2 Yohane 1 - Kivunjo New Testament 1999

¹ Inyi meeku, ngyikuṟeia iyoe paruo-i, wama msambuṟe, na wana wakye ngyiwakundi kyiiṙi kya loi; maa chi inyi ngyimonyi-pfo, indi na woose waichi loi iya,

² kyipfa kya loi-yo ikyeri mrimenyi koṙu, nayo yechikaa hamwi na soe mṟasa mlungana.

³ Isaṟia na iwonio wukyiwa, na ufoṟo, shiwukyie ko Ruwa Awu na ko Yesu Kristo Mana o Awu, shechikaa hamwi na soe kyiiṙi kya loi na ikunda.

Wuloi na Ikunda

⁴ Ngyilechihiyo mnu kyipfa kya ilyi ngyilewona wana wapfo waata wechichumia kyiiṙi kya loi, chandu luleambilyia iwawaso ko Awu.

⁵ Na wulalu, mama, ngyikuterewa, chi kye ngyikuṟeia iwawaso lyihya-pfo, indi lyilya luwei nalyo wookyia mawookyionyi, kye lukundane.

⁶ Na ilyi nyilyo ikunda, luchumie lochiosha mawawaso gakye. Ilyi nyilyo iwawaso lyilya, chandu muleicho wookyia mawookyionyi, kye muchumie kyiiṙi kya ilyo,

⁷ cha kyipfa walembi wafoi wammboneka wuyanenyi, walaiṙikyie kye Yesu Kristo naicha kyiiṙi kya mmbiu. Icho nyi oe mlembi ulya na mowingana na Kristo.

⁸ Ringyenyi mrima yanyu mulaṙetse shilya mulewuta, indi muambilyie wori wuafutsie.

⁹ Orio mndu alailosha na ikaa maloshonyi ga Kristo, indi nekyegalega, awoṙe Ruwa-pfo. Indi icho ekyekaa ipfo maloshonyi, nawoṙe Awu na Mana taa.

¹⁰ Mndu kacha na konyu, na oe aiende malosho-go-pfo, maa mulamwambilyie kanyi konyu, maa imwiṟikyiṟa.

¹¹ Kyipfa icho momwiṟikyiṟa naoshana na oe mawutonyi gakye mawicho.

Maṙeṙo Gefurumia

¹² Cha kyipfa ngyiwoṙe shindo shifoi, ngyikundi ishiṟeia kui karitasi na wiino-pfo, kyaindi ngyikusurie icha na konyu, na iṙeṙa na nyoe ṙumbu kui ṙumbu, kundu sia yaṙu iafutsio.

¹³ Wana wa mono-wama opfo ai msambuṟe, wakuiṟikyiṟa.