Matayo 9 - Kivunjo New Testament 1999

Ikyiṟo lya Apfiie Ngapfu

¹ Kaṙooya ngalawenyi, kaambaṙa, kashika mṟinyi kowo.

² Wandu wakamwendie mndu awoṙe ndoṟe ya ipfa ngapfu ura lumwi, alee kyitaṟenyi, na Yesu kyiyeri alewona iiṙikyia lyawo, nalewia ulya awoṙe ndoṟe-yo, “Kuwanze lying'anyi mrimenyi, mono-ko; omhooṟio maṙeko gapfo.”

³ Na numa ya iho walosha waata wa mawawaso wakagamba mrimenyi kowo, “Ichu nailahia Ruwa kyipfa naikuloṟa cha ilyi oe nyi Ruwa.”

⁴ Na Yesu, aichi makusaṟo gawo, kagamba, “Ny'kyilyi mukusaṟa shiwicho mrimenyi konyu?

⁵ Kyipfa nyi kyiha kyii kyaangu, nyi igamba, ‘Omhooṟio maṙeko gapfo,’ ang'u nyi igamba, ‘Amka, uyende?’

⁶ Kyaindi muiṙime imanya kye Mono-Adamu nawoṙe wuchilyi wuyanenyi wo hooṟia ngyuunyamaṟi, (Nawia ulya awoṙe ndoṟe ya ipfa ngapfu ura lumwi,) ‘Amka, ukuṙikye kyitaṟa kyapfo uyende kanyi kopfo.’ ”

⁷ Kaamka, kayenda kanyi kokye.

⁸ Kyiyeri wuingyi wo wandu wulemmbona, walewoṙo nyi wuowu, wakang'anyisa Ruwa, aleenenga wandu wuchilyi wo mbaṟe-i.

Ilago lya Matayo

⁹ Na Yesu kyiyeri aweiṙa awuka pfo nalewona mndu aṙamie handu hesania ukamba mbai ya ipalyipalyi ekyelago Matayo, kammbia, “Ngyiosha.” Kaamka kamwosha.

¹⁰ Na kyiyeri aleṙamia kanyi nalye kyelya, wesania ukamba wafoi na wanyamaṟi walecha wakaṙamia handu hamwi na Yesu na wanalosho wakye.

¹¹ Kyiyeri Mafarisayo walewona, walewia wanalosho wakye, “Ny'kyilyi mlosha onyu ailya handu hamwi na wesania ukamba na wanyamaṟi?”

¹² Na oe kyiyeri aleicho, nalewawia, “Walya walaluoe wekyepfula mwaanga-pfo, sile walya waluoe.

¹³ Kyaindi yendenyi, mundekulosha kyitambuluo kya maṙeṙo-ga. ‘Ngyikundi isaṟia, maa chi shienengo-pfo’, kyipfa ngyilecha ilaga walya wasumganyi-pfo kyaindi wanyamaṟi.”

Mbonyi tsa Ikuretekyia

¹⁴ Kyiyeri kyilya wanalosho wa Yohane wakayenda kokye wakagamba, “Ny'kyilyi soe na Mafarisayo lokyekuretekyia kyaindi wanalosho wapfo wekyewuta kuṙo-pfo?”

¹⁵ Yesu kawawia, “Wawalage wolyinyi weiṙima kuṙa ikapa ṟanyi kyiyeri monyi wolyi akyeri handu hamwi nawo? Kyaindi kochicha mfiri monyi wolyi echiwuto kowo, nyilyo wechikuretekyia.

¹⁶ Kuwoṙe mndu ekyewika kyiṙami kya nguwo ngyihya nguwonyi ngyiku-pfo. Kyipfa ikyo kyihya kyewuta ho ikyo kyiku na handu halya harandukyie hekyeengyeṟa ing'ana.

¹⁷ Na wandu wekyewika mpfinyo mhya maselelenyi maku-pfo. Na wakawika pfo, maselela-go gekyepaṟika; mpfinyo ukopusuka, na maselela gakanyamaṟika. Kyaindi wekyewika mpfinyo maselelenyi mahya, shikakyia shoose.”

