Seera Laakkobsaa 13 - Kitaaba Woyyuu

Gaaddota Akka Biyya Kana'aanii Gaadaniif Ergaman

¹ Rabbi Muuse'een akkana jedhe,

² «Lafa Kana'aanii ta ani ijoollee Israa'eliitii kennu dhaqanii akka laalan namoota gosa abboota maraa keessaa nama bulchaa ta'ee ergi»

³ Muuseenillee akkuma ajaja Rabbiitiin gammoojjii fuuraaniitii isaan erge; isaan martinuu bulchoota ijoollee Israa'elii turan.

⁴ Maqaan isaanii gosa Roobeelii keessaa ilma Zaakuurii Saamu'eel;

⁵ gosa Simooniii keessaa ilma Suure'ee Saafaax;

⁶ gosa Yihuuda'aa keessaa ilma Yoofoonii Kaaleeb;

⁷ gosa Yisaakoorii keessaa ilma Yooseefii Yiigi'aal;

⁸ gosa Efreemii keessaa ilma Nawwe'ee Awusee;

^9-10 gosa Biiniyaamii keessaa ilma Raafuu Faaliix; gosa Zaabiloonii keessaa ilma Saadii Gudi'eel;

¹¹ gosa Yooseefii keessaa innillee gosa Minaase'ee keessaa ilma Suusii Gaad,

¹² gosa Daanii keessaa ilma Gamaalii Ami'eel;

¹³ gosa Aseerii keessaa ilma Mikaa'elii Satuur;

¹⁴ gosa Niftaalemii keessaa ilma Yaabii Naabi;

¹⁵ gosa Gaadii keessaa ilma Maakii Gudi'eel.

¹⁶ Namoonni Muuseen biyya Kana'aanii akka dhaqanii gaadaniif erge kanniin; Muuseen ilma Naawwe'ee Awusee «Iyyaasuu» jedhee maqaa isaa jijjiire.

¹⁷ Muuseen akka biyya Kana'aanii gaadan gara bita'aa kanaan bayaa'a, gara gaarraniillee dhaqa'aatii

¹⁸ lafti attam akka jirtu, namoonni isii irra jiraatanille jajjaboota yookaan dadhaboota;

¹⁹ namoota hagoo yookaan heddu namoonni lafa san irra jiraatan mimmishaa yookaan babbadaa ta'uu isaanii, huleen isaan jiraatanillee goodda yookaan dirree dhooqa, qachaa ta'uu,

²⁰ Mukkiin lafa sanii fufurdaa yookaan qaqadhaa ta'uu, lafti biyya sanii gabbataa ta'uu dhaqa'aa laalaa'a daraaraa lafa sanii qabadha'aa as koottaa'a» hennaan sun garuu ji'a woyiniin gawu ture.

²¹ Isaanillee deemanii biyya Kana'aanii gammoojjii Siinii ta qaccee lafa gammoojjii Hamaatii jirtu irraa jalqabee haga Ra'aabii gaadan.

²² Gara bita'aatiin bayanii Keebrooniin gayan achitti ijoolleen «Eenaaqii» ka'imman Seesii fi Taalaam fa'atu jira; Keebroon Xaniyoosii biyya Misiriitiin dura woggaa torbaan dura ijaaramte turte.

²³ Gara dhooqa Eeshkoolii dhaqanii achii gaalee muka woyini'ii dheeraa tokko muranii namni lamaa loosaa keessa loosanii baadhatan; akkasuma muka daraaraa roomani'iitii fi daraaraa balasii irraallee muranii fidan.

²⁴ Ijoolleen Israa'elii hulee san irraa waan gaalee muraniif maqaa hulee sanii « Dhooqa Eeshkoolii» jedhanii itti baasan.

²⁵ Isaanillee lafa gaadanii guyyaa afurtamaan maayessa deebi'anii gara Muuse'eetii fi gara Aaroonii,

²⁶ worra gammoojjii faaraaniitii fi Qaadeesii jiranii gara banii Israa'elii deebi'an; waan dhaqanii argan sanniin maraa isaanii fi banii marattuu himan; daraaraa biyya sanii fuudhanillee isaanitti mudhisanii

²⁷ Muuse'een, «Gara biyya ati nu ergitee dhandhe; biyyi sun Aannanii fi damma baafti, daraaraan isi'iillee kana.

²⁸ Garuu baniin biyya san keessa jiraatan jajjaboota, qachaan isaaniillee ta kalo'oon kalamtee jabaatte ijoollee Eenaaqii achitti argine.

²⁹ Gara bita'aatiin worra Amaaleqiititu jiraata; gara gaarraniitiinillee worra Keexotaa, Iyyaabusootaatii fi worra Amoorotaatitu jiraata; worri Kana'aanotaallee isaan qarqara galaana Yoordaanosii biratti quphataniiran» jedhanii itti himan.

³⁰ Kaaleeb ammo banii Muusee afo'otti akka cadhisan godhee «Mooyachuu hin dandeenna baanee biyya san haa dhaalluu» jedhe.

³¹ Namoonni isa woliin jiran garuu, «Baniin kun hunnaan waan nu caalaniif bawuu hin dandeennu» jedhanii dubbatan.

³² Waan biyya dhaqanii gaadanii san oduu hin taane ijoollee Israa'eliititti himanii «Biyyi nu dhandhee laalle sun biyya nama isii keessa dhaqee jiraatu liqimsitu; namoonni dhandhee achitti argine dhedheera'a.

³³ Achitti ijoollee Eenaaqii ta gosa Neefliimii argine; nu'u isaan biratti yoo uf laallu akka Awwaannisaati ija isaanii afo'ottillee akkasuma turre» jedhan.