Mariko 6 - Kivunjo New Testament 1999

Ilego lya Yesu Nasareti

¹ Kawuka pfo, kayenda mṟasa uruka lo kowo; wanalosho wakye wakamwosha.

² Kyiyeri mfiri o onyonya ulecha, nalewooka iloshia sinagoginyi. Wandu wafoi kyiyeri waleicho wakaṟiyio, wechigamba, “Ichu nyi kwi alewona ishi? Nyi wuṟango wuha amwenengye? Nyi kuṙa aiwuta shindo shing'anyi kuṙi sha maṟiyisho?

³ Ichu chi ulya ekyepacha mbau, mana o Maria, na mono-wama o wako-Yakobo, Yose, Yuda, na Simion-pfoe? Na washikyi wakye wakyeri iha koṙu-pfoe?” Koikyo wakammina.

⁴ Yesu kawawia, “Moonguo shisuku ekyewuṟa iindio, sile urukyenyi lokye amonyi-pfo, ko wandu wakye, na kanyi kokye.”

⁵ Maa aleiṙima iṟunda kyiṟiyisho kyoose ipfo-pfo, sile nalewikyia mawoko gakye wuye ya wandu waangu waluoe, kawakyiṟa.

⁶ Kaṟiyio kyipfa kya iiṙikyia lyawo lyaangu. Katenga-tenga kulya shikaṟonyi, echilosha.

Iṙumo lya Walya Ikumi na Wawi

⁷ Kalaga walya ikumi na wawi, kawooka iwaṙuma wawi wawi, kawaenenga pfinya yechilyia waṟufui wawicho.

⁸ Kawaima walaṙuo kyindo kyoose kyewatarama njienyi sile upoi tupu; maa mkate, maa mkunja, maa heleri tsa kyiseyesoe;

⁹ kyaindi waṟae shiaṙu. Kagamba, “Mulaṟae mawale gawi.”

¹⁰ Kawawia, “Handu hoose mochiiṙa na numba, kaenyi pfo mṟasa kyiyeri mochiwuka handu-ho.

¹¹ Na handu hoose walandemuambilyie nyoe maa imuaṙanyia, kyiyeri mowuka ho, kute-kutenyi kyilulyi kyikyeri maṙendenyi ganyu, kundu wamanye wuwicho wo kyilya wawuta.”

¹² Wakafuma, wakaonguo kye wandu waṙumbuye wunyamaṟi.

¹³ Wakafuna waṟufui wawicho wafoi; wakashia mafuṙa wandu wafoi waweluoe, wakawakyiṟa.

Upfu lo Yohane Mpatisi

¹⁴ Na Mangyi Herode kaicho mbonyi, cha kyipfa rina lya Yesu lyiwesendo orio handu, kagamba, “Yohane Mpatisi naṟuka ko wapfu, koikyo pfinya-tsi tsiṟunda kyiiṙi kyakye.”

¹⁵ Wengyi walegamba, “Nyi Elyia.” Wengyi walegamba, “Ichu nyi moonguo shisuku, ang'u nyi cha umwi o weonguo shisuku.”

¹⁶ Kyaindi kyiyeri Herode aleicho nalegamba, “Yohane, ulya ngyilemṙumbuo mṙoe, naṟuka.”

¹⁷ Cha kyipfa Herode amonyi nalekoaṙuma wandu, kawaṙa Yohane, kammbika kyipfungonyi, kyipfa kya Herodia, mka o Filyipo, mono-wamae; cha kyipfa Herode nawemwalyikyie.

¹⁸ Cha kyipfa Yohane nalewia Herode, “Chi sungusinyi kopfo ialyika mka o mono-womoo-pfo.”

¹⁹ Na Herodia naweimwotia, kapfula immbaaga, alaiṙime.

²⁰ Cha kyipfa Herode naleouwuo Yohane; amwichi kye nyi mndu o wusumganyi, mweele, kamringa. Na kyiyeri ammwaṙanyie nalewoṙo nyi fowa mrimenyi mnu; na oe nawemwaṙanyia na sia.

²¹ Na lyilya ṙaawa lyicha lyilewoneka, na Herode, mfiri ung'anyi o iwoneka lyakye, kyiyeri aleachikyia wang'anyi wakye shelya, na wasongoru wa asikari wa shiṙa, na wandu wawoṙe kyiṟumi wa Galyilaya;

²² nyi lyo-ndu mono-kyika o Herodia aleiṙa na numba, katema, kachihiṟa Herode na walya waweilya handu hamwi na oe. Mangyi kawia mana ulya, “Ngyiterewa kyoose ukundi, ngyechikuenenga.”

²³ Kammbia, “Kyoose ochingyiterewa ngyekuenenga, maa kokooya nyi igawana wumangyi woko.”

²⁴ Kyasia kafuma kawesa wamae, “Ngyiterewe kyi?” Na wamae kagamba, “Mṙoe o Yohane Mpatisi.”

²⁵ Cha ilyi kayenda faṟa ko mangyi, katerewa echigamba, “Ngyikundi ungyienengye wulalu kuṙi ipongonyi mṙoe o Yohane Mpatisi.”

²⁶ Mangyi kawihiyo mnu mrimenyi, kyaindi kyipfa kya nyamu tsakye, na kyipfa kya walya waweilya na oe, alekunda imlegia-pfo.