Ikyiṟo lya Mono-waka na Ikyiṟo lya Mndu mka

¹⁸ Kyiyeri aweiwawia isho, kukocha mchilyi umwi, kamwindia, echigamba, “Mono-ko o kyika napfa wulalu kuṙi; kyaindi nnjo, uwikyie kuwoko kopfo wuye yakye, na oe nechiwaṙa moo.”

¹⁹ Yesu kaamka, kamwosha, hamwi na wanalosho wakye.

²⁰ Na mndu mka awewoṙe ndoṟe yechoṟa kyiyeri kya maka ikumi na iwi, kacha kyanuma kokye, kapaaya ikyechu lya ikunya lyakye.

²¹ Kyipfa nalegamba mrimenyi kokye: Ngapaaya ikyechu lya ikunya lyakye tikyi ngyechichia.

²² Yesu kagaluka kammbona, kammbia, “Kuwanze mnu mrimenyi, mono-ko; iiṙikyia lyapfo lyakukyiṟa.” Mndu mka ulya kachia saa iya.

²³ Kyiyeri Yesu aleshika kanyi ko mchilyi ulya, nalewona wekapa mtoṟiṟo, na wuingyi wo wandu wochikapa ṟanyi.

²⁴ Kawawia, “Wukyenyi iha, kyipfa manakye-chu apfiie-pfo, nalee tikyi.” Wakamsaaṟa mnu.

²⁵ Kyaindi wuingyi wo wandu wommbuto ho, naleiṙa na numba, kammbaṙa kuwoko; manakye ulya kagoṟoka.

²⁶ Mbonyi-tsi tsikaṙunganana uruka lulya loose.

Ikyiṟo lya Shipfupfuṟe Shiwi

²⁷ Kyiyeri Yesu aweiṙa iwuka pfo, shipfupfuṟe shiwi shikamwosha, shikakuilenga, shechigamba, “Ulusaṟie, Mono-Dawidi.”

²⁸ Na oe kyiyeri aleshika kanyi, shipfupfuṟe shilya shileyenda kokye na oe kashiwia, “Muiṙikyie kye ngyeiṙima iṟunda ikyi?” Shikammbia, “Yee, Mndumii.”

²⁹ Naaho-ng'u kashipaaya meso, kagamba, “Kui kyiyeṟo kya iiṙikyia lyanyu wonenyi.”

³⁰ Meso gasho gakatambaṟuka. Na Yesu kashiwia ko pfinya, echigamba, “Ambuyenyi maa mndu alamanye.”

³¹ Kyaindi shikafuma, shikaonguo mbonyi tsakye kulya urukyenyi koose.

Ikyiṟo lya Mndu ai Ndiṟi

³² Nawo kyiyeri waweiyenda, wakamwendie mndu ai ndiṟi awoṙo nyi mṟufui mmbicho.

³³ Na kyiyeri mṟufui ulya mmbicho alewuto, ulya awei ndiṟi naleṙeṙa, wuingyi wo wandu wakaṟiyio, wakagamba, “Kyilandewonekye kunu Isiraelyi kyiyeri kyoose-pfo.”

³⁴ Kyaindi Mafarisayo wakagamba, “Kui pfinya tsa ang'anyi o waṟufui wawicho naiwuta waṟufui wawicho.”

Iwonia Wandu Wukyiwa

³⁵ Na Yesu naweitenga-tenga kyiiṙi kya mṟi yoose na shikaṟo, echilosha masinagoginyi gawo, ionguo Mbonyi Ngyicha tsa Wumangyi; na ichihiṟa ndoṟe tsoose na wufafa wo orio mbaṟe.

³⁶ Na kyiyeri alewona wuingyi wo wandu, nalewona wukyiwa mrimenyi kokye kyipfa wawewinie na inyanyaṟika cha moondo galawoṙe mlyisi.

³⁷ Naaho-ng'u kawia wanalosho wakye, “Shilyimu nyi shifoi, kyaindi waṟundi nyi waangu.

³⁸ Kyasia, terewenyi Monyi ṙema naṙikye waṟundi ṙemenyi lyakye.”