Seera Laakkobsaa 34 - Kitaaba Woyyuu

Daangaa Biyyattii Daangessan

¹ Rabbi Muuse'een akkana jedhe,

² «Ijoollee Israa'elii akkana jedhii ajaji; hennaa gara biyya Kana'aanii galtan daangaan Kana'aanii ta isin hixa'aan qoodamtan kana.

³ Garri bita'aa Edoomiyaasii lafa gammoojjii Siinii jiruu ka Edoomiyaasiin bira jiruu ta'a; daangaan bita'aa galaana sooqiddaa biraan gara baya biiftu'uutiin jalqaba.

⁴ Achii gara Aqiraabii cinaa bita'aatiin gara galee gara Siinii lufa; karri bayaniinillee Barnee Qaadeessii cinaa bita'aatiin lufee gara Hatsaraadarii dhaqee gara Atsimoonii lufa.

⁵ Daangaan isaallee Atsimooniin irraa galaana biyya Misirii irra naannaya; karri bayaniinillee cinaa galaanaatiin ta'a.

⁶ «Daangaan keessan gara dhiyaatiin galaana guddaa Meditiraaniyaaniiti; kun daangaa keessan ka gara dhiyaati.

⁷ «Daangaan keessan ka mirgaa galaana guddaa Meditiraaniyaanii biraan gara gaara Hooriititti malkata isinii ta'a.

⁸ Gaara Hoorii irraa haga Haamaatii daangaa seensaa godhattan karri daangaa keessanii ka baataniin Tsidaadiin ta'a.

⁹ Daangaan isaallee gara Zifiroonii lufee haga gara Hatsareenaanii gaya; kun daangaa keessan ka cinaa mirgaati.

¹⁰ «Daangaan keessan ka baya biiftu'uu Hatseer'eenaanii ka'ee gara Seefaama'aa lufa;

¹¹ daangaan isaallee Aayii Seefaamaa irraa ka'ee gara baya biiftu'uutiin gara Ribila'aa bu'ee haga Kineereetii gara baya biiftu'uutiin galaana Woshmaxii bira gaya.

¹² Daangaan isaallee gara galaana Yoordaanosii bu'a; karri bayaniinillee gara galaana sooqiddaatiin; daangaan naannaya lafa isin irra jiraattanii kana» jedheen.

¹³ Muuseen ijoollee Israa'elii akkana jedhee ajaje, «Lafti gofti sagalii fi wodhakkaan akka hixa'aan qoodamaniif ajaje tana.

¹⁴ Gofti ijoollee Roobeelii akka manniin aboota isaaniitiin, gofti ijoollee Gaadiillee akka manniin abboota isaaniitiin, gofti Minaase'eellee qooda lafa ufii fudhatan;

¹⁵ gofti lamaan kunii fi cinaan gosa tokkoo lafa ufii Yoordaanosiin gama gara Iyyaariko'ootiin haga baya biiftu'uutitti lafa fudhattan»

Worra Bulchu Ka Akka Lafa Qoodan Gayeen Isaanii Kenname

¹⁶ Rabbi Muuse'een akkana jedhe,

¹⁷ «Maqaan namoota lafa qoodamanii kana; El'aazaarii gadichaa fi ilma Naawwe'ee Iyyaasu'u.

¹⁸ lafa akka qoodamaniif bulchaa tokko tokko isaan keessaa fuudhi»

¹⁹ maqaan namoota ati fuutuu Yihuudaa keessaa ilma Yoofoonii Kaaleeb;

²⁰ gosa ijoollee Simoonii keessaa ilma Amihuudii Saalaami'eel;

²¹ gosa Biiniyaamii keessaa ilma Kiisiloonii Eldaad;

²² gosa ijoollee Daanii keessaa bulchaa tokko ilma Yoogilii Buuqi;

²³ gosa ijoollee Yooseefiitii fi gosa ijoollee Minaase'ee keessaallee bulchaa tokko Ani'eelii ilma Suufidi;

²⁴ gosa ijoollee Efreemii keessaa bulchaa tokko ilma Shifxaanii Qaamu'eel;

²⁵ gosa ijoollee zaabiloonii keessaa bulchaa tokko ilma Farnaakii Elsaafaan;

²⁶ gosa ijoollee Yisaakoorii keessaa bulchaa tokko ilma Hoozaa Falxi'eel;

²⁷ gosa ijoollee Aseedii keessaa bulchaa tokko ilma Seeleemii Aahihuud;

²⁸ gosa ijoollee Niftaalemii keessaallee bulchaa tokko ilma Amihuudii Faadaheel.

²⁹ Namoonni Rabbi akka ijoollee Israa'eliitii lafa Kana'aanii qoodamaniif ajaje kanniin.