Tito 3 - Kivunjo New Testament 1999

Mkaṟo o Kyikristiano

¹ Ukumbuṟe wandu ipfereria ko walya wawoṙe pfinya na wuchilyi, na iindia, na orio kyiyeri ikuṟeyeṟa ko orio iṟunda lyicha.

² Walalahie mndu oose, walaluyane, wawe wandu wekyewuta kyilya kyikyicha, wechiloṟa wuhoo woose ko wandu woose.

³ Kyipfa mfiri ya ipfo numa maa soe luwewoṙe wuṟango-pfo. Luwewanyamaṟi, luwalembe, kunu lochiosha lango na shindo sha mamoona sha mbaṟe tsifoi, lochiwaṙa mkaṟo ya wuwicho na wunyeng'i, lochisuiṟana na isuana.

⁴ Kyaindi wucha wo Mkyiṟa oṙu Ruwa, na ikunda lyakye ko wandu, kyiyeri lyileloṟo, nalelukyiṟa.

⁵ Chi kyipfa kya mawuto ga wusumganyi lulewuta soe-pfo; indi kui isaṟia lyakye, kui isanjo na ifeo lya kawi na kui iwa wahya Mumuyonyi Mweele.

⁶ Ulya alelupusia kulawoṙe iehia, kui njia ya Yesu Kristo Mkyiṟa oṙu;

⁷ kundu lukotalyio wusumganyi kui isaṟia lyakye, luiṙime iwa weoṟa wa moo o mlungana, chandu ikusuria lyaṙu lyikyeri.

⁸ Nyi kyindo kya loi; na shindo-sho ngyikundi ushionguo na pfinya, kundu walya waleiṙikyia Ruwa wakumbuo ikaa mawutonyi mecha. Isho shishicha; lyingyi-se shiwoṙe kyiira ko wandu.

⁹ Kyaindi kushowe na maṙeṙo ga wutondo, shindo shileambilyio ko waku, shiluyano na ikapana kyipfa kya uwawaso. Kyipfa isho shiwoṙe kyiira-pfo. Lyingyi-se nyi shindo sha wulya.

¹⁰ Mndu ekyelosha shindo sha wongo komumṙeṙia lya kuwooka na lya kawi, mlege;

¹¹ uichi kye mndu cha icho naṙekyie; lyingyi-se naiwuta kya wunyamaṟi, kyipfa nakuanduya oe amonyi.

Ulogo lo Mafurumionyi

¹² Kyiyeri ngyechiṙuma Aritema kopfo ang'u Tikyiko, tambagana icha na koko kunu Nikopolyi; cha kyipfa ngyikusaṟie ikaa kunu kyiyeri kya mbeho.

¹³ Sena, ulya aichi mbonyi tsa iṙeṙa moondu, na Apolo, uwatarame kyaronyi kyawo, walauṟe kyindo kyoose.

¹⁴ Wandu waṙu nawo wakuloshe iwuta shindo shicha orio kyiyeri, ko shindo shilya shiwaṟi tikyi; walacheewa wandu waiṟunda wulya.

¹⁵ Wandu woose wakyeri hamwi na inyi wakuiṟikyiṟa. Luikanyie iiṟikyiṟa walya walukundi iiṙikyienyi. Isaṟia lyikae hamwi na nyoe moose.