Seera Laakkobsaa 10 - Kitaaba Woyyuu

Xurumbaa Birrii Irraa Hojjatame

¹ Rabbi Muuse'een akkana jedhe,

² «Banii wolitti qabu'uuf waan si gargaaru xurumbaa lama sibiila diimaa tumame irraa hojjadhu; xurumbaan lamaa kunniin ka ati bani'iin wolitti qabattee deemsiftuun haa ta'uu.

³ Hennaa ati xurumbaa afuuftu baniin balbala daasee wol gayi'iititti wolitti haa qabamanii.

⁴ Xurumbaan tokko yoo afuufamu bulchoonni gugurdaan worra Israa'elii si biratti wol haa gayanii.

⁵ Hennaa isin xurumbaa guddiftanii afuuftan worri gara baya biiftu'uutitti quphatan haa deemanii.

⁶ Yoo xurumbaa lammeesso'oo guddiftanii afuuftan worri gara bita'aatitti quphatan haa deemanii; akka isaan deemaniif xurumbaa afuuftan.

⁷ Hennaa baniin wol gayu xurumbaa afuufaa'a garuu guddiftanii hin afuufinaa'a.

⁸ Ijoolleen Aaroonii gadoonni xurumbaa haa afuufanii; xurumbaa afuufuun kunillee seera bara baraa ka ilmaan ilmaan isaanii haa ta'uu.

⁹ «Diina lafa teessanii irratti hennaa duula itti baatan xurumbaa guddisa'aa afuufaa'a; hennaa san diina jalaallee isin oolcha.

¹⁰ Akkasuma bara ayyaana gammachuu keessaniillee jalqaba ji'aa hennaa ciincaa ciincawuuf ciincaa fayyumma'aa dhiyeessitanillee ani Rabbi Waaqa keessan waan ta'eef akka yaadanno'oof isinii ta'u xurumbaa afuufaa'a» jedheen.

Worri Iraa'elii Siina'aa Ka'an

¹¹ Woggaa lammeesso'oo ji'a lammeesso'oo keessa guyyaa diddameesso'ootitti duumessi hulee bulti'ii ka raga'aa irraa ka'e.

¹² Ijoolleen Israa'elii gammoojjii Siina'aatii ka'anii deemsa ufii deeman; duumessi deebi'ee gammoojjii furaaniititti dhaabate.

¹³ Akkuma Rabbi Muuse'etti dubbate sanitti ijoolleen Israa'elii deemsa jalqaban.

¹⁴ Jalqaba ijoollee Yihuuda'aatitu malkata adda isaan godhu qabatanii duula ufii woliin deeman; duula isaanii irratti Na'aasoonii ilma Aminaadaabiititu bulcha'aa ture.

¹⁵ Gosa duula ijoollee Yisaakoorii ilma Sookarii Naatinaa'elitu bulcha ture.

¹⁶ Duula gosa ijoollee Zaabiloonii ilma Keeloonii Eeliyaabitu bulcha.

¹⁷ Kanaan maayessa hulee bulti'ii san hin buqqisan; worri daasee wol gayi'ii kana baadhatanii deeman ijoollee Geedisooniitii fi ijoollee Meeraariiti.

¹⁸ Ijoolleen Roobeelii malkata adda isaan godhu qabatanii duula ufii woliin deeman; duula isaanii ka bulchu ilma Saadiyoorii Elsuuri;

¹⁹ duula gosa ijoollee Simoonii ilma Suurshadaayii Salaami'eelitu bulcha ture.

²⁰ Duula gosa ijoollee Gaadii ilma Daa'u'eelii Alsaafitu bulcha'aa ture.

²¹ Achiin maayessa worri gosa Qa'aatii mi'a woyyuu san baadhatanii deeman; haga kuuwwan dhufaniif hulee bulti'ii ijaaran.

²² Ijoolleen Efreemiillee malkata adda isaan godhu qabatanii deeman; bulchaan duula sanii ilma Amihuudii Eelsaamaa ture.

²³ Duula gosa ijoollee Minaase'ee ka bulchu ilma Fiddaasuurii Gamaali'eel ture,

²⁴ duula worra ijoollee Biiniyaamii ka bulchu ilma Gaadiyoonii Abidaaniin ture.

²⁵ Worra deeman sanniiniin maayessa worri deeman ijoollee Daaniititu malkata adda isaan godhuu qabatanii duula isaanii woliin deeman; ka duula san bulchu ilma Amisaadaayii Aki'eezar ture;

²⁶ Bulchaan duula gosa ijoollee Aseerii ilma Ekiraamii Faagi'eel ture.

²⁷ Bulchaan duula gosa ijoollee Niftaalemii ilma Eenaanii Akiree ture.

²⁸ Ijoolleen Israa'eliillee akka kanaan duula ufii woliin deema'aa turan.

²⁹ Muuseen soddaa ufii nama Miidiyaamii ilma Raagu'eelii Obaabiin, «Koottu gara hulee Rabbi isinii kenna jedhee dhandhaa; Rabbi waan Israa'eliitiif waan mishaa waan dubbateef waan mishaa sii goonaa» jedheen.

³⁰ Inni «Ani hin deemu gara firaa fi biyya kiyyaa deema» jedheen.

³¹ Innillee, «Yabo'oo biyya gammoojji'ii ka nu itti quphachu'uuf taanu situ beekaa akka ija keennaatitti nuu laaltaa nu biraa hin hafin.

³² Yoo nu woliin deemte waan mishaa Rabbi nuu godhu maraa keessaa sii kennina» jedheen.

Baniin Deemsa Jalqabe

³³ Baniin gaara woyyuu biyya gammoojji'ii keessa jiru dhiisee deemsa guyyaa sadihii isaan firrisee deeme.

³⁴ Hennaa isaan achii deeman duumessi Rabbii guyya guyya'aan isaan golga'aa ture.

³⁵ Muuseen hennaa saandundhi waada'aa achii deeme «Yabo'oo ka'i diintonni teellee bittinnaayanii afoo keetii haa dheessanii» jedhee Rabbiin kadhate.

³⁶ Hennaa saanduundhi waada'aa sun hulee san gaye «Yabo'oo gara banii guddaa Israa'elii kana deebi'i» jedha'aa ture.