Tito 2 - Kivunjo New Testament 1999

Malosho ga Loi

¹ Kyaindi iyoe onguo shindo shiwaṟi malosho galamasanze-sanze na shindo shingyi.

² Kye wameeku wawe wandu wawoṙe meena, wawoṙe mkaṟo yechienenga wandu iwaindia, wawoṙe wuṟango, wapfulukyie kyiiṙikyia na ikundenyi na wusimirinyi.

³ Na wuṙo na wakyeku wawaṙe mkaṟo o wuele. Walawe wandu wekyeiria wandu shindo sha wongo, walawe wandu wekyenyo mpfinyo wufoi, indi wawe wandu wekyelosha shindo shicha.

⁴ Kundu waenengye waka wakoho wuṟango, wakunde wamii wawo, na ikunda wana wawo;

⁵ na iwa wandu wawoṙe meena, iṙa wuṟui, wekyeṟunda kanyi kowo, wekyewuta kyilya kyikyicha, iindia wamii wawo; kundu Ṙeṙo lya Ruwa lyilamino.

⁶ Na wuṙo na wanakye uwatutume iwa na meena;

⁷ shindonyi shoose, iyoe kumonyi ochiloṟa mfano o mawuto mecha, na maloshonyi gapfo ochiloṟa wuloi na kulawoṙe temo,

⁸ na mbonyi tsiwoṙe moo tsilechiiṙima igambo kye tsiwoṙe tewe, kundu ulya ekyekana narigo nyi sonu, cha kyipfa awoṙe kyindo eiṙima igamba kyipfa kyaṙu-pfo.

⁹ Walya wakyeri shisinga waindie wandumii wawo, wechiwachihiṟa shindonyi shoose. Walawe wandu wekyegaluo kyiyeri wawio kyindo.

¹⁰ Walawe wandu wekyeiwa; indi waafutsie kyilya wateṟia, kundu wachope malosho ga Mkyiṟa oṙu Ruwa shindonyi shoose.

¹¹ Kyipfa isaṟia lya Ruwa lyekyekyiṟa wandu woose lyamloṟo.

¹² Nalyo lyilulosha ilega wuwicho na lango tsa kyiwuyana; luiṙime iwaṙa moo na meena, na wusumganyi, na iowuo na ikunda Ruwa, kyiiṙi kya wuyana-wu wo wulalu.

¹³ Lochiambuya ikusuria lyiwoṙe mboṟa na iloṟo kyiṟumi kya Kristo Yesu, Ruwa ang'anyi na Mkyiṟa oṙu;

¹⁴ ulya alereka moo okye kyipfa kyaṙu, kundu nalukyiṟe lulaolokyio nyi mawicho ga mbaṟe tsoose, na iilyisha wandu wawe wakye oe amonyi, walya wawoṙe wuragari mawutonyi mecha.

¹⁵ Onguo shindo-sho, ikyimbia na iṟoṟoma kui wuchilyi woose; mndu oose alakumine.