Luka 19 - Kivunjo New Testament 1999

Yesu na Sakayo

¹ Na oe kyiyeri aleiṙa na Yeriko, naleiṙa makyiṙi-gawi ga mṟi-cho.

² Na hawewoṙe mndu ekyelago Sakayo, msongoru umwi kyiiṙi kya wesania ukamba, na oe nyi mnjama.

³ Ichu naweipfula iwona Yesu nyi mndu o mbaṟe iha, alaiṙime kyipfa kya wuingyi wo wandu, kyipfa nawemfuhi.

⁴ Kasonguo eṙicha, kaṙooya mkuunyi naiṙime immbona, cha kyipfa Yesu nawecheiṙia njia iya.

⁵ Na kyiyeri Yesu aleshika handu halya, naleambuya wuye, kammbia, “Sakayo, soka iwinyi, cha kyipfa inu kyangyikooya itsinda kanyi kopfo.”

⁶ Kasokyia wanda faṟa, kamwambilyia, kui sia.

⁷ Lyilya wandu walewona, walenunuwa woose, wechigamba, “Nayenda kanyi ko mndu mnyamaṟi.”

⁸ Sakayo kagoṟoka, kawia Mndumii, “Mndumii, masaa gako goose ngyechigagawa kawi na kyifunjoe kyimwi ngyienengye wakyiwa, na kokooya ngyisokyie mndu kyindo kui ngyeṟo ngyemmbiyiṟia kaana.”

⁹ Yesu kammbia, “Inu wukyiṟo woshika kunu kanyi, kyipfa ichu na oe nyi mana o Abrahamu.

¹⁰ Cha kyipfa Mana o Adamu nalecha ipfula na ikyiṟa kyilya kyiweṙekyie.”

Mfano o Heleri

¹¹ Kyiyeri waleicho isho, naleengyeṟa iṙeṙa kui mfano, kyipfa nawekyeri kufuhi na Yerusalemu, nawo walekowakusaṟa kye Wumangyi wo Ruwa wowono cha ilyi.

¹² Kyasia kagamba, “Mndu umwi, awoṙe rina nalepfunga kyaro iyenda kuleshi kundu nandeambilyia wumangyi na iwuya.

¹³ Kalaga wandu ikumi kyiiṙi kya waṟundi wakye kaenenga orio umwi owo heleri, kawawia, ‘Kapenyi natso mbucha mṟasa ilyi ngyechicha.’

¹⁴ Kyaindi wandu wa uruka lokye walemsuo, wakaṙuma wandu imwosha na igamba, ‘Lukundi ichu naluchilyie-pfo.’

¹⁵ Kyiyeri alewuya, amwambilyie wumangyi wokye, nalegamba waṟundi walya alewaenenga heleri walago kundu namanye kyiira walewona orio mndu mbuchenyi yakye.

¹⁶ Kacha o kuwooka, kagamba, ‘Mndumii, kyiira ngyilewona halya helerinyi nyi mafungu ikumi.’

¹⁷ Kammbia, ‘Necha, mṟundi mcha. Kyipfa uleringa necha kyilya kyitutu uleenengo chilyia mṟi ikumi.’

¹⁸ Kacha o kawi, kagamba, ‘Heleri ulengyienenga tsileengyeṟika ngawona ho kyiira mafungu gataanu.’

¹⁹ Kawia ichu na oe, ‘Iyoe nochilyia mṟi itanu.’

²⁰ Kacha ungyi, kagamba, ‘Mndumii, ilyi nyilyo fungu lyapfo ngyilepfungyia kyitambeenyi.

²¹ Cha kyipfa ngyilekuowuo kyipfa iyoe nyi mndu muumu, nokyeambilyia kyilakyeri kyapfo, na isambuo ulawaaya.’

²² Kammbia, ‘Iyoe mṟundi mmbicho. Ngyekuanduya kui maṙeṙo gapfo. Nulemanya kye inyi nyi mndu muumu, ngyekyeambilyia kyilakyeri kyako na isambuo ngyilawaaya.

²³ Kyasia, ny'kyilyi ulalekooma heleri tsako ko walya wekyewuta heleri tsa ngoseṟa, kundu ilyi ngyechicha ngyitsiambilyie hamwi na itso tsa ngoseṟa?’

