kyiyeri amṙino ang'u alandeṙino? Chi numa ya iṙino-pfo, indi alandeṙino.

¹¹ Na oe naleambilyia kyindo-kyi kyeloṟa kye namṙine, iṟingyishia lya wusumganyi wulya wo iiṙikyia awelyiwoṙe alandeṙino. Naiṙime iwa awu o woose waiṙikyie, maa chandu walawaṙine, kundu nawo wawetalyio wusumganyi taa.

¹² Lyingyi-se nawe awu o wandu waṙine, na chi ko iwo waṙine tikyi-pfo, indi walya wekyeosha ndifo tsa mwiṙikyie o awu oṙu, Abrahamu, awewoṙe wookyia kyiyeri alandeṙino.

Ruwa Kaenenga Abrahamu Kyaasa

¹³ Kyipfa kyaasa kyilya kye nechiwa mokyioṟa o wuyana Abrahamu na kyishari kyakye waleenengo chi kui mawawaso-pfo indi kui wusumganyi waletalyio kui iiṙikyia.

¹⁴ Kyipfa kokooya walya wa mawawaso nyiwo weoṟa, iiṙikyia lyawa wulya, na kyaasa kyailachika.

¹⁵ Kyipfa mawawaso nyigo gekyeende nyashi, cha kyipfa kulawoṙe mawawaso kuwoṙe ṙeko-pfo.

¹⁶ Koikyo kyaasa kyiwukyie iiṙikyienyi, kyiwe kui njia ya isaṟia, kundu kyaasa kyilya kyilalolome ko shishari shoose. Chi ko walya wa uwawaso tikyi-pfo, indi na ko walya wai wa iiṙikyia lya Abrahamu; akyeri awu oṙu soe loose;

¹⁷ (chandu kyikyiṟeie, “Ngyilekuwika uwe awu o Masanga gafoi;”) mbele ya Ruwa ulya alemwiṙikyia, moenenga wapfu moo, ekyeloṟa maa shindo shilakyeri pfo.

¹⁸ Na oe naleiṙikyia echiweṙelyia kyindo kyilechiiṙima iweṙelyio, kundu naiṙime iwa awu o masanga gafoi, chandu kyiwekyiṙeṙe kye, “Nyi wuṙo kyechiwa kyishari kyapfo.”

¹⁹ Oe alawemfofo iiṙikyienyi, nalekusaṟa kya mmbiu okye ulekoompfa (ammbaṙe cha maka igana), na Sara awewoṙe wuiṙimi wo waṙa mana-pfo.

²⁰ Kyaindi awonyi kyaasa kya Ruwa alekapa kawi kui iṙa iiṙikyia-pfo, indi naleenengo pfinya kui iiṙikyia, echiṟumisha Ruwa.

²¹ Echimanya kye loi Ruwa neiṙima iṟunda shilya aweteṟie.

²² Koikyo kyikatalyio kokye kye nyi wusumganyi.

²³ Kyaindi kyikyiṟeie kye nyi Abrahamu tupu aletalyio wusumganyi-pfo;

²⁴ indi na kyipfa kyaṙu soe lochitalyio kuṙo taa, soe luiṙikyie icho aleṟutsa Yesu Mndumii oṙu ko wapfu.

²⁵ Ulya alewuto kyipfa kya maṙeko gaṙu, na iṟutso kundu luiṙime italyio wusumganyi.