²⁷ Cha ilyi mangyi kaṙuma asikari, kagamba mṙoe okye uendo. Asikari ulya kayenda, kaṙumbuo Yohane mṙoe kulya kyipfungonyi,

²⁸ Kaende mṙoe okye ipongonyi, kaenengyia mana ulya, na oe kaenengyia wamae.

²⁹ Kyiyeri wanalosho wa Yohane waleicho mbonyi, waleyenda, wakaṙuo mmbiu okye, wakauṟika kyilomenyi.

Iigutso lya Wandu Shiku Shitaanu

³⁰ Na wanalosho wakasanza mbele ya Yesu, wakamwongoya mbonyi tsa shindo shoose waleṟunda, na shindo shoose walelosha.

³¹ Kawawia, “Nnjonyi nyoe muwenyi, na handu halawoṙe wandu, mucheonyonya kyitutu.” Cha kyipfa hawewoṙe wandu wafoi, wechicha, wechiyenda, mṟasa ṙaawa lyelya lyikawuṟika.

³² Wakayenda handu hakuṟiikyie ngalawenyi, handu halawoṙe wandu.

³³ Wandu wakawawona wechiyenda, na wafoi wakamanya, wakayenda pfo mteeṟa ko maṙende, iwuka mṟi yoose, wakawooka ishika.

³⁴ Na oe kyiyeri alesoka ngalawenyi, kawona wuingyi wung'anyi wo wandu, kawawonia wukyiwa; cha kyipfa wawekyeri cha moondo galawoṙe mlyisi; kawooka iwalosha shindo shifoi.

³⁵ Na lyilya kyiyeri kying'anyi kya kyingoto kyileiṙa, wanalosho wakye waleyenda kokye, wakagamba, “Handu-ha nyi nuka mreesi, na wulalu kuila.

³⁶ Sama wandu-wa, kundu wayende, maṙemenyi na shikaṟonyi sha kufuhi na iha, wandeguṟa kyelya.”

³⁷ Kagaluo, kawawia, “Waenengyenyi kyelya.” Wakammbia, “Ngyesa, luende lundeguṟa mkate ya woguru wo dinari magana gawi kundu luwaenengye walye?”

³⁸ Kawawia, “Muwoṙe mkate inga? Yendenyi mundeambuya.” Wammanye, wakagamba, “Itanu na makunga gawi.”

³⁹ Kawawia wawaṟamiṟe woose, shiṙombo shiṙombo, handu hawoṙe maṟa mawishi.

⁴⁰ Wakaṙamia nzengye nzengye, iha igana, iha makumi gataanu.

⁴¹ Kawaṙa mkate iya itanu na makunga galya gawi, kaambuya ruwewu, kaana, kapeṟenguo mkate iya, kaenengyia wanalosho wakye wawagawie; na makunga galya gawi kawagawia woose.

⁴² Wakalya woose wakaiguṙa.

⁴³ Wakasania shipeṟengu sheiṙima iichuṟa mkunja ikumi na iwi; na shipeṟengu sha makunga taa.

⁴⁴ Na walelya mkate iya nyi cha wasoṟo shiku shitaanu.

Ichumia Wuye ya Mṟinga

⁴⁵ Cha ilyi kaitika wanalosho wakye waṙooye ngalawenyi, wasonguo iyenda molyolya mṟasa Betisaida, kyiyeri oe aweisama wuingyi wulya wo wandu.

⁴⁶ Na amwasame kayenda fumvunyi indeterewa.

⁴⁷ Na kyiyeri kuleila ngalawa iwekyeri makyiṙi-gawi ga ipalyipalyi, na oe nakyeri amonyi urukyenyi lugaṙutsu.

⁴⁸ Kawawona wechilya wukyiwa kyipfa kya ikuruo makasia, cha kyipfa kyiwiṟi kyiwekyilang'a. Na lyilya kulewa (cha kamba lya kaana lyeringa kyio) naleyenda ko wanalosho echumia wuye ya ipalyipalyi; kawa cha ilyi nakundi iwaiṙa.

⁴⁹ Nawo kyiyeri walemmbona echumia wuye ya ipalyipalyi, walekusaṟa kye nyi kyirinje, wakafuga.

⁵⁰ Cha kyipfa woose walemmbona, wakawoṙo nyi wuowu, cha ilyi kaṙeṙa nawo, kawawia, “Kuwanzenyi nyi inyi, mulaowuoe.”

⁵¹ Kaṙooya kulya ngalawenyi kundu wakyeri; kyiwiṟi kyikatsia. Wakaṟiyio mnu mrimenyi kowo;

⁵² cha kyipfa walemanya mbonyi tsa mkate iya-pfo, kyaindi mrima yawo iwengyiumu.

Ikyiṟa Waluoe Kyenesareti

⁵³ Na wamuambaṙe, waleshika uruka lo Kyenesareti, wakatirimisha ngalawa.

⁵⁴ Nawo wammbukye ngalawenyi, cha ilyi wandu walemmanya.

⁵⁵ Wakakapa mteeṟa, wechitenga uruka lulya loose, wakawooka iṙuo wandu waluoe walee shitaṟenyi, iyenda orio handu waleicho kye nakyeri.

⁵⁶ Na orio handu aleyenda, echiiṙa na shikaṟonyi, ang'u maṙemenyi, wakawikyia wandu waluoe sangaṙa, wakamterewa wapaaye maa ikyechu lya ikunya lyakye. Na woose walempaaya wakachia.