²⁴ Kawia walya wawegoṟokyi kufuhi, ‘Msokyenyi fungu-lyo, muenengye ulya awoṙe mafungu ikumi.’

²⁵ Wakammbia, ‘Mndumii, nawoṙe ikumi.’

²⁶ Ngyimmbia, ‘Orio mndu awoṙe kyindo nechienengo, indi ulya alawoṙe kyindo nesoko maa kyilya awoṙe.

²⁷ Lyingyi-se, washituwa walya wako, walakundi ngyiwachilyie, waendenyi na iha muwawaage mbele yako.’ ”

Iiṙa na Yerusalemu kui Kyiṟumi

²⁸ Na kyiyeri amgambe isho, nalesonguo mbele echiṙo iyenda Yerusalemu.

²⁹ Na lyilya aleshika kufuhi na Betifage na Betania, fumvunyi lyekyelago lya Mseituni, naleṙuma wawi kyiiṙi kya wanalosho walya,

³⁰ echigamba, “Yendenyi mṟasa kyikaṟo kyilya kyiambuyanyi na iha, na ilyi mochiiṙa napfo mowona igache lya nzoi lyilyipfungye, lyilandeṙamilyio nyi mndu oose. Lyipfunguonyi mulyiende na iha.

³¹ Na kokooya mndu ammbesa, ny'kyilyi mulyipfunguo gambenyi kuṙi: ‘Mndumii nawoṙe nalyo iṟunda.’ ”

³² Na walya waleṙumo wakayenda wakawona chandu alewawia.

³³ Na kyiyeri wawepfunguo igache lyilya lya nzoi, wenyi walyo walewawia, “Ny'kyilyi mupfunguo igache lya nzoi?”

³⁴ Wakagamba, “Mndumii nawoṙe nalyo iṟunda.”

³⁵ Wakalyiṙuo ko Yesu, wakaala nguwo tsawo wuye ya igache-lyo lya nzoi, wakaṙosia ho Yesu.

³⁶ Na kyiyeri aweiyenda waleala nguo tsawo njienyi.

³⁷ Na kyiyeri awei kufuhi na mseṟemko ya fumvu lya Mseituni, wanalosho wakye woose walewooka ichihiyo na iṟumisha Ruwa na ṟui lying'anyi, kyipfa kya maṟunda goose ga maṟiyisho walegawona,

³⁸ wechigamba, “Nyi oe ammbikyie mboṟa Mangyi aicha kui rina lya Mndumii. Ufoṟo ruwewu, na mng'ano ipfo wuye.”

³⁹ Mafarisayo waata wawekyeri wuingyinyi wo wandu wakammbia, “Mlosha, wia wanalosho wapfo watsie.”

⁴⁰ Kagaluo, “Ngyimmbia, wakatsia iwa, magoe gekalagatsa.”

⁴¹ Kyiyeri aleshika kufuhi nalewona mṟi, kaufiiṟia

⁴² echigamba, “Kokooya uwemanya, maa iyoe, kyiiṙi kya mfiri-chu, kyiwaṟi ufoṟo! Kyaindi wulalu uiṙima iwona-pfo.

⁴³ Cha kyipfa mfiri iicha, kyiyeri washituwa wapfo wechikuwikyia moombo ukuringyichie. Wechikuiṟiwia na ikushingyia ngyuura tsoose.

⁴⁴ Wekuolotsa wanda iyoe na wana wapfo wakyeri ipfo moombonyi, walechikuṙeeya igoe wuye ya igoe, kyipfa ulemanya kyiyeri kya Ruwa icha na kopfo-pfo.”

Yesu Kayenda Hekalunyi

⁴⁵ Kaiṙa na hekalunyi, kawooka ifuna na nja walya waweikapa mbucha,

⁴⁶ echiwawia, “Kyikyiṟeie, ‘Numba yako yechiwa numba ya kyiterewo’; kyaindi nyoe moigaluo usanja lo wasokyi.”

⁴⁷ Na oe kawamolosha mfiri yoose hekalunyi. Indi wang'anyi wa makohanyi, na walosha wa mawawaso, na wang'anyi wa wandu waweipfula njia ya imrumatsa.

⁴⁸ Walawone kyewuta, cha kyipfa wandu woose waweoshana na oe, wemwaṙanyia.