Mawuto Ga Wasu 3 - Kivunjo New Testament 1999

Mndu Ai Kyileeta Kakyiṟo

¹ Kyasia Petiro na Yohane waweiṙo wechiyenda hekalunyi kyiyeri kyeterewa Ruwa, cha saa kyenda.

² Na mndu umwi awei kyileeta wookyia kyiyeri alefeo nawekyeendo nyi wandu wakammbikyia orio mfiri moongonyi o hekalu uwekyelago “Moongo Mcha,” kundu naterewe isaṟio nyi walya wawekyeiṙa na ipfo hekalunyi.

³ Mndu-cho kyiyeri alewona Petiro na Yohane wechiiṙa na hekalunyi naleterewa naenengo kyindo kyemsaṟia.

⁴ Na Petiro, kamwitukuya karii, hamwi na Yohane, kagamba, “Ambuya kunu.”

⁵ Kawaitukuya, alangyie wamwenengye kyindo.

⁶ Kyaindi Petiro kagamba, “Inyi ngyiwoṙe heleri, maa sahapu-pfo, indi kyilya ngyiwoṙe ny'kyo ngyikuenenga. Ko rina lya Yesu Kristo awukyie Nasareti, goṟoka uyende.”

⁷ Kammbaṙa kuwoko ko kulyoe, kamwira, na cha ilyi maṙende gakye gakawaṙa pfinya.

⁸ Kaamka faṟa kawooka iyenda, kaiṙa na hekalunyi hamwi nawo, kachumia echitoola-toola, na iṟumisha Ruwa.

⁹ Wandu woose wakammbona echumia na iṟumisha Ruwa.

¹⁰ Wakammanya, kye oe nyi ulya awekyeṙamia na iterewa shindo shemsaṟia halya moongonyi okyelago “Mcha;” wakaṟiyio mnu kyipfa kya shilya shilewutika kokye.

Ulogo lo Petiro Hekalunyi

¹¹ Kyasia kyiyeri aweinyaia Petiro na Yohane wandu woose wakakuumbia halya-ndu hawekyelago “Itala lya Solomon,” wechiṟiyio mnu.

¹² Na kyiyeri Petiro alewona kuṙo kagaluo wandu walya, kawawia, “Nyoe wandu wa Isiraelyi ny'kyilyi muiṟiyio kyipfa kya shindo-shi? Ang'u ny'kyilyi muluitukuya cha ilyi nyi pfinya tsaṙu tsaenenga mndu-chu wuiṙimi wo ichumia? Maa achia kyipfa soe luiṙikyie Ruwa-pfo.

¹³ Ruwa o Abrahamu na o Isakyi na o Yakobo, Ruwa o waku waṙu, nang'anyisa mṟundi okye Yesu, ulya nyoe mulemṟiinga na imkana mbele ya Pilato, kyiyeri aleṙumbuo kye nalekyio.

¹⁴ Indi nyoe mulekana ulya Mweele, ulya alawoṙe tewe, mukokunda ienengo mmbaagi.

¹⁵ Mukowaaga ulya Ang'anyi o moo o mlungana, ulya Ruwa alemṟutsa ko wapfu; na soe nyi waṟingyishi wakye.

¹⁶ Na kui iiṙikyia rinenyi lyakye, rina lyakye lyaenenga pfinya mndu-chu mummbonyi na immanya; na iiṙikyia lyilya lyikyeri kokye nyilyo lyamwenenga moo-chu ulakyeri mti mbele yanyu nyoe moose.

¹⁷ “Kyasia wulalu, wana wa wama, ngyiichi kye mulewuta isho kyipfa mulaweichi, chandu na wasongoru wanyu walewuta.

¹⁸ Kyaindi shindo shilya Ruwa aleshionguo wookyia kacha kui maṙumbu ga weonguo shisuku woose, kye Kristo nechilyiso wukyiwa, naafutsia isho.

¹⁹ Kyasia ṙumbuyenyi wunyamaṟi, muwiyilyie Ruwa, kundu ngyuunyamaṟi tsanyu tsiwuto piu, kyiyeri kyilya kyewiyiṟio moo kyipfa kya Mndumii Yesu iṙiko koṙu kyiiṙime iafukyia.

²⁰ Ruwa naiṙime iṙuma Yesu Kristo ulya muleṟeyeṟio wookyia kacha.

²¹ Ulya awaṟi ikaa ruwewu mṟasa kyiyeri shindo shoose shewa shihya, kyiyeri kyikyigambe nyi Ruwa kui ṙumbu lya weonguo shisuku waele wookyia mawookyionyi ga wuyana.

²² Cha kyipfa loi Mose nalegamba kye Mndumii onyu nechimuenenga moonguo shisuku iwuka ko wana wa wamanyu, cha inyi; mwaṙanyienyi shindonyi shoose echimuongoya.

²³ Na kyechiwa kye orio mndu alechiaṙanyia moonguo shisuku-cho nechirumatso na iwiko kuleshi na wandu wakye.

²⁴ Yee, na weonguo shisuku woose wookyia Samolyi na walya walecha numa yakye, woose waleṙeṙa, waleonguo mbonyi tsa mfiri-i.

²⁵ Nyoe mowa wana wa weonguo shisuku na wa mma iya Ruwa alelya na waku wanyu, echiwia Abrahamu, ‘Kyisharinyi kyapfo, mbaṟe tsoose tsa wandu wa wuyana tsechiwikyio mboṟa.

²⁶ Ruwa, amṟutse mṟundi okye Yesu, nalemṙuma konyu kuwooka, kundu nammbikyie mboṟa kui igalutsa orio umwi onyu nakae kuleshi na wuwicho wokye.’ ”